ନୂଆଦିଲ୍ଲୀ,୩୧।୫: କରୋନା ମହାମାରୀ ସାରା ବିଶ୍ୱର ବାଣିଜ୍ୟ କାରବାରକୁ ବହୁ ହାରରେ କ୍ଷତି ପହଞ୍ଚାଇଛି। ଏଥିଯୋଗୁ କମ୍ପାନୀଗୁଡିକ ଦେବାଳିଆ ହେବା ସହ ବୃହତ୍ ହାରରେ ଅନାଦାୟ ଋଣ(ଏନ୍ପିଏ) ବୃଦ୍ଧି ହେଉଥିବା ଦେଖାଯାଇଛି। ଏହି ସମସ୍ୟାକୁ ଧ୍ୟାନରେ ରଖି ଏକ ବ୍ୟାଡ୍ ବ୍ୟାଙ୍କ ସ୍ଥାପନ ନେଇ ଚର୍ଚ୍ଚା ଆରମ୍ଭ ହୋଇଛି। ସରକାର ଏବଂ ବିଭିନ୍ନ ନିୟାମକ ଏ ସମ୍ପର୍କରେ ପ୍ରାରମ୍ଭିକ ଆଲୋଚନା କରିଛନ୍ତି। ବର୍ତ୍ତମାନର ଚ୍ୟାଲେଞ୍ଜିଂ ସମୟରେ ସାମଗ୍ରୀ ଓ ସେବା ଟିକସ(ଜିଏସ୍ଟି) ନ ବଢ଼ାଇବା ଲାଗି ସରକାର ଚିନ୍ତା କରୁଛନ୍ତି। କାରଣ ଜିଏସ୍ଟି ବଢିଲେ ବିଭିନ୍ନ ସାମଗ୍ରୀ ଦର ବୃଦ୍ଧି ଘଟିବ ଏବଂ ଲୋକମାନେ ଏହାଦ୍ୱାରା ବିଭିନ୍ନ ସମସ୍ୟା ସାମ୍ନା କରିବେ। ବାଣିଜ୍ୟ ପରିଚାଳନାରେ ବିଭିନ୍ନ ସମସ୍ୟା ଉପୁଜୁଥିବାରୁ ଟିକସ ହ୍ରାସ ସମେତ ଅନ୍ୟ ପଦକ୍ଷେପ ନେବାକୁ କମ୍ପାନୀଗୁଡିକ ଦାବି କରୁଛନ୍ତି। ସେହିଭଳି ଲୋକଙ୍କ ନିକଟକୁ ପ୍ରତ୍ୟକ୍ଷ ଭାବେ ଅର୍ଥ ହସ୍ତାନ୍ତର ହେଲେ ଏହା ଚାହିଦା ବଢାଇବା ଦିଗରେ ଯୋଗଦାନ ରଖିବ। ହେଲେ ଏଭଳି କୌଣସି ପଦକ୍ଷେପ ସରକାର ବର୍ତ୍ତମାନ ଯାଏ ହାତକୁ ନେଇ ନାହାନ୍ତି। ଆସନ୍ତା ମାସରେ ଜିଏସ୍ଟି ବୈଠକ ବସିବାକୁ ଯାଉଛି। ବର୍ତ୍ତମାନ ଟିକସ ସଂଗ୍ରହ କମିଥିଲେ ମଧ୍ୟ ଜିଏସ୍ଟି ବଢିବ ନାହିଁ ବୋଲି ସରକାରଙ୍କ ଜଣେ ବରିଷ୍ଠ ଅଧିକାରୀ ସୂଚନା ଦେଇଛନ୍ତି। ଟିକସ ସଂଗ୍ରହ କମିଥିବା ବେଳେ ସରକାରଙ୍କୁ ଅଧିକ ଖର୍ଚ୍ଚ କରିବାକୁ ପଡୁଛି। ଫଳରେ ସରକାର ଅଧିକ ଋଣ କରିବାକୁ ଲକ୍ଷ୍ୟ ରଖିଛନ୍ତି।
