ବାଲେଶ୍ୱର,୨୭ା୫( ବାଞ୍ଛାନିଧି ଦେ): ଦୁଇ ପୁଅ ମଧ୍ଯରେ ବିବାଦ ପାଇଁ ବଳି ପଡିଲେ ମା’ । ଏମିତି କି ମା’ର ଶବସତ୍କାର କଲେନି ଦୁଇ ପୁଅ । ମୃତ୍ୟୁ ପରେ ଘରେ ଶବ ପଡିରହିଥିଲା। ଖବର ପାଇ ଦୀର୍ଘ ୧୦ ଘଣ୍ଟା ପରେ ସ୍ଥାନୀୟ ପୋଲିସ ଅଧିକାରୀ ପହଞ୍ଚି ନିଜେ କାନ୍ଧରେ ବୋହି ନେଇ ମଶାଣି ରେ ଶବ ସତ୍କାର କରିଛନ୍ତି । ବାଲେଶ୍ବର ଜିଲା ବସ୍ତା ଥାନା ଅନ୍ତର୍ଗତ ସନ୍ତୋଷପୁର ପଞ୍ଚାୟତ ଲୋକନାଥପୁର ଗ୍ରାମରେ ଘଟିଛି ଏଭଳି ଅଭାବନୀୟ ଘଟଣା । ଏହି ଘଟଣା ସମଗ୍ର ଅଞ୍ଚଳରେ ଚର୍ଚ୍ଚାର ବିଷୟ ପାଲଟି ଥିବା ବେଳେ ପୋଲିସ ଅଧିକାରୀଙ୍କ ଏଭଳି ମହାନ କାର୍ଯ୍ଯକୁ ପ୍ରଶଂସା କରିଛନ୍ତି ଲୋକେ ।
ସୂଚନା ଅନୁଯାୟୀ ଏହି ଗ୍ରାମର ସ୍ବର୍ଗତ ବଂଶୀଧର ଦାସଙ୍କ ପତ୍ନୀ ତୁଳସୀ ଦାସଙ୍କ ତିନି ଜଣ ପୁଅ ଅଛନ୍ତି । ବଡ ପୂଅ ନିଖୋଜ ଥିବା ବେଳେ ତୁଳସୀ ସାନ ପୁଅ ରାକେଶଙ୍କ ପାଖରେ ରହୁଥିଲେ । ମଙ୍ଗଳବାର ସକାଳେ ତୁଳସୀଙ୍କ ମୃତ୍ଯୁ ହୋଇଥିଲା । ଶବ ସତ୍କାର କରିବାକୁ ନେଇ ମଝିଆଁ ପୁଅ ରାଜେଶ ଏବଂ ସାନ ପୁଅ ରାକେଶଙ୍କ ମଧ୍ଯରେ ବିବାଦ ଯୋଗୁଁ ରାତି ୯ ଟା ପର୍ଯ୍ଯନ୍ତ ଘର ବାରଣ୍ତାରେ ମାଆର ଶବ ପଡି ରହିଥିଲା ।
ଖବର ପାଇ ଅମର୍ଦ୍ଦା ରୋଡ୍ ଫାଣ୍ତି ଅଧିକାରୀ ବିଜୟ କୁମାର ବାରିକ ଏବଂ ଅନ୍ଯ ପୋଲିସ କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ଘର ଠାରୁ ଦୁଇ କିଲୋମିଟର ପର୍ଯ୍ଯନ୍ତ ନିଜ କାନ୍ଧରେ ଶବ ବୋହି ନେଇ ସୁବର୍ଣ୍ଣରେଖା ନଦୀ ପଠାରେ ଶବ ସତ୍କାର କରିଥିଲେ । ସ୍ବାର୍ଥପର ଦୁନିଆଁରେ ନିଜର ମଣିଷ ପର ହୋଇ ଯାଉଥିବା ବେଳେ ପୋଲିସ ଅଧିକାରୀଙ୍କ ଏଭଳି ମହାନତା ଯୋଗୁଁ ସବୁ ମହଲରେ ପ୍ରଶଂସାର ସୁଅ ଛୁଟୁଛି ।
