ମହାକାଳପଡ଼ା,୨୦ା୧୨(ପ୍ରତାପ ଚନ୍ଦ୍ର ସ୍ବାଇଁ): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଜମ୍ବୁ ସାମୁଦ୍ରିକ ଥାନା ଅଧୀନ ପେଟଛେଲା ଗାଁରେ ୨୪ ଏକର ସରକାରୀ ଗ୍ରାମ୍ୟ ଜଙ୍ଗଲ ଜମିରେ ଧାନ କାଟିବାକୁ ନେଇ ଶୁକ୍ରବାର ଦୁଇ ଗୋଷ୍ଠୀ ମଧ୍ୟରେ ବିବାଦ ଉପୁଜିଛି। ଖବର ପାଇ ଜମ୍ବୁ ସାମୁଦ୍ରିକ ଥାନା ଅଧିକାରୀ ସୌମ୍ୟ ରଞ୍ଜନ ବିଶ୍ୱାଳଙ୍କ ନେତୃତ୍ୱରେ ଏକ ପ୍ଲାଟୁନ ଫୋର୍ସ ଘଟଣାସ୍ଥଳରେ ପହଞ୍ଚିଥିଲେ। ଏହି ୨୪ ଏକର ଗ୍ରାମ୍ୟ ଜଙ୍ଗଲ ଜମିରେ ଧାନ କାଟୁଥିବା ମହିଳାଙ୍କୁ ଜମିରେ ପୋଲିସ ବାରଣ ସତ୍ତ୍ୱେ ଧାନ କଟା ହୋଇଥିଲା। ଏ ନେଇ ରାମନଗର-ଗୁପ୍ତଗିରି ମୁଖ୍ୟ ରାସ୍ତାରେ କେତେକ ମହିଳା ଭାଗ ଚାଷୀଙ୍କ ସହିତ ଗ୍ରାମର କେତେକ ଲୋକ ପୋଲିସ ଗାଡ଼ି ଆଗରେ ଧାରଣା ଦେଇ ନ୍ୟାୟ ପାଇଁ ଦାବି କରିଥିଲେ। ଖବର ପାଇ ଏସ୍ଡିପିଓ ଜ୍ୟୋତି ରଞ୍ଜନ ଗୌଡ଼ ଓ ମହାକାଳପଡ଼ା ଥାନା ଅଧିକାରୀ ରାଜେନ୍ଦ୍ର କୁମାର ମହାପାତ୍ର ପହଞ୍ଚି ଲୋକଙ୍କୁ ବୁଝା ଶୁଝା କରିଥିଲେ। ପରେ ଅପରାହ୍ନରେ ପରିସ୍ଥିତି ଶାନ୍ତ ପଡ଼ିଥିଲା।
ଗ୍ରାମରେ ମହିଳା ଭାଗଚାଷୀ ସୋନାଲି ମାନ୍ନା, ରଶ୍ମୀ ମଣ୍ଡଳ, ମମନୀ ପଢ଼ିଆରି, ସବିତା ପାତ୍ର, ମଞ୍ଜୁ ପଢ଼ିଆରୀ, ସୁରମା ପାତ୍ର, ସନ୍ଧ୍ୟା ପାତ୍ର, ଦେବୀକା ପାତ୍ର ଓ ସୁଚିତ୍ରା ମଣ୍ଡଳ ଓ ଗୌରୀ ମାନ୍ନାଙ୍କ ସମେତ ବହୁ ସଂଖ୍ୟାରେ ମହିଳା ପୁରୁଷ ଚାଷୀ ଉକ୍ତ ଜମିକୁ ବାପା ଜେଜେବାପାଙ୍କ ପୂର୍ବ ପିଢ଼ିରୁ ଚାଷ କରି ପରିବାର ପ୍ରତିପୋଷଣ କରନ୍ତି। ଅପରପକ୍ଷରେ ଏହି ଗ୍ରାମର ହାବୁ ନନ୍ଦ ଦଖଲ କରି ଭାଗ ଲଗାଇଥିଲେ ବୋଲି କୁହାଯାଇଛି। ତେବେ ହାବୁନନ୍ଦଠାରୁ ଉକ୍ତ ଜମିକୁ ଶିଶିର ରାଉତ ନାମକ ବ୍ୟକ୍ତି କିଣିଥିବା କୁହାଯାଉଛି। ଜମି କିଣିବା ପରେ ଦଖଲକୁ ନେଇ ଶିଶିର ରାଉତ ଓ ଗ୍ରାମର ମହିଳା ଭାଗ ଚାଷୀଙ୍କ ମଧ୍ୟରେ ବିବାଦ ଲାଗିଥିଲା । ତେବେ ଉଭୟ ପକ୍ଷଙ୍କୁ ପୋଲିସ ଥାନାକୁ ଡାକି ଜମି ବାଡ଼ି ସଂକ୍ରାନ୍ତୀୟ ରେକର୍ଡ ଦାଖଲ କରିବା ପାଇଁ କହିଛନ୍ତି। ଉକ୍ତ ଜମି କାହାର ରେକର୍ଡ ଯାଞ୍ଚ ପରେ ଜଣା ପଡ଼ିବ ବୋଲି ଥାନା ଅଧିକାରୀ କହିଛନ୍ତି। ପେଟଛେଲା ରାଜସ୍ବ ସର୍କଲ ଇନ୍ସପେକ୍ଟର ମଞ୍ଜୁଲତା ମାଝୀଙ୍କୁ ପଚାରିବାରୁ ଉକ୍ତ ବିବାଦୀୟ ଜମି ଗ୍ରାମ୍ୟ ଜଙ୍ଗଲ କିସମ ଥିବା କହିଛନ୍ତି।
Dharitri – Odisha’s No.1 Odia Daily
