ମୁମ୍ବାଇ: ବଲିଉଡ୍ ଦୁନିଆରେ ନିଜର ଦମଦାର ଅଭିନୟକୁ ନେଇ ଦର୍ଶକଙ୍କ ନିକଟତର ହୋଇଥିବା ବିଗତ ଦିନର ନାୟିକା ପାଳନ କରିଛନ୍ତି ତାଙ୍କ ୭୬ ତମ ଜନ୍ମଦିନ। ଏବେ ସେ ତାଙ୍କର ସମସ୍ତ ସମୟ ସ୍ବାମୀ ଦିଲିପ କୁମାରଙ୍କ ସହ କାଟୁଛନ୍ତି। ଦିଲିପ ସବୁବେଳେ ଅସୁସ୍ଥ ରହୁଥିବାରୁ ସାଇରା ଅଧିକାଂଶ ସମୟ ତାଙ୍କ ସେବାରେ କାଟୁଛନ୍ତି। ମାତ୍ର ୧୭ ବର୍ଷ ବୟସରେ ଅଭିନୟ ଦୁନିଆରେ କ୍ୟାରିୟର ଆରମ୍ଭ କରିଥିବା ସାଇରା ଏକଦା ବଲିଉଡ୍ର ସବୁଠାରୁ ସୁନ୍ଦରୀ ନାୟିକା ଭାବେ ଗଣା ଯାଉଥିଲେ। ତାଙ୍କର ପ୍ରଥମ ଫିଲ୍ମ ୧୯୬୧ରେ ରିଲିଜ୍ ହୋଇଥିଲା। କୁହାଯାଏ ଏହି ଫିଲ୍ମର ନାଁ ଥିଲା ‘ଜଙ୍ଗଲି’ ଓ ଏଥିରେ ସମ୍ମି କପୁର ମଧ୍ୟ ଅଭିନୟ କରିଥିଲେ। ଏହା ବକ୍ସ ଅଫିସରେ ହିଟ୍ ହେବା ସହ ଏହାପରେ ଦର୍ଶକଙ୍କ ପସନ୍ଦର ନାୟିକା ପାଲଟି ଯାଇଥିଲେ ସାଇରା। ଏହାପରେ ସାଇରା ୧୯୬୮ରେ ଆସିଥିବା ଫିଲ୍ମ ‘ପଡୋଶନ’ରେ ନଜର ଆସିଥିଲେ। ସେ ସମୟରେ ଦିଲିପ କୁମାରଙ୍କ ସହ କିଛି ଫିଲ୍ମରେ ନଜର ଆସିଥିଲେ ସାଇରା। ଏହାରି ଭିତରେ ଉଭୟଙ୍କ ରିଲେଶନକୁ ନେଇ ଚର୍ଚ୍ଚାବି ହୋଇଥିଲା। ସେତେବେଳେ ଦିଲିପ ଦୁଇ ଦୁଇଥର ପ୍ରେମରେ ଫେଲ୍ ମାରିଥିବା ବେଳେ ସାଇରା କିନ୍ତୁ ଦିଲିପଙ୍କୁ ଭଲପାଇ ବସିଥିଲେ। ଯେତେବେଳେ ଦିଲିପଙ୍କୁ ୪୪ ବର୍ଷ ବୟସ ହୋଇଥିଲା ସେତେବେଳେ ସାଇରା ୨୨ ବର୍ଷରେ ପାଦ ଦେଇଥିଲେ। ଉଭୟଙ୍କ ବୟସର ତାରତମ୍ୟକୁ ଦେଖି ଅନେକ ଏହି ବିବାହକୁ ବିରୋଧ କରିଥିଲେ। ହେଲେ ଦିଲିପ ଯେତେବେଳେ ଜାଣିଲେ ସାଇରା ତାଙ୍କୁ ଜୀବନଠାରୁ ଅଧିକ ଭଲପାଉଛନ୍ତି ୧୯୬୬ରେ ଉଭୟ ବିବାହ ବନ୍ଧନରେ ବାନ୍ଧି ହୋଇଗଲେ। ଏହା ପୂର୍ବରୁ କିନ୍ତୁ ସାଇରା ରାଜେନ୍ଦ୍ର କୁମାରଙ୍କ ପ୍ରେମରେ ପଡିଥିଲେ। ହେଲେ ସେତେବେଳେ ରାଜେନ୍ଦ୍ର କୁମାର ବିବାହିତ ଓ ୩ଟି ପିଲାଙ୍କ ପିତା ହୋଇ ସାରିଥିଲେ। ଏକଥା ସାଇରାଙ୍କ ମା’ ନସିମ ଜାଣିବା ପରେ ଦିଲିପ କୁମାରଙ୍କ ସାହାଯ୍ୟ ନେଇ ସେ ରାଜେନ୍ଦ୍ରଙ୍କୁ ଭୁଲି ଯିବାକୁ କହିଥିଲେ। ଦିଲିପ ବହୁ ବୁଝାସୁଝା କରିବା ପରେ ସାଇରା ରାଜେନ୍ଦ୍ରଙ୍କୁ ଭୁଲି ଦିଲିପଙ୍କୁ ବିବାହ କରିଥିଲେ। ଏମାନଙ୍କର କୌଣସି ସନ୍ତାନ ନ ଥିବା କୁହାଯାଏ। ହେଲେ ଦିଲିପ-ସାଇରାଙ୍କ ପ୍ରେମ କାହାଣୀ ଏବେବି ଅନ୍ୟମାନଙ୍କୁ ପ୍ରେରଣା ଦିଏ ବୋଲି କୁହଯାଏ।
