ନୂଆଦିଲ୍ଲୀ,୨୭।୫: ଭାଜପା ଅଧ୍ୟକ୍ଷ ଅମିତ ଶାହ ୫୦ ବର୍ଷ ବୟସରେ ଦଳର ଅଧ୍ୟକ୍ଷ ପଦ ସମ୍ଭାଳି ଥିବାରୁ ତାଙ୍କୁ ସବୁଠାରୁ ଯୁବ ଅଧ୍ୟକ୍ଷ ବୋଲି କୁହାଯାଏ। କେବଳ ସେତିକି ନୁହେଁ ସେ ଭାଜପାର ପରାମର୍ଶଦାତା ଭାବେ ମଧ୍ୟ ବେଶ୍ ପରିଚିତ। ୨୦୧୪ରୁ ୨୦୧୯ ପର୍ଯ୍ୟନ୍ତ ତାଙ୍କ ରଣନୀତି ବେଶ୍ ଭଲ କାମ କରିଥିବା ବେଳେ ଦଳ ବିପୁଳ ସଂଖ୍ୟାରେ ବିଜୟ ଲାଭ କରିଛି। ୨୦୧୪ରେ ଶାହ ଉତ୍ତର ପ୍ରଦେଶରେ ସାଧାରଣ ନିର୍ବାଚନରେ ମାଟ ୮୦ ଆସନରୁ ଭାଜପାକୁ ଦେଇଥିଲେ ୭୩। ସେହିଭଳି ୨୦୧୯ରେ ମଧ୍ୟ ଦଳର ପରାମର୍ଶ ଦାତା, ପ୍ରାର୍ଥୀ ଚୟନ ଏମିତିକି ପ୍ରଚାର ଭଳି ମୁଖ୍ୟ ଦାୟିତ୍ୱ ନେଇ ଭାଜପାକୁ ବିଜୟ ଆଣି ଦେଇଥିବା କୁହାଯାଏ। ସେଥିପାଇଁ ମୋଦିଙ୍କ ପରେ ତାଙ୍କୁ ଭାଜପାର ବଡ ନେତାଭାବେ ଗ୍ରହଣ କରାଯାଏ। ୧୯୬୪ରେ ଜନ୍ମ ନେଇଥିବା ଶାହଙ୍କ ପରିବାରରେ କେହି ସକ୍ରିୟ ରାଜନୀତିରେ ନ ଥିବା ବେଳେ ମାତ୍ର ୧୪ ବର୍ଷ ବୟସରେ ସେ ରାଷ୍ଟ୍ରୀୟ ସ୍ବୟଂ ସେବକ ସଙ୍ଘରେ ଯୋଗ ଦେଇଥିଲେ। ଆଉ ୧୭ ବର୍ଷ ବୟସରେ ସେ ମୋଦିଙ୍କ ସହ ଭେଟ ହୋଇଥିଲେ। ୨୨ ବର୍ଷ ବୟସରେ ଭାଜପାରେ ସାମିଲ ହେବା ସହ ୩୫ ବର୍ଷ ବୟସରେ ମନ୍ତ୍ରୀ ଓ ୫୦ ବର୍ଷରେ ଦଳର ଅଧ୍ୟକ୍ଷ ପଦ ସମ୍ଭାଳିଲେ। ସେ ପ୍ରଥମ ଥର ୧୯୮୮ରେ ପ୍ରାଇମେରୀ କୋଅପରେଟିଭ୍ ବଡି ପାଇଁ ନିର୍ବାଚନ ଲଢି ବିଜୟ ଲାଭ କରିଥିଲେ। ସେବେଠାରୁ ଏପର୍ଯ୍ୟନ୍ତ ପ୍ରାୟ ୨୯ଟି ନିର୍ବାଚନ ଲଢିଥିବା ଶାହ ଗୋଟିଏ ବି ନିର୍ବାଚନରେ ହାରି ନ ଥିବା କୁହାଯାଏ ।
