ଲକ୍ଷ୍ନୌ,୧୯।୧୧: ଅଯୋଧ୍ୟାରେ ରାମମନ୍ଦିର ନିର୍ମାଣ ପାଇଁ ସୁପ୍ରିମ୍କୋର୍ଟଙ୍କ ପକ୍ଷରୁ ରାୟ ଦିଆଯାଇଛି। ଅଯୋଧ୍ୟା ନିକଟରେ ଥିବା ପୁରା ବଜାର ବ୍ଲକ୍ ଏବଂ ଏହାର ଆଖପାଖ ଅଞ୍ଚଳର ୧୦୫ଟି ଗାଁର ସୂର୍ଯ୍ୟବଂଶୀ ରାଜପୁତ ଏବେ ପୁଣିଥରେ ମୁଣ୍ଡରେ ପଗଡ଼ି ବାନ୍ଧିବା ସହିତ ପାଦରେ ଚମଡ଼ା ଜୋତା ପିନ୍ଧିବେ। ସେମାନେ ରାମମନ୍ଦିର ନିର୍ମାଣ ସଂକଳ୍ପ କରି ଗତ ୫ ଶହ ବର୍ଷ ଧରି ପଗଡ଼ି ଏବଂ ଜୋତା ବ୍ୟବହାର କରୁ ନ ଥିଲେ। ଏହି ରାଜପୁତମାନେ ନିଜକୁ ରାମଙ୍କ ବଂଶଧର ବୋଲି କହିଥାନ୍ତି। ସୂଚନାଯୋଗ୍ୟ,୧୬ ଶତାବ୍ଦୀରେ ରାମମନ୍ଦିର ନିର୍ମାଣ ନେଇ ତତ୍କାଳୀନ ଶାସକ ଠାକୁର ଗଜରାଜ ସିଂ ମୋଗଲଙ୍କ ବିରୋଧରେ ଯୁଦ୍ଧ କରିଥିଲେ। ତେବେ ଏଥିରେ ପରାଜିତ ହେବାରୁ ସେ ପଗଡ଼ି ଓ ଜୋତା ନ ପିନ୍ଧିବାକୁ ମନସ୍ଥ କରିଥିଲେ ବୋଲି ରାଜପୁତମାନେ କୁହନ୍ତି।
