ଭୁବନେଶ୍ୱର, ୧୩ା୧୨(ବ୍ୟୁରୋ):ଆରମ୍ଭ ହୋଇଯାଇଛି କ୍ରିସ୍ମାସ ପ୍ରସ୍ତୁତି। ବଡ଼ଦିନକୁ ଆଉମାତ୍ର କିଛିଦିନ ବାକି ରହିଥିବାବେଳେ ଚାରିଆଡେ ଉତ୍ସବର ମାହୋଲ ଦେଖିବାକୁ ମିଳିଲାଣି। ସହରର ଛକ, ବଜାରରେ କ୍ରିସ୍ମାସ ପାଇଁ ଆକର୍ଷଣୀୟ ସାମଗ୍ରୀକୁ ନେଇ ଖୋଲିଲାଣି ଏକାଧିକ ସିଜିନ ସେଣ୍ଟର। ସେହିପରି ବଡ଼ ବଡ଼ ସପିଂ ମଲ୍ମାନଙ୍କରେ କ୍ରିସ୍ମାସ ପାଇଁ ଆକର୍ଷଣୀୟ ଉପହାର ସାମଗ୍ରୀ, ଦାମୀ ଚକୋଲେଟ୍ ଆଦି ଉପଲବ୍ଧ ହେଲାଣି। ଏହାସହ ବଜାରରେ ଉପଲବ୍ଧ ଭଳିକି ଭଳି କ୍ରିସ୍ମାସ କେକ୍ ଗ୍ରାହକଙ୍କ ପାଇଁ ପ୍ରମୁଖ ଆକର୍ଷଣ ପାଲଟିଛି।
ବିଭିନ୍ନ ଡିଜାଇନ୍ର କ୍ରିସ୍ମାସ କାର୍ଡ ସହ କ୍ୟାଣ୍ଡେଲ, ସାଣ୍ଟା ଟୟ, ସ୍ନୋ ମ୍ୟାନ୍, କ୍ରିସ୍ମାସ ଲ୍ୟାମ୍ପ, କ୍ରିସ୍ମାସ ବେଲ୍, କ୍ରିସ୍ମାସ ଟ୍ରି ଗ୍ରାହକଙ୍କ ପାଇଁ ଆକର୍ଷଣ ସାଜୁଛି। କ୍ରିସ୍ମାସକୁ ନେଇ ରାଜଧାନୀରେ ପ୍ରବଳ ଉତ୍କଣ୍ଠା ଦେଖିବାକୁ ମିଳୁଥିବା ବେଳେ ୟୁନିଟ୍-୧ ମାର୍କେଟ, ଜୟଦେବ ବିହାର ରୋଡ୍ ଓ ସତ୍ୟନଗର ଚର୍ଚ୍ଚ ନିକଟରେ ଖୋଲିଥିବା କ୍ରିସ୍ମାସ ସିଜିନ ସେଣ୍ଟରଗୁଡିକରେ ଏବେଠାରୁ ପ୍ରବଳ ଭିଡ଼ ଦେଖାଯାଉଛି। ଚଳିତବର୍ଷ କ୍ରିସ୍ମାସ ଟ୍ରି ପ୍ରସ୍ତୁତ କରିବା ପାଇଁ ଭଳିକି ଭଳି ପେପର ଅର୍ନାମେଣ୍ଟ ସହ ଆର୍ଟିଫିସିଆଲ ପାଇନ ଟ୍ରି, ହ୍ୟାଙ୍ଗିଙ୍ଗ ଲ୍ୟାମ୍ପ୍, ଗୋଲ୍ଡେନ ବଲ୍ବ, ରଙ୍ଗିନ ତାରାର ଅଧିକ ଡିମାଣ୍ଡ ରହିଛି। ଏଥର ପ୍ଲାଷ୍ଟିକ୍ ଉପରେ କଟକଣା ଲାଗିଥିବାରୁ ବ୍ୟବହାର ଉପଯୋଗୀ ପ୍ଲାଷ୍ଟିକ୍କୁ ନେଇ ଟ୍ରି ଓ ଅନ୍ୟାନ୍ୟ ସାମଗ୍ରୀ ପ୍ରସ୍ତୁତ କରାଯାଇଛି। ଆଗରୁ ବଜାରରେ ସାଧାରଣ ସାଣ୍ଟାକ୍ଲଜ୍ କଣ୍ଡେଇ ମିଳୁଥିବା ବେଳେ ଏବେ ବ୍ୟାଟେରୀ ଚାଳିତ ଅତ୍ୟାଧୁନିକ ସାଣ୍ଟାକ୍ଲଜ୍ ଆସୁଛି। ବ୍ୟାଟେରୀ ଚାଳିତ ଡ୍ୟାନ୍ସିଂ ସାଣ୍ଟା, ତାଇୱାନ୍ କ୍ରିସ୍ମାସ ଟ୍ରି, ସାଣ୍ଟା ଲ୍ୟାଡର, କ୍ରିସ୍ମାସ କୁସନ୍ ଏବଂ ସେନ୍ସର କ୍ୟାଣ୍ଡେଲ ଭଳି ଭିନ୍ନ ଧରଣର ଉପହାର ନେବାକୁ ଲୋକେ ଆଗ୍ରହ ଦେଖାଉଛନ୍ତି। ସେହିଭଳି ଏଥର କ୍ରିସ୍ମାସ ଗିଫ୍ଟରେ ରହିଛି ଡ୍ରାଏଫ୍ରୁଟ୍ସ, ଚକୋଲେଟ୍, ଫ୍ରୁଟ୍ସ ଭଳି ବିଭିନ୍ନ ସ୍ବାସ୍ଥ୍ୟକର ଖାଦ୍ୟକୁ ନେଇ ପ୍ରସ୍ତୁତ ସ୍ବତନ୍ତ୍ର ବାସ୍କେଟ୍। ଲୋକେ ନିଜ ପସନ୍ଦ ମୁତାବକ ଏହି ବାସ୍କେଟକୁ କଷ୍ଟମାଇଜ୍ଡ କରି ନିଜ ବନ୍ଧୁ ପରିଜନଙ୍କୁ ଉପହାର ଦେଇପାରିବେ।
