ମହାକାଳପଡ଼ା, ୭ା୫(ପ୍ରତାପ ଚନ୍ଦ୍ର ସ୍ବାଇଁ): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଅଞ୍ଚଳର ମତ୍ସ୍ୟଜୀବୀମାନେ ନିଜ ନିଜ ଗୁଜୁରାଣ ମେଣ୍ଟାଇବା ପାଇଁ ମହାନଦୀରୁ ମାଛ ମାରି ଜୀବିକା ନିର୍ବାହ କରନ୍ତି। କିନ୍ତୁ ମାର୍ଚ୍ଚରୁ ମେ’ ପର୍ଯ୍ୟନ୍ତ କାଳବୈଶାଖୀ ପ୍ରଭାବ ଯୋଗୁ ମାଛଧରିବାକୁ ଯାଉଥିବା ହୁଲିଡଙ୍ଗା ବିପଦର କାରଣ ସାଜିଛି ।
ବିଶେଷ କରି ଏହି ସମୟରେ କାଳବୈଶାଖୀ ପ୍ରଭାବ ଓ ପୂର୍ଣ୍ଣିମା ତିଥିରେ ସାମୁଦ୍ରିକ ଜୁଆର ଉଚ୍ଚ ଢେଉ ପାରମ୍ପରିକ ସମସ୍ୟାକୁ ଦ୍ୱିଗୁଣିତ କରୁଛି। କାରଣ ମତ୍ସ୍ୟଜୀବୀମାନେ ସକାଳୁ ରାତି ପର୍ଯ୍ୟନ୍ତ ମହାନଦୀରେ ଜାଲ ବସାଇ ମାଛ ମାରନ୍ତି।
ବିଶେଷ କରି ଖଇଙ୍ଗା, ଭେକ୍ଟି, ଖାସୁଲି, ଡେମା, ଅଳତା ପୋଟେଇ, ହରକୁରା, ଖୁରାଣ୍ଟ, କୋକଲ, ଚାଁଆରା ଓ ଚିଙ୍ଗୁଡ଼ି ଆଦି ବିଭିନ୍ନ କିସମର ମାଛ ଧରି ନିକଟ ହାଟ ବଜାର ଓ ପାରାଦୀପ ବଡ ବଡ ଫିସେରିରେ ବିକ୍ରି କରି ବେଶ୍ ଦୁଇ ପଇସା ରୋଜଗାର କରନ୍ତି ବୋଲି ଟୁକୁନା ବେହେରା, ଭାବଗ୍ରାହୀ ବେହେରା, ଖଗେଶ୍ୱର ବେହେରା ଓ ବିଘ୍ନେଶ୍ୱର ଦାସ ପ୍ରମୁଖ ମତବ୍ୟକ୍ତ କରିଛନ୍ତି।
ଅପରପକ୍ଷରେ ପଣାସଂକ୍ରାନ୍ତିଠାରୁ ସନ୍ଧ୍ୟା ସମୟରେ କାଳବୈଶାଖୀ ମାଡ଼ିଆସୁଛି। ଫଳରେ ଛୋଟ ଛୋଟ ହୁଲିଡଙ୍ଗାଗୁଡ଼ିକ ମହାନଦୀରେ ଉଚ୍ଚ ଜୁଆର ଓ କାଳବୈଶାଖୀ ପବନ ଢେଉରେ ଅଘଟଣ ଆଶଙ୍କା ରହିଛି। ଫଳରେ ବାଧ୍ୟ ହୋଇ ଛୋଟ ଛୋଟ ହୁଲିଡଙ୍ଗାଗୁଡ଼ିକ ମହାନଦୀ କୂଳରେ ବାନ୍ଧିବାକୁ ପଡ଼ୁଛି ବୋଲି କହିଛନ୍ତି। ଆସନ୍ତା ୧ ମାସ ମଧ୍ୟରେ ଦକ୍ଷିଣ ପଶ୍ଚିମ ମୌସୁମୀ ବାୟୁ ବଙ୍ଗୋପସାଗର ଉପକୂଳ ଅଞ୍ଚଳରେ ପ୍ରବେଶ କରିବା ଓ ବନ୍ୟା ଜଳରେ ସମୁଦ୍ର ସଂଲଗ୍ନ ମୁହାଣ ମହାନଦୀରେ ଇଲିଶ ପଡ଼ିବା ସହିତ ବେଶ୍ ଦୁଇ ପଇସା ରୋଜଗାର ହେବ ବୋଲି କୁହାଯାଉଛି। ମତ୍ସ୍ୟଜୀବୀମାନଙ୍କ କହିବା କଥା ସପ୍ତାହ ପୂର୍ବେ ସନ୍ଧ୍ୟା ସମୟରେ ଏକ ବଡ ଧରଣର କାଳବୈଶାଖୀ ଓ ସାମୁଦ୍ରିକ ଉଚ୍ଚ ତରଙ୍ଗ ପ୍ରଭାବ ଯୋଗୁ କୂଳରେ ବହୁ ସଂଖ୍ୟାରେ ହୁଲିଡଙ୍ଗା ବନ୍ଧାଯାଇଛି।
