ନୂଆଦିଲ୍ଲୀ,୩।୧: ସମ୍ଭଲ ଶାହି ଜାମା ମସଜିଦ୍ ବିବାଦକୁ ନେଇ ସାରା ଦେଶରେ ଚର୍ଚ୍ଚା ହେଉଥିବା ବେଳେ କଂଗ୍ରେସ ନେତା ରସିଦ ଅଲଭି ବିବାଦୀୟ ବୟାନ ଦେଇଛନ୍ତି। ରାଷ୍ଟ୍ରପତି ଭବନ ତଳେ ଏକ ଶିବଲିଙ୍ଗ ରହିଥିବା ସେ ସ୍ବପ୍ନରେ ଦେଖିଛନ୍ତି। ସରକାର ସେହି ସ୍ଥାନ ଖନନ କରିବା ଉଚିତ ବୋଲି ସେ କହିଛନ୍ତି।
ନ୍ୟୁଜ ଏଜେନ୍ସି ଏଏନ୍ଆଇ ସହ ଆଲୋଚନା ରଶିଦଙ୍କୁ ପଚରା ଯାଇଥିଲା ଯେ ସମମ୍ଭଲର ସାହି ଜାମା ମସଜିଦରେ କରାଯାଇଥିବା ସର୍ଭେ ରିପୋର୍ଟ ସବ୍ କୋର୍ଟରେ ଉପସ୍ଥାପିତ କରାଯାଇଥିଲା। ସେଥିରେ ସେଠାରେ ପୂର୍ବରୁ ହରିହର ମନ୍ଦିର ଥିବା ଦାବି କରାଯାଉଛି। ଏନେଇ ସେ କ’ଣ କହିବେ? ଏହା ଉପରେ କଂଗ୍ରେସ ନେତା ୟୁପି ସରକାରଙ୍କୁ ଟାର୍ଗେଟ କରି କହିଛନ୍ତି ଯେ ସମସ୍ତ ସର୍ଭେ ବନ୍ଦ କରାଯାଉ ବୋଲି ସୁପ୍ରିମକୋର୍ଟ ନିର୍ଦ୍ଦେଶ ଦେଇଛନ୍ତି। ପୂଜା ଅଧିନିୟମରେ ସୁପ୍ରିମକୋର୍ଟ ଏହାର ଚୂଡ଼ାନ୍ତ ନିଷ୍ପତ୍ତି ନ ଦେବା ଯାଏ କୌଣସି କୋର୍ଟ ନିଷ୍ପତ୍ତି ନିଅନ୍ତି ନାହିଁ। ହେଲେ ଉତ୍ତରପ୍ରଦେଶ ସରକାର ଏହାକୁ ପ୍ରୋତ୍ସାହିତ କରୁଛନ୍ତି। ଯେଉଁଭଳି ଭାବେ ଘଟଣା ସମ୍ଭଲରେ ହୋଇଛି, ତାହାକୁ ନେଇ ନ୍ୟାୟବ୍ୟବସ୍ଥା ଉପରେ ପ୍ରଶ୍ନ ଉଠୁଛି।
କେବଳ ଏତିକି ନୁହେଁ ଲାଲ କିଲା ତଳେ ଶିବଲିଙ୍ଗ ଥିବା ଦାବି କରି ସେ କହିଛନ୍ତି, ଯଦି ଏହି ଦେଶ ମଧ୍ୟରେ ମନ୍ଦିର ଏବଂ ମସଜିଦ୍ ମଧ୍ୟରେ ବିବାଦ ଜାରି ରହେ, ତେବେ ଦେଶ କେବେ ବି ଆଗକୁ ବଢ଼ିପାରିବ ନାହିଁ। ଏହା ମଧ୍ୟ ମୁଁ ପୂର୍ବରୁ କହିଛି। ଯଦି ତୁମେ ଶିବଲିଙ୍ଗଙ୍କୁ ଖୋଜିବାକୁ ଚାହୁଁଛ, ତେବେ ମୁଁ ସ୍ବପ୍ନରେ ଦେଖିଛି ଯେ ରାଷ୍ଟ୍ରପତି ଭବନ ଏବଂ ଲାଲ କିଲା ତଳେ ମଧ୍ୟ ଶିବଲିଙ୍ଗ ଅଛି। ସରକାର ଉଭୟ ସ୍ଥାନରେ ଖନନ କାର୍ଯ୍ୟ କରିବା ଉଚିତ ବୋଲି ସେ କହିଛନ୍ତି।
