ପୁରୀ ଅଫିସ/ପିପିଲି (ସ୍ବ. ପ୍ର/ଡି.ଏନ.ଏ.),୨୭।୭: ପୁରୀ ଜିଲାରୁ ରେକର୍ଡ ସଂଖ୍ୟକ ପଜିଟିଭ ଚିହ୍ନଟ ହେଉଛନ୍ତି। ତେଣୁ ସଂକ୍ରମଣକୁ ରୋକିବା ପାଇଁ ପ୍ରଶାସନ ଏକାଧିକ ପଦକ୍ଷେପ ଗ୍ରହଣ କରିଛି। ସୀମା ସିଲ୍ ସହ ଜିଲାର ସବୁ ପ୍ରବେଶ ପଥରେ ଆସନ୍ତା ୩୧ ପର୍ଯ୍ୟନ୍ତ କଡ଼ା କଟକଣା ଲଗାଯାଇଛି। ହେଲେ ପ୍ରଶାସନିକ କଟକଣା ଓ ସୁରକ୍ଷା ବ୍ୟବସ୍ଥାକୁ ଚକ୍ମା ଦେଖାଇ ରବିବାର ଏକ କାର୍ ପୁରୀରେ ପହଞ୍ଚତ୍ଛି। ଯେଉଁଥିରେ ଲାଗିଛି ଏକ ନକଲି ପାସ୍ ଏବଂ ଏହି କାର୍ରେ ୩ ଅଣଓଡ଼ିଆ ଆସିଥିଲେ ବୋଲି କୁହାଯାଉଛି। ତେବେ ଏହା ଜଣାପଡ଼ିବା ପରେ କାର୍ଟି ଫେରିଯାଉଥିବାବେଳେ ତାହାକୁ ପିପିଲି ଟୋଲ୍ଗେଟରେ ପୋଲିସ ଜବତ କରିଛି। ଏଥିସହ ଡ୍ରାଇଭରଙ୍କୁ ଅଟକ ରଖିଛି। ମାତ୍ର ପୁରୀ ଆସିଥିବା ସମ୍ପୃକ୍ତ ୩ ଅଣଓଡ଼ିଆଙ୍କ ସମ୍ପର୍କରେ କୌଣସି ସୂଚନା ନାହିଁ।
ଭୋର ସମୟରେ ଏହି କାର୍ ପୁରୀ ଆସି ଶ୍ରୀମନ୍ଦିର ସମ୍ମୁଖରେ ଅଟକିଥିଲା। ଏଥିରେ ୩ଜଣ ଅଣଓଡ଼ିଆ ଥିଲେ। ସେମାନେ ହିନ୍ଦୀରେ କଥା ହେଉଥିଲେ। ଏ ନେଇ ପ୍ରଶାସନ ପାଖରେ ଖବର ପହଞ୍ଚତ୍ବା ଜାଣିବା ପରେ କାର୍ଟି ଭୁବନେଶ୍ୱର ଅଭିମୁଖେ ପଳାଇଥିଲା। ଏ ନେଇ ଉପଜିଲାପାଳ ଭବତାରଣ ସାହୁ ପିପିଲି ପୋଲିସକୁ ଜଣାଇ ଥିଲେ। ପିପିଲ ଟୋଲ୍ଗେଟ୍ରେ କାର୍କୁ ଅଟକାଯାଇ ଯାଞ୍ଚ କରାଯାଇଥିଲା। ସେଥିରେ ଲଗାଯାଇଥିବା କୋଭିଡ୍ ପାସ୍ ଡୁପ୍ଲିକେଟ ଥିବା ଜଣାପଡ଼ିଥିଲା। ତେଣୁ ସମ୍ପୃକ୍ତ କାର୍ ଜବତ କରାଯିବା ସହ ଚାଳକଙ୍କୁ ଅଟକ ରଖାଯାଇଛି। ଏ ନେଇ ଏକ ମାମଲା ରୁଜୁ କରାଯାଇ ତଦନ୍ତ ହେବ ବୋଲି ପିପିଲି ଥାନା ଆଇଆଇସି ଗୌରାଙ୍ଗ ଚରଣ ପୃଷ୍ଟି କହିଛନ୍ତି।
