ବମ୍ବେ: ଦୀର୍ଘ ୬ ମାସ ଧରି ଡିପ୍ରେସନରେ ଥିଲେ ବଲିଉଡ୍ ଅଭିନେତା ସୁଶାନ୍ତ ସିଂ ରାଜପୁତ। ଶେଷରେ ଆତ୍ମହତ୍ୟା କରିବାକୁ ସେ ବାଛିନେଇଥିଲେ। ପୋଷ୍ଟମର୍ଟମ ରିପୋର୍ଟରେ ମୃତ୍ୟୁର କାରଣ ଶ୍ୱାସରୁଦ୍ଧ ହେବା ସ୍ପଷ୍ଟ କରାଯାଇସାରିଛି। ତଥାପି ପୋଲିସ ପକ୍ଷରୁ ଘଟଣାର ବିଭିନ୍ନ ଦିଗକୁ ନେଇ ଯାଞ୍ଚ କରାଯାଉଛି। କେଉଁ କାରଣରୁ ସୁଶାନ୍ତ ଡିପ୍ରେସନରେ ଥିଲେ, ଆତ୍ମହତ୍ୟା କଲେ ତାହା ପୋଲିସ ଛାନଭିନ୍ କରୁଛି। ଏସବୁ ମଧ୍ୟରେ କାଠଗଡ଼ାରେ ପଶିଛି ୟଶରାଜ ଫିଲ୍ମସ୍। କମ୍ପାନୀର କାଷ୍ଟିଂ ନିର୍ଦ୍ଦେଶକ ଶାନୁ ଶର୍ମାଙ୍କୁ ପଚରାଉଚରା ପାଇଁ ପୋଲିସ ଡକାଇଛି।
ପୂର୍ବରୁ ସୁଶାନ୍ତଙ୍କ ପ୍ରେମିକା ରିୟା ଚକ୍ରବର୍ତ୍ତୀଙ୍କୁ ପୋଲିସ ପଚରାଉଚରା କରିଥିଲା। ସୁଶାନ୍ତ ୟଶରାଜ ଫିଲ୍ମସହ ଚୁକ୍ତି ବାତିଲ କରିଦେବା ସହ ରିୟାଙ୍କୁ ସେଭଳି କରିବାକୁ କହିଥିବା ପୋଲିସକୁ ସେ ଜଣାଇଥିଲେ। ଏହାପରେ ପୋଲିସ ୟଶରାଜର ପୂର୍ବ ପ୍ରଡକ୍ସନ୍ ହେଡ ତଥା ବର୍ତ୍ତମାନର ନେଟ୍ଫ୍ଲିକ୍ସର ନିର୍ଦ୍ଦେଶକ ଆଶିଷ ସିଂ ପୋଲିସ ନିକଟରେ ବୟାନ ରେକର୍ଡ କରିଥିଲେ। ତାଙ୍କୁ ୫ ଘଣ୍ଟା କାଳ ପୋଲିସ ପଚରାଉଚରା କରିଥିଲା। ତେବେ ଏହି ସମୟରେ ୟଶରାଜ ଏବଂ ସୁଶାନ୍ତଙ୍କ ମଧ୍ୟରେ କୌଣସି ସମସ୍ୟା ନ ଥିବା ସେ କହିଥିଲେ।
ଯାହା ସୂଚନା ରହିଛି, ଏହି ଘଟଣାରେ ପୋଲିସ ୨୫ରୁ ଅଧିକ ଲୋକଙ୍କୁ ପଚରାଉଚରା କରି ସାରିଲାଣି। ପରିବାରଲୋକଙ୍କୁ ଛାଡ଼ି ରିୟା, ବ୍ୟବସାୟ ମ୍ୟାନେଜର, ପିଆର୍ ମ୍ୟାନେଜର, କୁଶାଲ ଜାଭେରି ଆଦିଙ୍କ ବୟାନ ରେକର୍ଡ କରାଯାଇଛି।
