ବ୍ରହ୍ମପୁର ଅଫିସ,୩ା୨-ଭାରତୀୟ ଜୀବନ ବୀମା ନିଗମ (ଏଲଆଇସି)ରୁ ସରକାରଙ୍କ ଅଂଶଧନରୁ କିଛି ପ୍ରତିଶତ ଷ୍ଟକ୍ ବଜାର ମାଧ୍ୟମରେ ତଥା ଆଇପିଓ ରୂପେ ବିକ୍ରି କରାଯିବା ଲୋକ ସଭାରେ ଅର୍ଥମନ୍ତ୍ରୀ ଆଗତ କରିଥିବା ୨୦୨୦-୨୧ ଆର୍ଥିକ ବର୍ଷର ବଜେଟରେ ସୂଚାଇଛନ୍ତି। କେନ୍ଦ୍ର ସରକାରଙ୍କ ଏହି ନିଷ୍ପତ୍ତିକୁ ଜୀବନ ବୀମା ନିଗମ ଉନ୍ନୟନ ଅଧିକାରୀ ସଂଘ ବ୍ରହ୍ମପୁର ମଣ୍ଡଳ ଶାଖା ବିରୋଧ କରିଛି। ଆଗାମୀ ଦିନରେ ଅଧିକ ଅଂଶଧନ ବିକ୍ରି କରାଯିବାର ଏହା ଚକ୍ରାନ୍ତ ହୋଇଥିବା ଆଶଙ୍କା କରାଯାଇଛି। ଏହାର ପ୍ରତିବାଦରେ ଆସନ୍ତା ୪ ତାରିଖ ମଧ୍ୟାହ୍ନରେ ମଣ୍ଡଳ ଅଫିସ ଆଗରେ ଆନ୍ଦୋଳନ କରାଯିବାର ନିଷ୍ପତ୍ତି ନିଆଯାଇଛି। ସୋମବାର ମଧ୍ୟାହ୍ନରେ ମଧ୍ୟ ବିକ୍ଷୋଭ କରାଯିବାର କୁହାଯାଇଛି। ମଣ୍ଡଳ ଶାଖା ସମ୍ପାଦକ ପ୍ରଭାକର ନାହାକ ରବିବାର ଏ ସମ୍ପର୍କରେ ସୂଚାଇଛନ୍ତି। କେନ୍ଦ୍ର ସରକାରଙ୍କ ଏଭଳି ନିଷ୍ପତ୍ତି ଦ୍ୱାରା ଏଲଆଇସିର ମୂଳ ନିଷ୍ପତ୍ତିକୁ ବିକାଶ କରିବ ଓ ବୀମା ପଲିସିଧାରୀଙ୍କ ଭାବାବେଗକୁ ଆଘାତ ଦେବ। ସେମାନଙ୍କ ଆତ୍ମବିଶ୍ୱାସରେ ନାନା ଦ୍ୱନ୍ଦ୍ୱ ସୃଷ୍ଟି ହେବ। ଏକ ଲାଭଜନକ ସଂସ୍ଥାରୁ ଅଂଶଧନ ବିକ୍ରି ପାଇଁ ମୋଦି ସରକାରଙ୍କ ପଦକ୍ଷେପକୁ ନିନ୍ଦା ମଧ୍ୟ କରିଛନ୍ତି ମଣ୍ଡଳ ସମ୍ପାଦକ। ସରକାର ନିଷ୍ପତ୍ତିର ପୁନଃ ବିଚାର କରିବା ପାଇଁ ମଣ୍ଡଳ ଶାଖା ଦାବି କରିଛି।
