ମୋହନା,୧୧।୫( ମନ୍ମଥ ମିଶ୍ର ) : ପ୍ରତିଶ୍ର୍ରୁତି ପୂରଣ କରିଲାନି ପ୍ରଶାସନ। ପ୍ରକଳ୍ପ କାମ ବନ୍ଦ କଲେ ବିସ୍ଥାପିତ ଅଞ୍ଚଳବାସୀ । ଦୀର୍ଘ ବର୍ଷଧରି ଚାଲୁ ରହିଥିବା ଗଜପତି ଜିଲା ରା ଉଦୟଗିରି ବ୍ଲକର ଛେଳିଗଡ ଜଳପ୍ରକଳ୍ପ କାର୍ଯ୍ୟ ବନ୍ଦ କରିଛନ୍ତି ଛେଳିଗଡ ବୁଡି ଅଞ୍ଚଳବାସୀ । ଚଳିତ ବର୍ଷ ଜାନୁୟାରୀ ମାସ ୩୦ ତାରିଖରେ ଛେଳିଗଡ ଜଳପ୍ରକଳ୍ପର ବିସ୍ଥାପିତ ଅଞ୍ଚଳବାସୀ ସେମାନଙ୍କର ୧୫ ଦଫା ଦାବିକୁ ନେଇ ଜିଲାପାଳଙ୍କୁ ଅଭିଯୋଗ କରିଥିଲେ । ଜିଲାପାଳ ବିସ୍ଥାପିତଙ୍କ ସମସ୍ତ ଅଭିଯୋଗକୁ ୩ ମାସର ମଧ୍ୟରେ ପୂରଣ କରିବା ପାଇଁ ପ୍ରତିଶ୍ର୍ରୁତି ଦେଇଥିଲେ। କିନ୍ତୁ ତିନି ମାସ ବିତିଯାଇଥିଲେ ମଧ୍ୟ ଜିଲାପାଳ କୌଣସି ଦାବିକୁ ପୂରଣ କରିନଥିବା ବୁଡି ଅଞ୍ଚଳବାସୀ କହିଛନ୍ତି । ସୋମବାର ଜିଲାପାଳ ରା -ଉଦୟଗିରି ଠାରେ ଥିବା ଯୁଗ୍ମଅଭିଯୋଗ ଶୁଣାଣିରେ ଯୋଗଦେବା ପରେ ଛେଳିଗଡ ଜଳପ୍ରକଳ୍ପ କାର୍ଯ୍ୟାଳୟକୁ ଯାଇ ଅଧିକାରୀମାନଙ୍କ ସହ ସାକ୍ଷାତ କରିଥିଲେ । ବୁଡି ଅଞ୍ଚଳର ଶତାଧିକ ମହିଳା ଓ ପୁରୁଷ ଏକତ୍ରିତ ହୋଇ ଜଳପ୍ରକଳ୍ପ କାର୍ଯ୍ୟ ବନ୍ଦ କରିବା ସହ ଆଗାମୀ ଦିନରେ ଯଦି ପ୍ରଶାସନ ସମସ୍ତ ଦାବିକୁ ପୂରଣ ନକରନ୍ତି ତାହେଲେ ପ୍ରକଳ୍ପ କାର୍ଯ୍ୟକୁ ବନ୍ଦ କରିବା ସହ ଜାତୀୟ ରାଜପଥ ଅବରୋଧ କରାଯିବ ବୋଲି ସଂଗ୍ରାମ ସମିତି ସଭାପତି ଚୈତନ୍ୟ ସାହୁ କହିଛନ୍ତି । ଅପରପକ୍ଷେ ପ୍ରକଳ୍ପର ଅଧିକ୍ଷଣ ଯନ୍ତ୍ରୀ ବୀରେନ୍ଦ୍ର କୁମାର ଜଗତ କହିଛନ୍ତି ଯେ, ଏନେଇ ବିସ୍ଥାପିତ ଅଞ୍ଚଳବାସୀ ଶାନ୍ତିଶୃଙ୍ଖଳାର ସହିତ ଆସି କଥାବାର୍ତ୍ତା ହୁଅନ୍ତୁ ଏବଂ ଏଭଳି ବେଆଇନ ଭାବେ ପ୍ରକଳ୍ପ କାର୍ଯ୍ୟକୁ ବନ୍ଦ କରିବା ଉଚିତ ନୁହେଁ ବୋଲି କହିଛନ୍ତି ।
