ରାହାମା,୬।୧ (ଡି.ଏନ୍.ଏ.): ରାହାମା ନିୟନ୍ତ୍ରିତ ବଜାର କମିଟି (ଆର୍ଏମ୍ସି) ନାନା ଅବ୍ୟବସ୍ଥା ମଧ୍ୟରେ ଗତି କରୁଛି। ପରିଚାଳନାଗତ ତ୍ରୁଟି ଯୋଗୁ ନାନା ଅସୁବିଧା ସୃଷ୍ଟି ହେଉଥିବା ଅଭିଯୋଗ ହେଉଛି। ଆର୍ଏମ୍ସି ଅଧ୍ୟକ୍ଷ ଓ ଉପାଧ୍ୟକ୍ଷ ବଜାର ପରିଚାଳନା କ୍ଷେତ୍ରରେ ଗୁରୁତ୍ୱ ଦେଉ ନ ଥିବାବେଳେ ଜଣେ କିରାଣି ସମସ୍ତ ଦାୟିତ୍ୱ ତୁଲାଉଛନ୍ତି। ପାରାଦୀପ ଅତିରିକ୍ତ ଜିଲାପାଳ କାହ୍ନୁଚରଣ ଧୀର୍ ଆର୍ଏମ୍ସିର ଅଧ୍ୟକ୍ଷ ଦାୟିତ୍ୱରେ ଥିବା ବେଳେ ଶ୍ରମିକନେତା ଇଂ. ସୁଧାକର ମନ୍ତ୍ରୀଙ୍କୁ ଉପାଧ୍ୟକ୍ଷ ଦାୟିତ୍ୱ ମିଳିଛି। ହେଲେ ଅଧ୍ୟକ୍ଷ ଧୀର୍ କମିଟିର ପରିଚାଳନା କ୍ଷେତ୍ରରେ ସେତେଟା ଦୃଷ୍ଟି ଦେଇପାରୁନାହାନ୍ତି। ଅନ୍ୟପଟେ ଉପାଧ୍ୟକ୍ଷ ମନ୍ତ୍ରୀ ସ୍ବାସ୍ଥ୍ୟଗତ କାରଣରୁ ଏଠାକୁ କୌଣସି ଦିନ ଆସୁ ନଥିବା ସ୍ଥାନୀୟ ଲୋକେ କହିଛନ୍ତି। ତେଣୁ ଆର୍ଏମ୍ସି କାର୍ଯ୍ୟାଳୟ ଏବେ ଜଣେ କିରାଣି ଓ ଜଣେ ଚପରାସୀଙ୍କ ଦ୍ୱାରା ପରିଚାଳିତ ହେଉଛି। କିରାଣି ଜଣକ ଘରଭଡ଼ା ଆଦାୟଠାରୁ ଆରମ୍ଭ କରି ସଭାସମିତି ପରିଚାଳନା ଦାୟିତ୍ୱ ଓ ଅଫିସ କାଗଜପତ୍ର କାମ କରୁଛନ୍ତି। ଜଣେ ବ୍ୟକ୍ତିଙ୍କ ଉପରେ ସମସ୍ତ ଦାୟିତ୍ୱ ଦିଆଯାଇଥିବାରୁ ଅଧିକାଂଶ ଦିନ କାର୍ଯ୍ୟାଳୟ ବନ୍ଦ ରହୁଥିବା ସାଧାରଣରେ ଆଲୋଚନା ହେଉଛି॥
ଅପରପକ୍ଷେ ପରିଚାଳନା ପରିଷଦର ୧୬ ସଦସ୍ୟଙ୍କ ମଧ୍ୟରୁ ବିଭୂତି ରଞ୍ଜନ ପଣ୍ଡା, କୃଷ୍ଣ ଚନ୍ଦ୍ର ଦାସ ଓ ଚିତ୍ତରଞ୍ଜନ ମିଶ୍ରଙ୍କର ଇତିମଧ୍ୟରେ ଦେହାନ୍ତ ହୋଇଯାଇଥିଲେ ବି ସେମାନଙ୍କ ନାମ ସଦସ୍ୟ ଫଳକରୁ ହଟାଯାଇନାହିଁ। ଫଳରେ କାର୍ଯ୍ୟାଳୟର ଗୁରୁତ୍ୱପୂର୍ଣ୍ଣ ସଭା, ସମିତି ସମୟରେ ସେମାନଙ୍କ ଗସ୍ତ ଖର୍ଚ୍ଚ ବାବଦରେ ଆସୁଥିବା ଟଙ୍କାକୁ ହଡ଼ପ କରାଯାଉଥିବା ଅଭିଯୋଗ ହୋଇଛି। ଏତଦ୍ବ୍ୟତୀତ ପ୍ରତି ୨ ବର୍ଷରେ ଥରେ ସଦସ୍ୟ ଚୟନ ପାଇଁ ମନୋନୟନ ପ୍ରକ୍ରିୟା କରାଯିବାକୁ ନିୟମ ଥିଲେ ବି ଆରମ୍ଭରୁ ଯେଉଁମାନେ ସଦସ୍ୟ ଥିଲେ, ସେମାନଙ୍କୁ କେଉଁ ନିୟମ ବଳରେ ଏଯାବତ୍ ସଦସ୍ୟ ରଖାଯାଇଛି, ସେ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ସେହିପରି ଜଣେ କର୍ମଚାରୀ ଗୋଟିଏ ସ୍ଥାନରେ ୩ ବର୍ଷରୁ ଅଧିକ ସମୟ ରହିପାରିବେ ନାହିଁ ବୋଲି ନିୟମ ରହିଛି। କିନ୍ତୁ ରାହାମା ନିୟନ୍ତ୍ରିତ ବଜାର କମିଟି ଆରମ୍ଭରୁ ଅବସ୍ଥାପିତ ଥିବା ଜଣେ କିରାଣି ଓ ଚପରାସୀଙ୍କୁ ଅନ୍ୟତ୍ର ବଦଳି କରାଯାଇନାହିଁି, ଯାହା ବିଭାଗୀୟ କର୍ତ୍ତୃପକ୍ଷଙ୍କ କାର୍ଯ୍ୟ ଦକ୍ଷତା ପ୍ରତି ପ୍ରଶ୍ନବାଚୀ ସୃଷ୍ଟି କରିଛି।
ଏ ସମ୍ପର୍କରେ ଆର୍ଏମ୍ସି ସମ୍ପାଦକ ଶାଶ୍ୱତ ଦାସଙ୍କୁ ପଚାରିବାରେ ଲୋକାଲ୍ ଆରଏମ୍ସିରେ ପୋଷ୍ଟିଂ ହୋଇଥିବା କର୍ମଚାରୀଙ୍କର ଅନ୍ୟତ୍ର ବଦଳିନାହିଁ। ୨ ବର୍ଷରେ ଥରେ ମନୋନୟନ କମିଟି ବସିବା କଥା, କିନ୍ତୁ ବସିନାହିଁ। ଏ ନେଇ ଜିଲାପାଳ ଓ ଅଧ୍ୟକ୍ଷଙ୍କୁ ଜଣାଇଛି ବୋଲି ସମ୍ପାଦକ ଦାସ କହିଛନ୍ତି।
