ଭୁବନେଶ୍ୱର,୨୪ା୬(ବ୍ୟୁରୋ): ଜମି ଦେବାକୁ କହି ୧୬ ଲକ୍ଷ ୮୦ ହଜାର ଟଙ୍କା ଠକେଇ କରିବା ଅଭିଯୋଗରେ ନୟାପଲ୍ଲୀ ଥାନା ପୋଲିସ ସାଇନାଥ ଇନ୍ଫ୍ରାଟେକ୍ ବିଲ୍ଡର ସଂସ୍ଥାର ମୁଖ୍ୟଙ୍କୁ ଗିରଫ କରିଛି। ସେ ହେଲେ ଚନ୍ଦ୍ରଶେଖରପୁର ଓଏସ୍ଏଚ୍ଜି କଲୋନୀ ପ୍ଲଟ ନଂ-ଏଚ୍ଆଇଜି ୧୭/୧ରେ ରହୁଥିବା ଉପେନ୍ଦ୍ର କୁମାର ସେନାପତି (୪୦)। ତାଙ୍କ ବିରୋଧରେ ଥାନାରେ ପୋଲିସ କେସ୍ ନଂ-୬୩୧/୧୯ ଦଫା ୪୨୦ ରୁଜୁ କରି କୋର୍ଟ ଚାଲାଣ କରିଛି।
ସୂଚନା ଅନୁଯାୟୀ, ଉପେନ୍ଦ୍ର ୨୦୧୪ରେ ନୟାପଲ୍ଲୀ ଆଇଆର୍ସି ଭିଲେଜ ଏନ୍-୪ରେ ସାଇନାଥ ଇନ୍ଫ୍ରାଟେକ୍ ନାମକ ଏକ ବିଲ୍ଡର ସଂସ୍ଥା ଖୋଲିଥିଲେ। ଏହି ସଂସ୍ଥା ସୁଲଭ ମୂଲ୍ୟରେ ଜମି ଯୋଗାଇ ଦେବା ପାଇଁ ଲୋଭନୀୟ ବିଜ୍ଞାପନ ଦେଇଥିଲେ। ମଞ୍ଚେଶ୍ୱର ଇଡକୋ କଲୋନୀର ହରିହର ପଟ୍ଟନାୟକ ଉକ୍ତ ସଂସ୍ଥା ସହ ଯୋଗାଯୋଗ କରିଥିଲେ। ଏହି ସଂସ୍ଥା ବାଲିଅନ୍ତାରେ ଏକ ଜମି ଦେବାକୁ କହି ୨୦୧୫ ମସିହାରେ ହରିହରଙ୍କଠାରୁ ୧୬ ଲକ୍ଷ ୮୦ ହଜାର ଟଙ୍କା ନେଇଥିଲେ। ଏହାପରେ ସମ୍ପୃକ୍ତ ସଂସ୍ଥା ଚୁକ୍ତି ଅନୁଯାୟୀ ଜମି ଯୋଗାଇ ନ ଥିଲେ। ଏନେଇ ୨୦୧୯ ଡିସେମ୍ବର ୧ରେ ହରିହର ନୟାପଲ୍ଲୀ ଥାନାରେ ଅଭିଯୋଗ କରିଥିଲେ। ପୋଲିସ ଏକ ମାମଲା ରୁଜୁ କରିବା ପରେ ବିଲ୍ଡର ଉପେନ୍ଦ୍ର ଫେରାର ହୋଇଯାଇଥିଲେ। ଦୀର୍ଘଦିନ ପରେ ସୋମବାର ଉପେନ୍ଦ୍ର ଚନ୍ଦ୍ରଶେଖରପୁରସ୍ଥିତ ଘରେ ଲୁଚିଥିବା ଖବର ପାଇ ପୋଲିସ ସେଠାରେ ଚଢାଉ କରିଥିଲା।
