ଲଦାଖ, ୧୬।୬: ଭାରତ ଚାଇନା ସୀମାରେ ଦୀର୍ଘ ୪୫ ବର୍ଷ ପରେ ପୁଣି ଥରେ ଗୁଳି ବିନିମୟ ହୋଇଛି। ଏହି ଘଟଣାରେ ଜଣେ କର୍ନଲ ଏବଂ ୨ ଜଣ ଯବାନ ଶହୀଦ ହୋଇଛନ୍ତି। ଚାଇନର ୩ ସୈନ୍ୟଙ୍କର ଏଥିରେ ମୃତ୍ୟୁ ଘଟିଥିବା କୁହାଯାଉଛି। ସୋମବାର ରାତିରେ ଲଦାଖର ଗଲଓ୍ବାଂ ଘାଟିରେ ଦୁଇପକ୍ଷ ମୁହାଁମୁହିଁ ହୋଇଥିଲେ। ଶେଷଥର ପାଇଁ ୧୯୭୫ ଅକ୍ଟୋବର ୨୦ରେ ଅରୁଣାଚଳପ୍ରଦେଶର ତୁଲୁଙ୍ଗ୍ ଲାଠାରେ ଭାରତ ଚାଇନା ସୈନ୍ୟ ମୁହାଁମୁହିଁ ହୋଇଥିଲେ। ଏଥିରେ ୪ ଭାରତୀୟ ଯବାନ ଶହୀଦ ହୋଇଥିଲେ। ୧୯୬୨ ଯୁଦ୍ଧ ପରେ ୧୯୬୭ରେ ସୀମାରେ ପୁଣି ଭାରତ ଏବଂ ଚାଇନା ମଧ୍ୟରେ ଗୁଳି ବିନିମୟ ହୋଇ ନ ଥିଲା। ତେବେ ପୁଣି ଏହାର ପୁନରାବୃତ୍ତି ହୋଇଛି। ୧୯୬୭ ସେପ୍ଟେମ୍ବର ୧୧ରେ ନାଥୁ-ଲାଠାରେ ଉଭୟ ପକ୍ଷ ମୁହାଁମୁହିଁ ହୋଇଥିଲେ। ଏହାପରେ ୧୯୬୭ ସେପ୍ଟେମ୍ବର ୧୫ରେ ଚୋ-ଲାଠାରେ ମଧ୍ୟ ଦୁଇପକ୍ଷଙ୍କ ମଧ୍ୟରେ ଗୁଳି ବିନିମୟ ଘଟିଥିଲା। ପରେ ସେହିବର୍ଷ ଅକ୍ଟୋବରରେ ବିବାଦ ଥମିଥିଲା। ନାଥୁ-ଲା ଘଟଣାରେ ଚାଇନାର ୩୨ ଜଣ ସୈନ୍ୟଙ୍କ ମୃତ୍ୟୁ ଘଟିଥିବାବେଳେ ଭାରତର ୬୫ ଜଣ ଯବାନ ଶହୀଦ ହୋଇଥିଲେ। ସେହିପରି ଚୋ-ଲା ଘଟଣାରେ ଭାରତର ୩୬ ଜଣ ଯବାନ ଶହୀଦ ହୋଇଥିଲେ। ସୂଚନାଯୋଗ୍ୟ, ଦୀର୍ଘଦିନ ଧରି ସୀମାକୁ ନେଇ ଦୁଇଦେଶ ମଧ୍ୟରେ ଉତ୍ତେଜନା ଲାଗି ରହିଛି। ଚଳିତ ବର୍ଷ ମେ ୫ରେ ଉଭୟ ପକ୍ଷ ପୂର୍ବ ଲଦାଖର ପୈଙ୍ଗୋଗ ହ୍ରଦଠାରେ ମୁହାଁମୁହି ହୋଇଥିଲେ। ସେହିପରି ମେ୯ ରେ ସିକିମ୍ର ୧୬ ହଜାର ଫୁଟ ଉଚ୍ଚରେ ଥିବା ନାକୁ-ଲା ସେକ୍ଟରରେ ଉଭୟ ପକ୍ଷର ୧୫୦ରୁ ଅଧିକ ସୈନ୍ୟ ପରସ୍ପରକୁ ଭେଟିଥିଲେ। ମେ ୯ରେ ଚାଇନା ଲଦାଖ ଅଞ୍ଚଳରେ ନିଜର ହେଲିକପ୍ଟର ଓ ଯୁଦ୍ଧ ବିମାନ ଉଡ଼ାଣ କରିଥିଲା।
