ସିଡ୍ନୀ, ୬।୨ (ପି.ଟି.)- ଅଷ୍ଟ୍ରେଲିଆ ବଶ୍ଫାୟାର (ଜଙ୍ଗଲ ପୋଡ଼ି) ଘଟଣାରେ କ୍ଷତିଗସ୍ତ ଲୋକଙ୍କ ପାଇଁ ଖେଳାଯିବାକୁ ଥିବା ଚ୍ୟାରିଟି କ୍ରିକେଟ୍ ମ୍ୟାଚ୍କୁ ମେଲବୋର୍ନ ଜନସନ୍ ଓଭାଲକୁ ଘୁଞ୍ଚାଇ ଦିଆଯାଇଛି। ପୂର୍ବରୁ ଏହା ସିଡ୍ନୀ କ୍ରିକେଟ୍ ଗ୍ରାଉଣ୍ଡ (ଏସ୍ସିଜି)ରେ ଶନିବାର ଖେଳାଯିବ ବୋଲି ସ୍ଥିର ହୋଇଥିଲା। କିନ୍ତୁ ଏହିଦିନ ସେଠାରେ ବର୍ଷା ହେବ ବୋଲି ପାଣିପାଗ ବିଭାଗ ପୂର୍ବାନୁମାନ କରିବାରୁ ଶେଷରେ ଏହାକୁ ମେଲବୋର୍ନକୁ ଘୁଞ୍ଚାଇ ନିଆଯାଇଛି। ଏବେ ଏହା ଶନିବାର ପରିବର୍ତ୍ତେ ରବିବାର ଖେଳାଯିବ। ଏହି ଚ୍ୟାରିଟି ମ୍ୟାଚ୍ର ନାମ ‘ବଶ୍ଫାୟାର କ୍ରିକେଟ୍ ବାସ୍’ ରଖାଯାଇଛି। ଏଥିରେ ଗୋଟିଏ ଟିମ୍ର ନେତୃତ୍ୱ ପୂର୍ବତନ ମହାନ୍ ଅଷ୍ଟ୍ରେଲିଆନ କ୍ରିକେଟର୍ ରିକି ପଣ୍ଟିଂ ନେଉଛନ୍ତି। ସେହିଭଳି ଅନ୍ୟ ଗୋଟିଏ ଟିମ୍ର ଦାୟିତ୍ୱ ପୂର୍ବତନ ଉଇକେଟ୍କିପର ଆଡାମ ଗିଲଖ୍ରିଷ୍ଟଙ୍କୁ ପ୍ରଦାନ କରାଯାଇଛି। ଅପରପକ୍ଷରେ ପଣ୍ଟିଂଙ୍କ ଦଳର କୋଚ୍ କିମ୍ବଦନ୍ତୀ ଭାରତୀୟ ବ୍ୟାଟ୍ସମ୍ୟାନ ସଚିନ ତେନ୍ଦୁଲକର ରହିଥିବାବେଳେ ଦୁର୍ଦ୍ଦର୍ଷ ଓ୍ବେଷ୍ଟଇଣ୍ଡିଜ ବୋଲର କଟର୍ନୀ ଓ୍ବାଲ୍ସ ଅନ୍ୟ ଦଳର ପ୍ରଶିକ୍ଷକ ରହିଛନ୍ତି। ପୂର୍ବରୁ ସେନ୍ ଓ୍ବାର୍ନେ ଗୋଟିଏ ଦଳର ନେତୃତ୍ୱ ନେବେ ବୋଲି ସ୍ଥିର ହୋଇଥିଲା। କିନ୍ତୁ ତାରିଖ ଘୁଞ୍ଚତ୍ ଯିବାରୁ ଓ୍ବାର୍ନେଙ୍କ ବଦଳରେ ଗିଲଖ୍ରୀଷ୍ଟଙ୍କୁ ନୂଆ ଅଧିନାୟକ ଦାୟିତ୍ୱ ପ୍ରଦାନ କରାଯାଇଛି। ଏକ ଟିଭି ଚ୍ୟାନେଲ ସହ ଭାଷ୍ୟକାର ଭାବେ ଜଡ଼ିତ ରହିଥିବାରୁ କାମ ପ୍ରାଧାନ୍ୟ ଲାଗି ଓ୍ବାର୍ନେ ଏହି ମ୍ୟାଚ୍ରୁ ଓହରି ଯାଇଛନ୍ତି ବୋଲି କ୍ରିକେଟ୍ ଅଷ୍ଟ୍ରେଲିଆ (ସିଏ) ପକ୍ଷରୁ କୁହାଯାଇଛି। ଏହି ମ୍ୟାଚ୍ରୁ ଯେତିକି ପାଣ୍ଠି ସଂଗୃହିତ ହେବ ତାହା ଅଷ୍ଟ୍ରେଲିଆନ୍ ରେଡ୍ କ୍ରସ ଡିଜାଷ୍ଟର ରିଲିଫ୍ ଆଣ୍ଡ୍ ରିକଭରି ପଣ୍ଡ୍କୁ ପ୍ରଦାନ କରାଯିବ ବୋଲି ନିଷ୍ପତ୍ତି ହୋଇଛି। ସେପ୍ଟେମ୍ବରରୁ ଅଷ୍ଟ୍ରେଲିଆ ଜଙ୍ଗଲରେ ଲାଗିଥିବା ଏହି ଭୟଙ୍କର ନିଆଁ ଯୋଗୁ ୩୩ ଜଣ ଲୋକ ପ୍ରାଣ ହରାଇଥିବାବେଳେ ହଜାର ହଜାର ଘର ନଷ୍ଟ ହୋଇଯାଇଛି। ଏହି ମ୍ୟାଚ୍କୁ ୧୦ ଓଭର ବିଶିଷ୍ଟ କରାଯାଇଥିବାବେଳେ ସେଥିରୁ ୫ ଓଭର ପାଓ୍ବାର ପ୍ଲେ ରହିବ।
