ବୁଏନ ଆୟାର୍ସ,୫।୧୧(ଏପି): ଆର୍ଜେଣ୍ଟିନା କିମ୍ବଦନ୍ତୀ ଫୁଟବଲର ଡିଏଗୋ ମାରାଡୋନାଙ୍କ ଅସ୍ତ୍ରୋପଚାର ସଫଳ ହୋଇଛି। ତାଙ୍କ ମସ୍ତିସ୍କରେ ରକ୍ତସ୍ରାବକୁ ରୋକିବା ଏହି ଅସ୍ତ୍ରୋପଚାର କରାଯାଇଥିଲା। ୬୦ତମ ଜନ୍ମଦିନ ପାଳନ କରିବା ପରେ ତାଙ୍କର ଏହି ସ୍ବାସ୍ଥ୍ୟଗତ ସମସ୍ୟା ଦେଖା ଦେଇଥିଲା। ଅସ୍ତ୍ରୋପଚାର ସଫଳ ହୋଇଛି ଓ ସେ ସୁସ୍ଥ ଅଛନ୍ତି ବୋଲି ମାରାଡୋନାଙ୍କ ପବ୍ଲିକ ରିଲେଶନ ଟିମ୍ ମଙ୍ଗଳବାର ସୂଚନା ଦେଇଛନ୍ତି। ଏକ ଦୁର୍ଘଟଣା କାରଣରୁ ଏପରି ସ୍ଥିତି ସୃଷ୍ଟି ହୋଇଛି ବୋଲି ତାଙ୍କ ଡାକ୍ତର କହିଛନ୍ତି। ତେବେ ଏଭଳି କୌଣସି ଦୁର୍ଘଟଣା ମୋର ମନେ ନାହିଁ ବୋଲି ମାରାଡୋନା କହିଛନ୍ତି।
ବୁଏନ୍ସ ଆୟାର୍ସ ବାହାରେ ଥିବା ଏକ ଘରୋଇ କ୍ଲିନିକରେ ମାରାଡୋନା ଗତ ୪୮ ଘଣ୍ଟା ହେବ ବିଶ୍ରାମ ନେଉଛନ୍ତି। ମାରାଡୋନାଙ୍କ ନିକଟରେ ତାଙ୍କ ଝିଆ ଡାଲମା, ଜିଆନିନା ଓ ଜାନାଙ୍କ ସମେତ ଅନ୍ୟ ସମ୍ପର୍କୀୟମାନେ ଉପସ୍ଥିତ ରହିଛନ୍ତି। ପୂର୍ବରୁ ଆନେମିଆ ଓ ଡିହାଇଡ୍ରେଶନ ପାଇଁ ମାରାଡୋନା ଲା ପ୍ଲାଟା ସହରର ଏକ କ୍ଲିନିକ୍ରେ ଭର୍ତ୍ତି ହୋଇଥିଲେ। ଶୁକ୍ରବାର ମାରାଡୋନା ୬୦ ବର୍ଷରେ ପଦାର୍ପଣ କରିଥିଲେ। ୧୦୮୬ ଫିଫା ବିଶ୍ୱକପ୍ରେ ମାରାଡୋନା ନିଜର ଦମ୍ଦାର ପ୍ରଦର୍ଶନ ବଳରେ ଆର୍ଜେଣ୍ଟିନାକୁ ଚାମ୍ପିୟନ କରାଇଥିଲେ।
