ପାଟନା,୯।୬: ବିହାର ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ଅଧ୍ୟକ୍ଷତାରେ ରବିବାର ପାଟନାରେ ଜେଡିୟୁର ରାଷ୍ଟ୍ରୀୟ କାର୍ଯ୍ୟକାରିଣୀ ବୈଠକ ଅନୁଷ୍ଠିତ ହୋଇଛି। ମୁଖ୍ୟମନ୍ତ୍ରୀଙ୍କ ବାସଭବନରେ ଅନୁଷ୍ଠିତ ଏହି ବୈଠକରେ ଏନ୍ଡିଏର ବିରୋଧି ମମତା ବାନାର୍ଜୀଙ୍କ ପାଇଁ ନିର୍ବାଚନ ରଣନୀତି ପ୍ରସ୍ତୁତ କରିବାକୁ ଯାଇ ଚର୍ଚ୍ଚାରେ ଥିବା ପ୍ରଶାନ୍ତ କିଶୋର ମଧ୍ୟ ଉପସ୍ଥିତ ଅଛନ୍ତି। ଏହାସହ ଦଳର ବରିଷ୍ଠ ନେତା ବଶିଷ୍ଠ ନାରାୟଣ ସିଂ, ପ୍ରବକ୍ତା କେସି ତ୍ୟାଗି, ପ୍ରଦେଶ ଅଧ୍ୟକ୍ଷ ଓ ଜିଲାଧ୍ୟକ୍ଷଙ୍କ ସହ ଅନ୍ୟ ନେତାମାନେ ଉପସ୍ଥିତ ଅଛନ୍ତି। ଆଲୋଚନା ହେଉଛି କି ଏହି ବୈଠକରେ ନୀତୀଶ କୁମାର କୌଣସି ବଡ ନିଷ୍ପତ୍ତି ନେଇପାରନ୍ତି। ସୂଚନାଯୋଗ୍ୟ, ଲୋକସଭା ନିର୍ବାଚନ ପରେ ଏହା ଜେଡିୟୁର ପ୍ରଥମ ବୈଠକ। ଏଥିରେ ପାର୍ଟିର ବିଭିନ୍ନ ମୁଦ୍ଦା ଉପରେ ଆଲୋଚନା କରାଯିବ। ଲୋକ ସଭା ନିର୍ବାଚନ ପରେ ଏବେ ଦଳର ନଜର ରହିବ ଆଗକୁ ହେବାକୁ ଥିବା ବିଧାନସଭା ନିର୍ବାଚନ ଉପରେ। ଏଥିରେ ଯଦି ପ୍ରଶାନ୍ତ ମମତାଙ୍କୁ ସମର୍ଥନ କରନ୍ତି ତେବେ ନୀତୀଶ ବୋଧହୁଏ ଏହାକୁ ଏଡାଇ ଯାଇ ପାରନ୍ତି ବୋଲି ଅନୁମାନ କରାଯାଉଛି।
