ଭୁବନେଶ୍ୱର,୧୩ା୧୨(ବ୍ୟୁରୋ):ବିବାହିତ ଦମ୍ପତିଙ୍କ ମଧ୍ୟରେ ଅସୁରକ୍ଷିତ ଭାବନା ଦିନକୁ ଦିନ ବଢ଼ିବାରେ ଲାଗିଛି। ଏପରି କି ନିଜ ଜୀବନସାଥିଙ୍କ ଉପରେ ଲୋକଙ୍କ ଭରସା କମିଯାଉଥିବା ବେଳେ ନିଜ ସନ୍ଦେହ ଦୂରକରିବା ପାଇଁ ସେମାନେ ଯାଞ୍ଚ ଆବଶ୍ୟକ କରୁଛନ୍ତି। ୪୫% ଭାରତୀୟ ନିଜ ଜୀବନସାଥୀଙ୍କ ଅନୁମତି ବିନା ତଥା ଅଗୋଚରରେ ସେମାନଙ୍କ ଫୋନ ଯାଞ୍ଚ କରିବା ପାଇଁ ଚାହଁୁଛନ୍ତି। ୫୫% ଏହା ଆଗରୁ କରିସାରିଥିବା ସ୍ବୀକାର କରିଛନ୍ତି। ସବୁଠାରୁ ବଡ଼କଥା ହେଲା ଭୁବନେଶ୍ୱର ମଧ୍ୟ ଏ କ୍ଷେତ୍ରରେ ପଛରେ ପଡ଼ିନି। ଭୁବନେଶ୍ୱରରେ ୫୬% ଲୋକ ନିଜ ଜୀବନସାଥୀଙ୍କ ଅଗୋଚରରେ ତାଙ୍କ ଫୋନ୍ ଚେକ୍ କରିଥିବା କହିଛନ୍ତି। ସେହିଭଳି ୨୪% ଲୋକ ସେମାନଙ୍କ ଜୀବନସାଥୀ ତାଙ୍କୁ ଧୋକା ଦେଉଥିବା ବିଶ୍ୱାସ କରୁଛନ୍ତି। ମାଇଣ୍ଡଶେୟାର ଏବଂ ୟୁନୋମୋ ସହଯୋଗରେ ନିକଟରେ ହଟ୍ଷ୍ଟାର୍ ପକ୍ଷରୁ କରାଯାଇଥିବା ଏକ ସ୍ବତନ୍ତ୍ର ଅଧ୍ୟୟନରୁ ଏହି ତଥ୍ୟ ସାମ୍ନାକୁ ଆସିଛି।
ବିଶ୍ୱାସଘାତକତାରେ ଭାରତୀୟମାନଙ୍କ ଦୃଷ୍ଟିକୋଣର ଅନୁସନ୍ଧାନ କରିବାକୁ କରାଯାଇଥିବା ଏହି ସର୍ଭେରେ ଭାରତରେ ବୈବାହିକ ସମ୍ପର୍କରେ ଆସୁଥିବା ପରିବର୍ତ୍ତନ ଓ ଜୀବନସାଥୀଙ୍କ ମଧ୍ୟରେ ରହିଥିବା ବିଶ୍ୱସନୀୟତାର ମହତ୍ତ୍ୱକୁ ଜାଣିବାକୁ ଚେଷ୍ଟା କରାଯାଇଥିଲା। ଭାରତର ପ୍ରାୟ ପ୍ରତ୍ୟେକ ବୟସଗୋଷ୍ଠୀ ଏବଂ ସହରଗୁଡ଼ିକରେ ଦମ୍ପତିିମାନଙ୍କ ଚିନ୍ତାଧାରାକୁ ଜାଣିବା ପାଇଁ ପ୍ରୟାସ କରାଯାଇଥିବା ବେଳେ ଏଥିରେ ଭୁବନେଶ୍ୱର ବାସିନ୍ଦାଙ୍କ କିଛି ପ୍ରମୁଖ ଦୃଷ୍ଟିକୋଣକୁ ମଧ୍ୟ ଆଲୋକପାତ କରାଯାଇଛି। ଏହାକୁ ହଟ୍ଷ୍ଟାର ‘ଆଉଟ୍ ଅଫ୍ ଲଭ୍’ ସର୍ଭେ ମଧ୍ୟ କୁହାଯାଉଛି।
