ଆରା, ୨୭।୭: ସମଗ୍ର ବିଶ୍ୱରେ କରୋନା ଭୟଙ୍କର ବିନାଶ ଘଟାଇ ଚାଲିଛି। କରୋନା ଆକ୍ରାନ୍ତଙ୍କ ସଂଖ୍ୟା ଦେଶରେ ଦ୍ରୁତ ଗତିରେ ବୃଦ୍ଧି ପାଉଥିବାବେଳେ ବିଭିନ୍ନ ସ୍ଥାନରେ ଏବେ ମଧ୍ୟ ଲକ୍ ଡାଉନ ଜାରି ରହିଛି। ଏହା ଦ୍ୱାରା ସିଧାସଳଖ ଗରିବ ଶ୍ରେଣୀର ଲୋକ ପ୍ରଭାବିତ ହୋଇଛନ୍ତି। ସେମାନେ ପେଟ ପୋଷିବା ପାଇଁ ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ଯାହାର ଏକ ଜ୍ୱଳନ୍ତ ଉଦାହରଣ ବିହାରର ଆରା ଜିଲାରେ ଦେଖିବାକୁ ମିଳିଛି। ଜଣେ ରିକ୍ସା ଚାଳକ କ୍ଷୁଧା ମେଣ୍ଟାଇବା ପାଇଁ ନିଜକୁ ଜୀବନ୍ତ ଶବ ଭଳି ଘୋଡ଼ାଇ ହୋଇ ରାସ୍ତା କଡ଼ରେ ଶୋଇପଡ଼ିଥିଲେ। ଫଳରେ ପାଖରେ ଯିବା ଆସିବା କରୁଥିବା ଲୋକ ଶବ ଭାବି ତାଙ୍କ ଉପରେ ପଇସା ପକାଇ ଯାଉଥିଲେ। ଏହିଭଳି ଭାବେ ରିକ୍ସା ଚାଳକ ଜଣଙ୍କ କିଛି ଟଙ୍କା ରୋଜଗାର କରିଥିବା ଜଣାପଡ଼ିଛି।
ନାମକ ଏହି ରିକ୍ସା ଚାଳକ ଜଣଙ୍କ କହିଛନ୍ତି, ବିହାରରେ ଲକ୍ ଡାଉନ୍ ଆରମ୍ଭ ହୋଇଯାଇଥିବା ହେତୁ ରୋଜଗାର କରିବା ତାଙ୍କ ପାଇଁ କଷ୍ଟସାଧ୍ୟ ହୋଇଯାଇଥିଲା। ଯାତ୍ରୀ ନ ମିଳିବାରୁ ପରିବାର ଲୋକଙ୍କୁ ଦୁଇ ଓଳି ଦୁଇମୁଠା ଖାଇବାକୁ ଦେଇପାରି ନ ଥିଲେ। ଶେଷରେ ବାଧ୍ୟ ହୋଇ ପୁରା ଶରୀରକୁ ଚାଦରରେ ଘୋଡ଼ାଇ ରାସ୍ତା କଡ଼ରେ ମୃତକଙ୍କ ଭଳି ପଡ଼ି ରହିଥିଲେ। ଏହା ଉପରେ ସେ ଫୁଲ ମାଳ ପକାଇ ପାଖରେ ଧୂପକାଠି ଜଳାଇ ଦେଇଥିଲେ। ଯିଏବି ଏହି ରାସ୍ତା ଦେଇ ଯିବା ଆସିବା କରୁଥିଲା ତାଙ୍କୁ ମୃତ ବ୍ୟକ୍ତି ଭାବି ପଇସା ପକାଇ ପଳାଉଥିଲେ। ଏହିଭଳି ଭାବେ ସେ କିଛି ଟଙ୍କା ରୋଜଗାର କରିଥିବା ରାମଦେବ କହିଛନ୍ତି।
