ଖୋର୍ଦ୍ଧା ଅଫିସ,୨୭।୯: ଓଡ଼ିଶା ଟେଲିଭିଜନ (ଓଟିଭି) କର୍ତ୍ତୃପକ୍ଷଙ୍କ ବିରୋଧରେ ଚାଷଜମି ହଡ଼ପ କେଳେଙ୍କାରୀ ଅଭିଯୋଗ ଆସିଛି। ଶନିବାର ଖୋର୍ଦ୍ଧା ଜିଲାପାଳଙ୍କ ନିକଟରେ ବେଗୁନିଆ ବ୍ଲକ ଅନ୍ତର୍ଗତ ସାରୁଅ, ଜୟମଙ୍ଗଳ ଓ ଗଉଡ଼ପୁଟ ଗ୍ରାମର ଶତାଧିକ ଚାଷୀ ସମ୍ପୃକ୍ତ ଚ୍ୟାନେଲ କତ୍ତୃର୍ର୍ପକ୍ଷଙ୍କ ବିରୋଧରେ ଲିଖିତ ଅଭିଯୋଗ କରିଛନ୍ତି।
ଅଭିଯୋଗରେ ଦର୍ଶାଯାଇଛି ଯେ, ପ୍ରାୟ ୧୦ବଷର୍ର୍ ତଳେ ସାରୁଅ ଗ୍ରାମର କେତେଜଣ ଲୋକଙ୍କୁ ପ୍ରଲୋଭନ ଦେଖାଇ ମୂଲ୍ୟବାନ ଚାଷ ଜମିକୁ ଶାଗମାଛ ଦରରେ ଓଟିଭି କର୍ତ୍ତୃପକ୍ଷ ହଡ଼ପ କରିନେଇଥିଲେ। ସେହି ଜମିରେ ବଡ଼ କୋଠା, ପାଚେରି ନିର୍ମାଣ କରାଯାଇଛି। ଏପରି କି ଚାଷ ଜମିରେ ରାସ୍ତା ନିର୍ମାଣ ମଧ୍ୟ ହୋଇଛି। ଫଳରେ ଚାଷୀମାନେ ସେମାନଙ୍କ ଜମିକୁ ଯିବାଲାଗି ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ଏହାର ପ୍ରତିବାଦ କଲେ ଓଟିଭି କର୍ତ୍ତୃପକ୍ଷଙ୍କ ଭଡ଼ାଟିଆ ଗୁଣ୍ଡାମାନେ ଜୀବନରେ ମାରି ଦେବାକୁ ଧମକ ଦେଉଛନ୍ତି। ଏ ଅଞ୍ଚଳରେ ଥିବା ସମସ୍ତ ଜମିକୁ ଆମେ ଏପରି ହଡ଼ପ କରିନେବୁ, ଯାହାକୁ ଗୁହାରି କରିବାର ଅଛି କର, ଆମ୍ଭର କେହି କିଛି କରିପାରିବେ ନାହିଁ ବୋଲି କହୁଛନ୍ତି। ଫଳରେ ଚାଷୀମାନେ ଭୟଭୀତ ଅବସ୍ଥାରେ ରହିଛନ୍ତି। ଜମିକୁ ଯିବା ଲାଗି ରାସ୍ତାର ବ୍ୟବସ୍ଥା, ଚାଷଜମିର ସୁରକ୍ଷା ଲାଗି ଗ୍ରାମବାସୀ ଦାବିପତ୍ରରେ ଉଲ୍ଲେଖ କରିଛନ୍ତି। ପ୍ରଶାସନ ଏଥିପ୍ରତି ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ ନ କଲେ ଚାଷୀମାନେ ସାମୂହିକ ଆତ୍ମହତ୍ୟା କରିବେ ବୋଲି ଚେତାବନୀ ଦେଇଛନ୍ତି। ଏନେଇ ଅତିରିକ୍ତ ଜିଲାପାଳ ମନୋଜ ପାଢ଼ୀଙ୍କୁ ପଚାରିବାରେ ସେ କହିଛନ୍ତି, ଓଟିଭି ବିରୋଧରେ ସମ୍ପୃକ୍ତ ଗ୍ରାମବାସୀ ଅଭିଯୋଗ କରିଛନ୍ତି। ଏହାର ପୁଙ୍ଖାନୁପୁଙ୍ଖ ତଦନ୍ତ କରାଯିବ। ଚାଷ ଜମି ଉପରେ ବେଆଇନ କୋଠା, ପାଚେରି ନିର୍ମାଣ ଏବଂ ଜମିକୁ ଯିବା ଲାଗି ରାସ୍ତା ଅବରୋଧ ଅଭିଯୋଗ ପ୍ରମାଣିତ ହେଲେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଅଭିଯୋଗ ସଂକ୍ରାନ୍ତରେ ଓଟିଭିର ସାଇଟ ଇନଚାର୍ଜ ଅନିରୁଦ୍ଧ ପଣ୍ଡାଙ୍କ ମୋବାଇଲ ନଂ. ୯୭୭୭୫୮୮୭୭୮ରେ ଯୋଗାଯୋଗ କରାଯାଇଥିଲା। ହେଲେ ଏନେଇ ତାଙ୍କର କୌଣସି ପ୍ରତିକ୍ରିୟା ମିଳିପାରି ନାହିଁ।
ପ୍ରକାଶ ଯେ, ଓଟିଭି କର୍ତ୍ତୃପକ୍ଷ କୃଷି ଏବଂ ଫାର୍ମ ହାଉସ କରିବାକୁ ପ୍ରତିଶ୍ରୁତି ଦେଇ ଜମି କିଣିଥିଲେ। ୨୦୧୬ ନଭେମ୍ବରରେ ଉକ୍ତ ଚାଷ ଜମିରେ ବେଆଇନ ଭାବେ କୋଠା ଓ ରାସ୍ତା ନିର୍ମାଣ କରାଯିବାରୁ ଗ୍ରାମବାସୀ ଏହାର ବିରୋଧ କରିଥିଲେ। ସେତେବେଳେ ଉକ୍ତ ଘଟଣାର ତଦନ୍ତ କରାଯିବ ବୋଲି ପ୍ରଶାସନ ପକ୍ଷରୁ ପ୍ରତିଶ୍ରୁତି ମିଳିଥିଲା। ମାତ୍ର ପରବର୍ତ୍ତୀ ସମୟରେ କୌଣସି କାର୍ଯ୍ୟାନୁଷ୍ଠାନ ନିଆଯାଇ ନ ଥିଲା ବୋଲି ଅଭିଯୋଗକାରୀ ଚାଷୀ ଜଳଧର ମହାଭୋଇ, ସୁଦର୍ଶନ ସାହୁ, ଜଗନ୍ନାଥ ମହାଭୋଇ, ବୁଲୁ ବେହେରା, ସୁବନ ଗିରି ପ୍ରମୁଖ କହିଛନ୍ତି।
