ଗୋପ,୧୧ା୧୧(ଡି.ଏନ୍.ଏ.): ପୁରୀ ଜିଲା ଗୋପ ବ୍ଳକ ଅଞ୍ଚଳରେ ବେଆଇନ ଭାବେ ୨୦ରୁ ଊର୍ଦ୍ଧ୍ୱ ସ’ ମିଲ ଚାଲୁଛି। ଏହାପରେ ଭିଜିଲାନ୍ସ, ବନ ବିଭାଗ ପକ୍ଷରୁ ବାରମ୍ବାର ଚଢ଼ାଉ କରାଯାଉଥିଲେ ମଧ୍ୟ କିଛିଦିନ ପରେ ପୁଣି ମିଲ ଖୋଲାଯାଇ କାର୍ଯ୍ୟ ହୋଇଥାଏ। ସୁପ୍ରିମକୋର୍ଟ ସ’ ମିଲକୁ ବେଆଇନ ଘୋଷଣା କରିଥିଲେ ମଧ୍ୟ ଗୋପରେ ଖୋଲାଖୋଲି ଉଲ୍ଲଂଘନ କରି ଦିନରାତି ମିଲ ଚାଲୁ ରହିଛି। ଏପରି କି ରାଜ୍ୟ ରାଜପଥ କଡ଼ରେ ଏହି ସବୁ ବେଆଇନ କରତକଳ ଚାଲିବା ଯୋଗୁ ପୁରୀ, କୋଣାର୍କ ଯାଉଥିବା ପର୍ଯ୍ୟଟକଙ୍କ ମଧ୍ୟରେ ମଧ୍ୟ ଅସନ୍ତୋଷ ଦେଖା ଦେଉଥିବାବେଳେ ରାସ୍ତାରେ ଯାଉଥିବା ଲୋକମାନେ ମଧ୍ୟ କରତକଳ ଗୁଣ୍ଡରେ ଅସ୍ତବ୍ୟସ୍ତ ହୋଇ ପଡୁଛନ୍ତି। ବାରମ୍ବାର ଅଭିଯୋଗସତ୍ତ୍ୱେ ଗୋପ ଜଙ୍ଗଲ ବିଭାଗ ନୀରବଦ୍ରଷ୍ଟା ସାଜିଛନ୍ତି।
୧୯୯୯ରେ ସୁପ୍ରିମକୋର୍ଟ ଗ୍ରାମାଞ୍ଚଳରେ ଚାଲୁଥିବା ଏହି କରତକଳଗୁଡ଼ିକୁ ବେଆଇନ ଘୋଷଣା କରି ବିଦ୍ୟୁତ୍ ଲାଇନ୍ କାଟିବା ଲାଗି ନିର୍ଦ୍ଦେଶ ଦେଇଥିଲେ। ହେଲେ ଅଳ୍ପ କିଛିଦିନ ଏହି ନିୟମ ପାଳନ କରିବା ପରେ ମିଲ୍ଗୁଡିକ ପୁଣିଥରେ ଚାଲିଥିଲା। ଏପରି ଭାବରେ ଏହି ବେଆଇନ କରତକଳ ଚାଲିବା ଯୋଗୁ ପୋଲିସ ଓ ବନ ଅଧିକାରୀମାନେ ମଧ୍ୟ ହାତଗୁଞ୍ଜା ନେଇ ଚୁପ୍ ରହିଯାଉଥିବା ଅଭିଯୋଗ ହେଉଛି। ଗୋପ ଜଙ୍ଗଲ ବିଭାଗ ଅଧୀନ ଗୋପ, ଜମରା, ଦିଘାଳୋ, ସୁବର୍ଣ୍ଣପୁର, ଶଙ୍ଖାରିଆ, ଚାଉଳିଆପାଟେଣା, ତମ୍ପାଳ, ପଲ୍ଲିଛକ, ନୂଆଗାଁ ସହ ଅନ୍ୟ କେତେକ ସ୍ଥାନରେ ଦିନ ରାତି ସ’ ମିଲ ଚାଲୁଛି। ଜଙ୍ଗଲ ବିଭାଗ ପକ୍ଷରୁ ଲୋକ ଦେଖାଣିଆ ଭାବେ ଅଳ୍ପ କିଛି ଚଢ଼ାଉ ହେଉଥିଲେ ମଧ୍ୟ କୌଣସି ଦୃଢ଼ କାର୍ଯ୍ୟାନୁଷ୍ଠାନ ନିଆଯାଉ ନାହିଁ। ଅଧିକାଂଶ ସମୟରେ ଚଢ଼ାଉ ପୂର୍ବରୁ ଜଙ୍ଗଲ ବିଭାଗ ପକ୍ଷରୁ ସ ମିଲ ମାଲିକଙ୍କୁ ଖବର ଦିଆଯିବା ଯୋଗୁ ସେମାନେ ରାତିରେ କରତକଳ ଯନ୍ତ୍ରାଂଶ ସବୁ ଖୋଲି ଦେଉଛନ୍ତି। ପରେ ଚଢ଼ାଉ କରିବାକୁ ଯାଇଥିବା ବିଭିନ୍ନ ବିଭାଗର ଅଧିକାରୀ ଓ ପୋଲିସ ମଧ୍ୟ ନିରାଶରେ ଫେରୁଛନ୍ତି। ଏ ସମ୍ପର୍କରେ ଗୋପ ରେଞ୍ଜର ରବୀନ୍ଦ୍ର କୁମାର ନାୟକ କୁହନ୍ତି, ବେଆଇନ କରତକଳ ଚାଲିବା ଖବର ଆମ ପାଖରେ ଅଛି। କିନ୍ତୁ ମାଲିକମାନେ ପୂର୍ବରୁ ଚଢ଼ାଉ ଖବର ପାଇ ଫେରାର ହୋଇଯାଉଛନ୍ତି। ଏଥିପ୍ରତି ଆଗକୁ ଦୃଷ୍ଟିରେ ରଖି ଅଚାନକ ଚଢ଼ାଉ କରାଯାଇ କାର୍ଯ୍ୟାନୁଷ୍ଠାନ ନିଆଯିବ ବୋଲି ସେ କହିଛନ୍ତି।
