ଢେଙ୍କାନାଳ ଅଫିସ, ୬।୧୨
ଢେଙ୍କାନାଳ ଜିଲା ଗଁଦିଆ ବ୍ଲକ ବେଗା ପଞ୍ଚାୟତରେ ବିନା କାର୍ଯ୍ୟରେ ୧୦ ଲକ୍ଷରୁ ଊର୍ଦ୍ଧ୍ୱ ଟଙ୍କାର ମିଥ୍ୟା ବିଲ୍ କରାଯାଇଥିବା ଅଭିଯୋଗ ହୋଇଛି। ବାରମ୍ବାର ଦାବି ସତ୍ତ୍ୱେ ଅଭିଯୁକ୍ତଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉନାହିଁ। ଏହାର ପ୍ରତିବାଦରେ ପଞ୍ଚାୟତ ଉନ୍ନୟନ କମିଟି ସଭାପତି ଜୟନ୍ତ କୁମାର ନାୟକ, ନାଏବ ସରପଞ୍ଚ ଅଞ୍ଜନ ପାଢୀ, ୱାର୍ଡ ସଭ୍ୟ ହରଷ ନାୟକ ଗୁରୁବାର ଜିଲାପାଳଙ୍କୁ ଭେଟି ତଦନ୍ତ ଦାବି କରିଛନ୍ତି। ଏ ଦିଗରେ ପ୍ରଶାସନ ବିହିତ ପଦକ୍ଷେପ ଗ୍ରହଣ ନ କଲେ ୧୨ ତାରିଖରେ ପଞ୍ଚାୟତ କାର୍ଯ୍ୟାଳୟ ଘେରାଉ କରିବାକୁ ଅଭିଯୋଗକାରୀମାନେ ଲିଖିତ ଭାବେ ଜଣାଇଛନ୍ତି। ଏ ନେଇ ରାଜ୍ୟପାଳ, ୫-ଟି ସଚିବ, ସ୍ବତନ୍ତ୍ର ସଚିବ, ଅତିରିକ୍ତ ଜିଲାପାଳ ଏବଂ ପିଡି ଡିଆରଡିଏଙ୍କୁ ଲିଖିତ ଭାବେ ଅବଗତ କରାଯାଇଛି।
ଅଭିଯୋଗ ଅନୁଯାୟୀ, ପଞ୍ଚାୟତରେ ଅଯୋଗ୍ୟ ହିତାଧିକାରୀଙ୍କୁ ବାର୍ଦ୍ଧକ୍ୟଭତ୍ତା ତାଲିକାରେ ସାମିଲ କରାଯାଇଛି। ପାରିବାରିକ ସ୍ବାର୍ଥ ପାଇଁ ସମ୍ପର୍କୀୟଙ୍କୁ ଫନି ସହାୟତା ପ୍ରଦାନ କରାଯାଇଛି। କରଡ଼ାବଣି ଗ୍ରାମରେ ଡ୍ରେନ୍ ନ ଥାଇ ନର୍ଦ୍ଦମା ସଫା କରିବା ଲାଗି ୧୦ ହଜାର ଟଙ୍କା ମଞ୍ଜୁର ହୋଇଛି। ବେଗା ଗ୍ରାମ ପଞ୍ଚାୟତ ହାଇସ୍କୁଲରେ କିଛି କାମ ନ ହୋଇ ୧ଲକ୍ଷ ୫୦ହଜାର ଏବଂ ପଞ୍ଚାୟତ ଅଫିସ ରକ୍ଷଣାବେକ୍ଷଣ ପାଇଁ ୧ଲକ୍ଷ ୧୧ ହଜାର, ପଞ୍ଚାୟତ ପାଚେରି ନିର୍ମାଣ ପାଇଁ ଅଗ୍ରିମ ୧ଲକ୍ଷ ୫୦ହଜାର, ପାଞ୍ଚକେନ୍ଦୁ ମହାଦେବ ପୋଖରୀ ପାଇଁ ୨ଲକ୍ଷ, ପାଞ୍ଚକେନ୍ଦୁ କୋଠଘର ପାଇଁ ୨ଲକ୍ଷ ଟଙ୍କାର ବିଲ କରାଯାଇଛି। ଅଭିଯୋଗର ଉଚ୍ଚସ୍ତରୀୟ ତଦନ୍ତ କରାଗଲେ ଏଥିରେ ସମ୍ପୃକ୍ତ ଅଭିଯୁକ୍ତଙ୍କ କଳାକାରନାମା ପଦାକୁ ଆସିବ ବୋଲି ଅଭିଯୋଗକାରୀମାନେ କହିଛନ୍ତି।
ଏ ନେଇ ପିଡି ଡିଆର୍ଡିଏ ନରୋତ୍ତମ ବେହେରା କୁହନ୍ତି, ଅଭିଯୋଗର ତଦନ୍ତ କରାଯିବ। ଅତିରିକ୍ତ ପ୍ରକଳ୍ପ ନିର୍ଦ୍ଦେଶକ, ବୈଷୟିକ ଇଞ୍ଜିନିୟର ଏବଂ ଜିଲା ପଞ୍ଚାୟତ ଅଧିକାରୀଙ୍କ ଉପରେ ତଦନ୍ତ ଦାୟିତ୍ୱ ନ୍ୟସ୍ତ କରାଯାଇଛି।
