ଦାରିଙ୍ଗବାଡି, ୧୧।୫ (ଅରୁଣ ସାହୁ):ଓଡିଶାର ପର୍ଯ୍ୟଟନ କ୍ଷେତ୍ର ଦାରିଙ୍ଗବାଡି ରାଜ୍ୟ ତଥା ରାଜ୍ୟ ବାହାରେ ପରିଚିତ ଏହାକୁ ବିଶ୍ବସ୍ତରୀୟ ପର୍ଯ୍ୟଟନ କ୍ଷେତ୍ର କରାଯିବାକୁ ଏବେ ରାଜ୍ୟ ସରକାର ବଡ଼ ପଦକ୍ଷେପ ନେବାକୁ ଆରମ୍ଭ କରିଛନ୍ତି। ଏହି କ୍ରମରେ ଜିଲା ପ୍ରଶାସନ, ଉପଖଣ୍ଡ ପ୍ରଶାସନ ଓ ବ୍ଲକ ପ୍ରଶାସନ ପକ୍ଷରୁ ପ୍ଲାଷ୍ଟିକ ମୁକ୍ତ ଦାରିଙ୍ଗବାଡି ସହ କ୍ଲିନ ଦାରିଙ୍ଗବାଡି ଗ୍ରୀନ ଦାରିଙ୍ଗବାଡି କରାଯିବାକୁ ପ୍ରତି ଗୁରୁବାର ସଫେଇ ଅଭିଯାନ କରାଯିବା ସହ ସମସ୍ତ ବ୍ୟବସାୟିକ ଅନୁଷ୍ଠାନ, ସରକାରୀ ଓ ବେସରକାରୀ ଅନୁଷ୍ଠାନ ସମ୍ମୁଖରେ ଡଷ୍ଟବିନ ରଖାଯାଇଛି ଓ ତାକୁ ଟ୍ରାକ୍ଟର ଯୋଗେ ପ୍ରତି ଗୁରୁବାର ଡମ୍ପୟାର୍ଡ଼ରେ ପକାଯିବା ବ୍ୟବସ୍ଥା କରାଯାଉଛି।
ଗତ କିଛି ଦିନ ହେଲା ଏହି ଡଷ୍ଟବିନ ଗୁଡିକରେ ଅଳିଆ ଆବର୍ଜନା ଭର୍ତ୍ତି ହେବା ସହ ସେଠାରେ ବର୍ଷା ଜଳ ରହି ପୁତ୍ତିମୟ ଗନ୍ଧ ହୋଇ ପୋକ ସାଲୁବାଲୁ ହେଉଛି। ଫଳରେ ଜନଅସନ୍ତୋଷ ବୃଦ୍ଧି ପାଉଛି। ପଞ୍ଚାୟତ କାର୍ଯ୍ୟାଳୟ ପକ୍ଷରୁ ଏହି ଅଳିଆ ଆବର୍ଜନାକୁ ଡମ୍ପିୟାର୍ଡ଼ ପର୍ଯ୍ୟନ୍ତ ପକାଇବାକୁ ଦାୟିତ୍ୱ ବହନ କରୁଥିବାବେଳେ ଏବେ ନିଜସ୍ବ ଟ୍ରାକ୍ଟର କିମ୍ବା ଅନ୍ୟ ଯାନ ପଞ୍ଚାୟତ କାର୍ଯ୍ୟାଳୟର ନ ଥିବାରୁ ଅନ୍ୟ ଘରୋଇ ଗାଡି ଉପରେ ନିର୍ଭର କରିବାକୁ ପଡୁଛି। ଫଳରେ ପ୍ରତି ଗୁରୁବାର ଅଳିଆ ଉଠାଇବା ସମ୍ଭବ ହେଉନାହିଁ ବୋଲି ସରପଞ୍ଚ ସୁଶ୍ରୀ ଚନ୍ଦ୍ରିକା ମଲିକ ପ୍ରତିକ୍ରିୟାରେ କହିଛନ୍ତି। ଗତ କିଛି ଦିନ ହେଲା ଦାରିଙ୍ଗବାଡିର