ନୂଆଦିଲ୍ଲୀ/ପୁଣେ,୧୫।୫: NEET-UG 2026 ପ୍ରଶ୍ନପତ୍ର ଲିକ ମାମଲାରେ କେନ୍ଦ୍ରୀୟ ତଦନ୍ତ ବ୍ୟୁରୋ (CBI)କୁ ଏକ ବଡ଼ ସଫଳତା ମିଳିଛି। ତଦନ୍ତକାରୀ ସଂସ୍ଥା ଏହି ସାରା ଘଟଣାର ମାଷ୍ଟରମାଇଣ୍ଡ କୁହାଯାଉଥିବା ପି.ଭି. କୁଲକର୍ଣ୍ଣିଙ୍କୁ ଗିରଫ କରିଛି। CBI ଅନୁଯାୟୀ, କୁଲକର୍ଣ୍ଣି ହିଁ ପେପର ଲିକ୍ର ମୁଖ୍ୟ ଉତ୍ସ ଥିଲେ।
ତଦନ୍ତରୁ ଜଣାପଡିଛି ଯେ, ପୁଣେର ଜଣେ କେମିଷ୍ଟ୍ରି ଲେକ୍ଚରର ଭାବେ କାର୍ଯ୍ୟ କରୁଥିବା ପି.ଭି. କୁଲକର୍ଣ୍ଣି NTA ପକ୍ଷରୁ ପରୀକ୍ଷା ପ୍ରକ୍ରିୟା ସହ ଜଡିତ ଥିଲେ। ଏହି କାରଣରୁ ପ୍ରଶ୍ନପତ୍ର ପର୍ଯ୍ୟନ୍ତ ତାଙ୍କର ସହଜରେ ପହଞ୍ଚ ଥିଲା। ମହାରାଷ୍ଟ୍ରର ଲାତୁରର ମୂଳ ନିବାସୀ କୁଲକର୍ଣ୍ଣି, ଏପ୍ରିଲ ଶେଷ ସପ୍ତାହରେ ଅନ୍ୟ ଜଣେ ଅଭିଯୁକ୍ତ ମନୀଷା ୱାଘମାରେଙ୍କ ସହାୟତାରେ କିଛି ଛାତ୍ରଙ୍କୁ ଏକାଠି କରିଥିଲେ।
CBI ର କହିବା ଅନୁଯାୟୀ, କୁଲକର୍ଣ୍ଣି ନିଜ ପୁଣେ ସ୍ଥିତ ବାସଭବନରେ ଛାତ୍ରମାନଙ୍କ ପାଇଁ ସ୍ବତନ୍ତ୍ର କୋଚିଂ କ୍ଲାସ ଚଲାଉଥିଲେ। ଏହି କ୍ଲାସରେ ସେ ଛାତ୍ରମାନଙ୍କୁ ପ୍ରଶ୍ନ, ବିକଳ୍ପ ଏବଂ ସଠିକ ଉତ୍ତର ଡିକ୍ଟେଟ୍ କରୁଥିଲେ, ଯାହାକୁ ଛାତ୍ରମାନେ ନିଜ ଖାତାରେ ଲେଖି ରଖୁଥିଲେ। ପରବର୍ତ୍ତୀ ସମୟରେ ଯାଞ୍ଚରୁ ଜଣାପଡିଛି ଯେ, ସେହି ପ୍ରଶ୍ନଗୁଡ଼ିକ ମେ’ ୩ ତାରିଖରେ ହୋଇଥିବା ଅସଲ NEET-UG ପରୀକ୍ଷା ପେପର ସହ ସମ୍ପୂର୍ଣ୍ଣ ମେଳ ଖାଉଛି।
ବର୍ତ୍ତମାନ ସୁଦ୍ଧା ଜୟପୁର, ଗୁରୁଗ୍ରାମ, ନାସିକ, ପୁଣେ ଏବଂ ଅହିଲ୍ୟାନଗରରୁ ମୋଟ ୮ ଜଣଙ୍କୁ ଗିରଫ କରାଯାଇଛି। ବିଭିନ୍ନ ସ୍ଥାନରେ ଚଢ଼ାଉ କରାଯାଇ ଗୁରୁତ୍ୱପୂର୍ଣ୍ଣ ଦସ୍ତାବିଜ, ଇଲେକ୍ଟ୍ରୋନିକ ଗ୍ୟାଜେଟ ଏବଂ ମୋବାଇଲ ଫୋନ ଜବତ କରାଯାଇଛି। ଏହି ସ୍ପେଶାଲ କ୍ଲାସରେ ସାମିଲ ହେବା ପାଇଁ ଛାତ୍ରମାନଙ୍କଠାରୁ ଲକ୍ଷ ଲକ୍ଷ ଟଙ୍କା ନିଆଯାଇଥିବା ସୂଚନା ମିଳିଛି।
ଶିକ୍ଷା ମନ୍ତ୍ରଣାଳୟର ଅଭିଯୋଗ କ୍ରମେ ମେ’ ୧୨ ତାରିଖରେ CBI ଏହି ମାମଲା ରୁଜୁ କରିଥିଲା। ବର୍ତ୍ତମାନ ଗିରଫ ଅଭିଯୁକ୍ତମାନଙ୍କ ମଧ୍ୟରୁ କିଛି ପୋଲିସ ରିମାଣ୍ଡରେ ଥିବାବେଳେ ଅନ୍ୟମାନଙ୍କୁ ଦିଲ୍ଲୀ ଅଣାଯାଉଛି। ଏହି ବଡ଼ ଧରଣର ସ୍କାମରେ ଆଉ କେଉଁମାନେ ଜଡ଼ିତ ଅଛନ୍ତି, ସେ ନେଇ CBI ଅଧିକ ଖୋଳତାଡ଼ ଜାରି ରଖିଛି।
