ରିଲାଏନ୍ସ ଇଣ୍ଡଷ୍ଟ୍ରିଜ୍ର ଚେୟାରମ୍ୟାନ୍ ତଥା ମ୍ୟାନେଜିଂ ଡାଇରେକ୍ଟର ମୁକେଶ ଅମ୍ବାନୀ ଏବଂ ତାଙ୍କ ସ୍ତ୍ରୀ ନୀତା ଅମ୍ବାନୀ ନିଜ ପିଲାମାନଙ୍କୁ ସବୁବେଳେ ଉଚିତ୍ ଶିକ୍ଷା ଦେଇଥାନ୍ତି। ଦେଶର ସବୁଠାରୁ ଧନୀ ବ୍ୟକ୍ତିଙ୍କ ପିଲା ହୋଇଥିବାରୁ କେବେ ଗର୍ବ ଅନୁଭବ ନ କରନ୍ତୁ ସେଥିପ୍ରତି ମଧ୍ୟ ଏହି ଦମ୍ପତି ଧ୍ୟାନ ଦେଇଥାନ୍ତି। ନିଜର ୩ ପିଲା ଈଶା, ଆକାଶ ଏବଂ ଅନନ୍ତଙ୍କୁ ସବୁବେଳେ ଡାଉନ୍ ଟୁ ଆର୍ଥ ଏବଂ ବିନମ୍ର ରହିବାର ଶିକ୍ଷା ଦେଇଥାନ୍ତି। ଏକଦା ପୁଅ ଆକାଶଙ୍କ ଏକ କାମରେ ମୁକେଶ ବହୁତ ରାଗିଯାଇଥିଲେ। ଏଥିପାଇଁ ସେ ଆକାଶଙ୍କୁ ଗାଳିଗୁଲଜ କରିଥିଲେ। ଏଥିସହ ସେ ଆକାଶଙ୍କୁ ଜଗୁଆଳିଙ୍କଠାରୁ କ୍ଷମା ମଧ୍ୟ ମାଗାଇଥିଲେ।
କିଛି ବର୍ଷ ପୂର୍ବେ ଟିଭିରେ ପ୍ରସାରିତ ହେଉଥିବା ‘ରେଣ୍ଡେଜ୍ଭୋସ୍ ଓ୍ବିଥ୍ ସିମି ଗ୍ରଓ୍ବୋଲ’ ନାମକ ଟକ୍ ଶୋ’ ମୁକେଶ ଏବଂ ନୀତା ଯୋଗ ଦେଇଥିଲେ। ଏହି ଅବସରରେ ସେମାନେ ନିଜ ଜୀବନ ସହ ଜଡିତ ଅନେକ ବ୍ୟକ୍ତିଗତ କଥା ଶେୟାର କରିଥିଲେ। ନୀତା କହିଥିଲେ, ମୁକେଶ ଜଣେ ବହୁତ ଭଲ ବାପା। କିନ୍ତୁ ସଂସ୍କାର କଥା ଆସିଲେ ସେ ନିଜ ପିଲାମାନଙ୍କୁ ଗାଳି କରିବାକୁ ମଧ୍ୟ ପଛାଇ ନ ଥାନ୍ତି।
ଏକଦା ବଡ଼ ପୁଅ ଆକାଶ ଘରର ଜଣେ ଜଗୁଆଳିଙ୍କ ସହ ବଡ଼ ପାଟିରେ କଥା ହୋଇଥିଲେ। ଏହା ମୁକେଶ ଘରର ବାଲକୋନୀରୁ ଛିଡାହୋଇ ଦେଖୁଥିଲେ। ଉକ୍ତ ସମୟରେ ମୁକେଶ ପୁଅକୁ କିଛି କହି ନ ଥିଲେ। ହେଲେ ଆକାଶ ଘର ଭିତରକୁ ଆସିବା ପରେ ମୁକେଶ ତାଙ୍କୁ ଗାଳିଗୁଲଜ କରିବା ସହ ବଡ଼ ଲୋକଙ୍କ ସହ କିପରି କଥା ହେବା ଉଚିତ୍ ତାହା ପୁଅକୁ ବୁଝାଇଥିଲେ। ଖାଲି ସେତିକି ନୁହେଁ, ଉକ୍ତ ଜଗୁଆଳିଙ୍କୁ କ୍ଷମା ମାଗିବା ପାଇଁ ମଧ୍ୟ ମୁକେଶ ପୁଅକୁ କହିଥିଲେ। ଆକାଶ ମଧ୍ୟ ନିଜ ଭୁଲ ବୁଝିପାରି ଉକ୍ତ ଜଗୁଆଳିଙ୍କୁ କ୍ଷମା ମାଗିଥିଲେ ଏବଂ ଆଗକୁ ଏମିତି ଭୁଲ କେବେ କରିବେ ନାହିଁ ବୋଲି ବାପା ମୁକେଶଙ୍କୁ କଥା ଦେଇଥିଲେ।