ଆକ୍ସିସ ବ୍ୟାଙ୍କ ସମ୍ମୁଖରେ ରହିଥିବା ଡଷ୍ଟବିନରେ ପୁତ୍ତିମୟ ଗନ୍ଧ ଓ ପୋକ ସାଲୁବାଲୁ ଯୋଗୁ ବ୍ୟାଙ୍କକୁ ଆସୁଥିବା ଗ୍ରାହକ ଅସନ୍ତୋଷ ହେଉଥିବା ଶାଖା ପରିଚାଳକ ବିବେକାନନ୍ଦ ସାହୁ ଉଦ୍ବେଗ ପ୍ରକାଶ କରିଛନ୍ତି। ସେ ଏନେଇ ପଞ୍ଚାୟତ କାର୍ଯ୍ୟାଳୟକୁ ବାରମ୍ବାର ଜଣାଇଥିବା ଅଭିଯୋଗ କରିଛନ୍ତି।
ଏନେଇ ଦାରିଙ୍ଗବାଡି ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ ରୋଶନ କୁମାର ରଥଙ୍କ ପ୍ରତିକ୍ରିୟା ନେବାରୁ ସେ ଏହାକୁ ନେଇ କହିଛନ୍ତି, ଯେଉଁ ଟ୍ରାକ୍ଟର ପୂର୍ବରୁ ନିୟମିତ ଅଳିଆ ଉଠାଇବାକୁ ଠିକା ଦିଆଯାଇଥିଲା ତାହା ସଠିକ ଭାବରେ କାର୍ଯ୍ୟ କଲା ନାହିଁ। ତେଣୁ ଅନ୍ୟ ଏକ ଟ୍ରାକ୍ଟରକୁ ଯୋଗାଡ଼ କରାଯାଇଛିୟ। ଖୁବଶୀଘ୍ର ସମସ୍ତ ଡଷ୍ଟବିନରୁ ଅଳିଆ ଉଠାଯିବ ବୋଲି ସେ କହିଛନ୍ତି।
ସୂଚନାଯୋଗ୍ୟ ଯେ, ପଞ୍ଚାୟତ ପୂର୍ବରୁ ଦାରିଙ୍ଗବାଡି ବଜାରରୁ ଅଳିଆ ଉଠାଇବା ପାଇଁ ବ୍ୟାଟେରୀ ଚାଳିତ ଗାଡି କିଣାଯିବାକୁ ପ୍ରସ୍ତାାବ ରହିଥିଲେ ମଧ୍ୟ ତାହା ଆଜି ପର୍ଯ୍ୟନ୍ତ କାର୍ଯ୍ୟକାରୀ ହୋଇପାରିନାହିଁ। ଫଳରେ ଏବେ ଦାରିଙ୍ଗବାଡିକୁ କ୍ଲିନ ଓ ଗ୍ରୀନ ଦାରିଙ୍ଗବାଡି କରିବାରେ ଦିଗହରା ହେଉଥିବା ନେଇ ଜନଅସନ୍ତୋଷ ବୃଦ୍ଧି ପାଉଛି। ଏନେଇ ସରପଞ୍ଚ ତାଙ୍କ ପ୍ରତିକ୍ରିୟାରେ କହିଛନ୍ତି ଯେ, ଅଳିଆ ଉଠାଇବାକୁ ବ୍ୟାଟେରୀ ଗାଡି କିଣିବାକୁ ଯେଉଁ ପ୍ରସ୍ତାବ ରହିଥିଲା ତାକୁ ଏବେ ସରକାର କିଣିବାକୁ ମନା କରିଛନ୍ତି ବୋଲି ସେ କହିଛନ୍ତି।
Dharitri – Odisha’s No.1 Odia Daily
