ଭଞ୍ଜନଗର,୧।୧୦(ବାବୁଲା ପ୍ରଧାନ):ଗଞ୍ଜାମ ଜିଲା ବେଲଗୁଣ୍ଠା ବ୍ଲକ ତନରଡା ଗୋରକ୍ଷାଶ୍ରମ ପରିସରରେ ବୁଧବାର ସଂସ୍କାରକ ଶ୍ରୀବତ୍ସ ପଣ୍ଡାଙ୍କ ୧୫୫ ତମ ଜୟନ୍ତୀ ପାଳିତ ହୋଇଯାଇଛି। ଏଥିରେ ବକ୍ତାମାନେ ଯୋଗଦେଇ ସଂସ୍କାରକ ଶ୍ରୀବତ୍ସ ପଣ୍ଡା ତନରଡ଼ାରେ ରାଜ୍ୟର ପ୍ରଥମ ଗୋରକ୍ଷାଶ୍ରମ ପ୍ରତିଷ୍ଠା କରିଥିଲେ ବୋଲି କହିଥିଲେ। ଗୋଶାଳା ପ୍ରତିଷ୍ଠା କରିବାର ମୂଳ ଲକ୍ଷ୍ୟ ଥିଲା ବୃଦ୍ଧ ଗାଈ ଗୋରୁଙ୍କ ସେବା କରିବା। ଲୋକେ ବୃଦ୍ଧ ଗାଈ ଗୋରୁଙ୍କୁ ବ୍ୟବସାୟୀଙ୍କୁ ବିକ୍ରି କରିଦେଉଥିଲେ। ବ୍ୟବସାୟୀ ତାହାକୁ କଂସେଇ ଖାନାରେ ନେଇ ବିକ୍ରି କରିଦେଉଥିଲେ। ଶ୍ରୀବତ୍ସ ପଣ୍ଡା ଏହିଭଳି କରୁଣ ଦୃଶ୍ୟ ସେ ସମୟରେ ଦେଖି ବୃଦ୍ଧ ଗାଈ ଗୋରୁଙ୍କ ସେବା କରିବା ପାଇଁ ନିଷ୍ପତ୍ତି ନେଇଥିଲେ। ତେଣୁ ୧୯୨୩ ମସିହାରେ ତନରଡ଼ାରେ ସେ ରାଜ୍ୟର ପ୍ରଥମ
ଗୋରକ୍ଷାଶ୍ରମ ପ୍ରତିଷ୍ଠା କରିଥିଲେ। ଏହାପରେ ରାଜ୍ୟର ଅନ୍ୟ ଅଞ୍ଚଳରେ ମଧ୍ୟ ଗୋରକ୍ଷାଶ୍ରମ ପ୍ରତିଷ୍ଠା କରିଥିଲେ। ଏଥିସହ ସେ ନାରୀ ଶିକ୍ଷାର ବିକାଶ ପାଇଁ ତନରଡ଼ା ସମେତ ରାଜ୍ୟର ବିଭିନ୍ନ ସ୍ଥାନରେ ବାଳିକା ବିଦ୍ୟାଳୟ ପ୍ରତିଷ୍ଠା କରିଥିଲେ। ଏହିଭଳି ଅନେକ ଜନହିତକର କାର୍ଯ୍ୟ ସଂସ୍କାରକ ଶ୍ରୀବତ୍ସ ପଣ୍ଡା କରିଥିଲେ।
ଏହିଭଳି ଜଣେ ମହାନ ବ୍ୟକ୍ତିଙ୍କ ନୀତି ଆଦର୍ଶରେ ଆମେ ସମସ୍ତେ ଅନୁପ୍ରାଣିତ ହୋଇ ସେବା କାର୍ଯ୍ୟ କରିବାକୁ ପଡିବ ବୋଲି ବକ୍ତାମାନେ କହିଥିଲେ। ମୁଖ୍ୟ ଅତିଥି ଭାବେ ଭାଜପାର ସୱଚ୍ଛ ଭାରତ ମିଶନ ରାଜ୍ୟ ପ୍ରମୁଖ ମହେଶ ଚନ୍ଦ୍ର ମହାନ୍ତି ଯୋଗଦେଇ ସଂସ୍କାରକ ଶ୍ରୀବତ୍ସ ପଣ୍ଡାଙ୍କ କର୍ମମୟ ଜୀବନ ସଂପର୍କରେ କହିଥିଲେ। ଅନ୍ୟ ମାନଙ୍କ ମଧ୍ୟରେ ଗୋରକ୍ଷାଶ୍ରମ ଟ୍ରଷ୍ଟି ସଭାପତି ଆଚାର୍ଯ୍ୟ ସୁଦର୍ଶନ, ଟ୍ରଷ୍ଟି ସମ୍ପାଦକ ଗୋପବନ୍ଧୁ ସାହୁ, ଟ୍ରଷ୍ଟି କୋଷାଧ୍ୟକ୍ଷ ସନ୍ତୋଷ ଆଚରି, ଟ୍ରଷ୍ଟି ବାଲ୍ମୀକି ପଟ୍ଟନାୟକ, ସୁବ୍ରତ ସାମଲ, ବାନପ୍ରସ୍ତିନି ଉଷା ମୁନି ପ୍ରମୁଖ ଅତିଥି ଭାବେ ଯୋଗ ଦେଇଥିଲେ। ଶ୍ରୁତି ପ୍ରିୟ, ପଞ୍ଚାନନ ପାଳ ପ୍ରମୁଖ କାର୍ଯ୍ୟକ୍ରମକୁ ପରିଚାଳନା କରିବାରେ ସହଯୋଗ କରିଥିଲେ।
