ଲୋଇସିଂହା,୧୬।୫(ସୁଶାନ୍ତ ବାରିକ):ବଲାଙ୍ଗୀର ଜିଲା ଲୋଇସିଂହା ତହସିଲ ବୁର୍ଡା ମୌଜାର ଢୋଲମହୁଲ ଗୋଚର ଜମି ଉପରେ ଏବେ ଜମି ବ୍ୟବସାୟୀଙ୍କ ଲୋଲୁପ ଦୃଷ୍ଟି ପଡିଛି। ବର୍ଷ ବର୍ଷ ଧରି ବ୍ୟବହୃତ ପ୍ରାକୃତିକ ନାଳ ଓ ଜଳସ୍ରୋତକୁ ନ୍ୟସ୍ତ ସ୍ବାର୍ଥ ବ୍ୟକ୍ତି ମାଟି ପକାଇ ବନ୍ଦ କରି ଦେଉଛନ୍ତି। ବର୍ତ୍ତମାନ ଢୋଲମହୁଲ ଗୋଚର ଜମିର ଉଦ୍ବୃତ୍ତ ବର୍ଷା ଜଳକୁ ଡାଇଭର୍ସନ ଉଦ୍ଦେଶ୍ୟରେ ବେଆଇନ ଭାବେ ମେଶିନ ଲଗାଇ ମାଟି ଆଡିବନ୍ଧ ନିର୍ମାଣ କରାଯାଉଛି। ଆଡିବନ୍ଧ ଜରିଆରେ ବର୍ଷା ଜଳ ସ୍ରୋତକୁ ଅବରୋଧ କରିବା ଦ୍ୱାରା ବୁର୍ଡା ଗ୍ରାମର ଚାଷଜମିକୁ ଆଉ ବର୍ଷା ଜଳ ମାଡି ପାରିବ ନାହିଁ। ଫଳରେ ସମ୍ପୃକ୍ତ ଅଞ୍ଚଳର ଚାଷୀଙ୍କ ଚାଷ ପ୍ରଭାବିତ ହେବା ଆଶଙ୍କା ଦେଖାଦେଇଛି। ଏନେଇ ଚାଷୀମାନେ ନିକଟରେ ତହସିଲଦାରଙ୍କ ଦ୍ୱାରସ୍ଥ ହୋଇଥିଲେ ସୁଦ୍ଧା ସୁଫଳ ମିଳିପାରିନାହିଁ।ଏହାକୁ ନେଇ ବୁର୍ଡା ଗ୍ରାମର ଚାଷୀ ମହଲରେ ତୀବ୍ର ଅସନ୍ତୋଷ ପ୍ରକାଶ ପାଇଛି ା
ପ୍ରକାଶ ଯେ, ବଲାଙ୍ଗୀର-ବରଗଡ ୨୬ନଂ ଜାତୀୟ ରାଜପଥ ପାର୍ଶ୍ୱ ମାଛ ଜାଆଁଳା କେନ୍ଦ୍ର ପଛପଟରୁ ନୂଆ ମେଡିକାଲ ଯାଏ ବିସ୍ତୀର୍ଣ୍ଣ ଗୋଚର ଜମି ରହିଛି। ଲୋଇସିଂହା ଓ ବୁର୍ଡା ଗ୍ରାମର ଗାଈଗୋରୁ ଏଠାରେ ବିଚରଣ କରିଥାନ୍ତି ା ଗୋଚର ଜମି ଓ ଲାଇନଜୁରୀ (ପାରମ୍ପରିକ ପାଣିନାଳା) ମଝିରେ ବୁର୍ଡା ଗ୍ରାମର ଚାଷୀଙ୍କ ଚାଷ ଜମି ରହିଛି ା ବର୍ଷା ଦିନରେ ଏହି ଗୋଚର ଜମିର ଉଦ୍ବୃତ୍ତ ବର୍ଷା ଜଳ ବୁର୍ଡା ଗ୍ରାମର ଚାଷଜମିକୁ ପ୍ରବେଶ କରିଥାଏ। ସେହି ବର୍ଷାଜଳକୁ ଚାଷୀମାନେ ଚାଷରେ ବନିଯୋଗ କରି ଖରିଫ ଧାନ ଫସଲ ଅମଳ କରିଥାନ୍ତି। ଗୋଚର ଜମି ଜଳ ଲାଇନଜୁରୀରେ ପଡି ଲୋଇସିଂହା ସାଗରକୁ ଯାଇଥାଏ। ଏବେ ସେହି ଗୋଚର ଜମିର ବୁର୍ଡା ଚାଷଜମି ସୀମାନ୍ତରେ ଜବରଦଖଲ କରାଯାଇ ମେଶିନ ଲଗାଇ ବେଆଇନ ଭାବରେ ଆଡିବନ୍ଧ କରାଯାଉଛି।
ପ୍ରାୟ ୩ ଫୁଟ ଉଚ୍ଚତା ଏବଂ ୫ ଫୁଟ ଚଉଡାରେ ଆଡିବନ୍ଧ ନିର୍ମାଣ କରାଯାଉଛି। ଫଳରେ ଗୋଚର ଜମିର ଉଦବୃତ୍ତ ବର୍ଷା ଜଳ ବୁର୍ଡା ସୀମାନ୍ତ ଚାଷଜମିକୁ ଆଉ ନ ଯାଇ ବିପରୀତ ଦିଗକୁ ଯିବ। ଫଳରେ ଚଳିତ ଖରିଫ ଚାଷ ପ୍ରଭାବିତ ହେବ ବୋଲି ବୁର୍ଡା ଗ୍ରାମର ଚାଷୀମାନେ ଅଭିଯୋଗ କରିଛନ୍ତି ା
ସରକାରୀ ଗୋଚର ଜମି ହୋଇଥିଲେ ମଧ୍ୟ ପ୍ରଶାସନର ଅବହେଳା ଯୋଗୁ ବେଆଇନ ଭାବେ ଜମି ଦଖଲ କରି ଆଡିବନ୍ଧ ନିର୍ମାଣ କରାଯାଉଛି ା ଏହା ହେବା ଦ୍ୱାରା ବୁର୍ଡା ଗ୍ରାମର ଚାଷୀ ପାଣି ଅଭାବରୁ କ୍ଷତିଗ୍ରସ୍ତ ହେବ ା ଅପରପକ୍ଷେ ଭବିଷ୍ୟତରେ ଯଦି ବର୍ଷାଦିନରେ ବଡ ବନ୍ୟା ପରିସ୍ଥିତି ସୃଷ୍ଟି ହୁଏ, ସେହି ବନ୍ୟା ପାଣି ଲୋଇସିଂହା ପେଟ୍ରୋଲ ପମ୍ପ ନିକଟ ୨୬ ନଂ ଜାତୀୟ ରାଜପଥ ଧୋଇ ଦେବା ଆଶଙ୍କାକୁ ଏଡାଇ ଦିଆଯାଇ ପାରିବ ନାହିଁ ା ଏ ସମ୍ପର୍କରେ ତହସିଲଦାର ଟିକୁନୁ ପୁଟାଙ୍କୁ ପଚାରିବାରେ ବେଆଇନ ଆଡିବନ୍ଧ ନିର୍ମାଣ ହେବା ନେଇ କେହି ଚାଷୀ ତାଙ୍କୁ ଜଣାଇନାହାନ୍ତି। ଶନିବାର ରାଜସ୍ବ ନିରୀକ୍ଷକ କ୍ଷେତ୍ର ପରିଦର୍ଶନ କରିବେ ବୋଲି ସେ କହିଛନ୍ତି ା ତେବେ ଏ ଦିଗରେ ଜିଲାପାଳ ଏବଂ ଉପଜିଲାପାଳ ଦୃଷ୍ଟି ଦେଇ ବିହିତ ପଦକ୍ଷେପ ଗ୍ରହଣ କରିବାକୁ ଦାବି ହେଉଛି।
Dharitri – Odisha’s No.1 Odia Daily
