ପୁଣେ, ୧୭।୮: ମହାରାଷ୍ଟ୍ରର ପୁଣେ ସହରରୁ ଚକିତ କଲାଭଳି ଏକ ଘଟଣା ସାମ୍ନାକୁ ଆସିଛି। ଜଣେ ୨୭ ବର୍ଷୀୟ ଯୁବକ ଥାନାରେ ପହଞ୍ଚି ଉପସ୍ଥିତ କର୍ମଚାରୀଙ୍କୁ କାଗଜ ଓ କଲମ ମାଗିଥିଲେ। ଏହାପରେ ସେ କାଗଜରେ ଯାହା ଲେଖିଥିଲେ ତାକୁ ପଢ଼ି ସେଠାରେ ଉପସ୍ଥିତ ସମସ୍ତ ପୋଲିସ କର୍ମଚାରୀ ଚକିତ ହୋଇଯାଇଥିଲେ। ବାସ୍ତବରେ ଏହି ଯୁବକଜଣକ ଲେଖିଥିଲେ ଯେ, ଝଗଡ଼ା ସମୟରେ ସେ ତାଙ୍କର ଗର୍ଭବତୀ ଲିଭ୍ ଇନ୍ ପାର୍ଟନରଙ୍କୁ ହତ୍ୟା କରିଦେଇଛନ୍ତି।
ଘଟଣାଟି ରଜଗ୍ରାମ ପୋଲିସ ଷ୍ଟେସନ ଅନ୍ତର୍ଗତ କାରୋଗ୍ରାମରେ ଘଟିଛି। ଅଭିଯୁକ୍ତ ଯୁବକ ୨୪ ବର୍ଷୀୟ ଜଣେ ଯୁବତୀଙ୍କ ସହ ଗତ ୪-୫ ମାସ ହେବ ଲିଭ୍ ଇନ୍ ରିଲେଶନଶିପ୍ରେ ରହୁଥିଲେ। ଏହି ସମୟ ମଧ୍ୟରେ ଯୁବତୀଜଣଙ୍କ ଗର୍ଭବତୀ ହୋଇଥିଲେ। ତେବେ ଉଭୟଙ୍କ ପାଖରେ ଟଙ୍କା ନ ଥିବାରୁ ଅଧିକାଂଶ ସମୟ ଝଗଡ଼ା ଲାଗିଥାଏ। ଗତକାଲି ଉଭୟଙ୍କ ମଧ୍ୟରେ କୌଣସି କାରଣ ଲାଗି ଝଗଡ଼ା ହୋଇଥିଲା। ଏଥିରେ ଯୁବକଜଣଙ୍କ ଯୁବତୀର ଗଳା ଚିପି ହତ୍ୟା କରିଥିଲା ବୋଲି ପୋଲିସ ପକ୍ଷରୁ କୁହାଯାଇଛି। ହତ୍ୟାକାଣ୍ଡ ପରେ ଯୁବକଜଣଙ୍କ ଘରର ତାଲା ପକାଇ ଥାନାରେ ପହଞ୍ଚିଥିଲେ। ସେଠାରେ ଉପସ୍ଥିତ କର୍ମଚାରୀଙ୍କୁ କାଗଜ ଓ କଲମ ମାଗି ଲେଖିଥିଲେ ଯେ, ସେ ଜଣେ ମାନସିକ ରୋଗୀ। ସେ ତାଙ୍କ ଲିଭ୍ ଇନ୍ ପାର୍ଟନରଙ୍କୁ ଗଳା ଚିପି ହତ୍ୟା କରିଛନ୍ତି। ଏଥିସହ ଯୁବକଜଣଙ୍କ ପୋଲିସକୁ ଘରର ଚାବି ଦେଇଥିଲା। ପୋଲିସ ଘରେ ପହଞ୍ଚି ଯୁବତୀଙ୍କ ଶବ ଉଦ୍ଧାର କରିବା ସହିତ ସଂପୃକ୍ତ ଯୁବକଙ୍କୁ ଗିରଫ କରିଛି।
