ପୁରୀ, ୭ା୫(ମନୋଜ କୁମାର ଦଳାଇ):ପଶ୍ଚିମବଙ୍ଗରେ ମମତା ବାନାର୍ଜୀଙ୍କ ସରକାରର ପତନ ଘଟିଛି। ମହାପ୍ରଭୁ ଶ୍ରୀଜଗନ୍ନାଥଙ୍କୁ ନେଇ ରାଜନୀତି କରିବା ତାଙ୍କୁ ମହଙ୍ଗା ପଡ଼ିଛି ବୋଲି ଚର୍ଚ୍ଚା ହେଉଛି। ମମତା ପଶ୍ଚିମବଙ୍ଗର ଦୀଘାରେ ଏକ ଜଗନ୍ନାଥ ମନ୍ଦିର ନିର୍ମାଣ କରି ତା’ର ନାମ ‘ଦୀଘା ଜଗନ୍ନାଥ ଧାମ’ ରଖିଥିଲେ। ଏହାକୁ ନେଇ ଜଗନ୍ନାଥପ୍ରେମୀ, ସେବାୟତ, ଗବେଷକ ଏବଂ ବୁଦ୍ଧିଜୀବୀ ମହଲରେ ତୀବ୍ର ଅସନ୍ତୋଷ ପ୍ରକାଶ ପାଇଥିଲା। ଏହାର ପରିଣାମସ୍ବରୂପ ଚଳିତ ନିର୍ବାଚନରେ ତାଙ୍କ ସରକାରର ପତନ ଘଟିଛି। ପୁରୀ ରଥଖଳାରେ ଏବେ ଏହି ଚର୍ଚ୍ଚା ଜୋର୍ ଧରିଛି ଯେ, ମହାପ୍ରଭୁଙ୍କୁ ନେଇ ରାଜନୀତି କରିଥିବା ମମତା ଏବେ ତାଙ୍କ ଫଳ ପାଇଛନ୍ତି। ମମତାଙ୍କ ସରକାର ପଶ୍ଚିମବଙ୍ଗରୁ ହଟିବା ପରେ, ଦୀଘା ଜଗନ୍ନାଥ ମନ୍ଦିରରୁ ‘ଧାମ’ ଲେଖା ତୁରନ୍ତ ହଟାଇବା ପାଇଁ ମହାପ୍ରଭୁଙ୍କ ମୁଖ୍ୟ ବିଶ୍ୱକର୍ମା ଓ ଭୋଇ ସର୍ଦ୍ଦାରଙ୍କ ସମେତ ଅନେକ ସେବାୟତ ଏବଂ ଭକ୍ତ ଦାବି କରିଛନ୍ତି।
୨୦୨୫ ମସିହା ଅକ୍ଷୟତୃତୀୟା ଦିନ ଦୀଘାରେ ଏକ ଜଗନ୍ନାଥ ମନ୍ଦିର ନିର୍ମାଣ ହୋଇଥିଲା। ପଶ୍ଚିମବଙ୍ଗର ତତ୍କାଳୀନ ମୁଖ୍ୟମନ୍ତ୍ରୀ ତଥା ତୃଣମୂଳ କଂଗ୍ରେସ(ଟିଏମ୍ସି) ମୁଖ୍ୟ ମମତା ବାନାର୍ଜୀ ଏହି ମନ୍ଦିରର ଉଦ୍ଘାଟନ କରିଥିଲେ। ପରେ ମନ୍ଦିର ଚତୁଃପାଶର୍ବରେ ବିଭିନ୍ନ ଜାଗାରେ ହୋର୍ଡିଂ ଓ ସ୍ଥାୟୀ ସେଲ୍ଫି ପଏଣ୍ଟ ଜଗନ୍ନାଥ ଧାମ ନାମରେ କରି ଲଗାଇଥିଲେ। ଅନ୍ୟପଟେ ପଶ୍ଚିମବଙ୍ଗରେ ଦିଦିଙ୍କ ସରକାର ଯିବା ପରେ ଏବେ ଦୀଘା ଜଗନ୍ନାଥ ମନ୍ଦିରରୁ ଧାମ ଶବ୍ଦ ହଟିବ ବୋଲି ଆଶା ସଞ୍ଚାର ହୋଇଛି। ଦୀଘା ଜଗନ୍ନାଥ ମନ୍ଦିରକୁ ଜଗନ୍ନାଥ ଧାମ ଲେଖାଯିବାକୁ ନେଇ ଓଡ଼ିଶାରେ ଜନଅସନ୍ତୋଷ ଦେଖିବାକୁ ମିଳିଥିଲା। ଏହି ପ୍ରସଙ୍ଗରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏବଂ ଗଜପତି ମହାରାଜା ଦିବ୍ୟସିଂହ ଦେବ ସେତେବେଳେ ମମତାଙ୍କୁ ଚିଠି ଲେଖି ଅବଗତ କରାଇଥିଲେ ମଧ୍ୟ ସେ ଜିଦ୍ରେ ଅଟଳ ରହି କାହାରି କଥା ଶୁଣି ନ ଥିଲେ।
ଟିଏମ୍ସି ସରକାର ପରିବର୍ତ୍ତନ ପରେ କେବେ ଜଗନ୍ନାଥ ଧାମ ଶବ୍ଦ ହଟିବ, ତାକୁ ନେଇ ଚର୍ଚ୍ଚା ଜୋର୍ ଧରିଲାଣି। ସେହିପରି ମମତା ସରକାର କେବଳ ଧାମ ଶବ୍ଦ ନୁହେଁ, ପଥର ମୂର୍ତ୍ତି, ସ୍ନାନଯାତ୍ରାରେ ଓମ୍ଫେଡ୍ କ୍ଷୀର ବ୍ୟବହାର, ଗ୍ୟାସ୍ରେ ପ୍ରସାଦ ତିଆରି, ପ୍ରସାଦକୁ ମହାପ୍ରସାଦ ନାମକରଣ କରିଥିଲେ। ଏହିସବୁ ଘଟଣାକୁ ନେଇ ଜଗନ୍ନାଥପ୍ରେମୀଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଥିଲା। ଏବେ ଧାମ ଶବ୍ଦ ହଟାଯିବାକୁ ଶ୍ରୀମନ୍ଦିର ସେବାୟତ ଓ ଭକ୍ତ ଦାବି କରିଛନ୍ତି। ଏ ସଂକ୍ରାନ୍ତରେ ଆଇନ ମନ୍ତ୍ରୀ ପୃଥ୍ବୀରାଜ ହରିଚନ୍ଦନ କହିଛନ୍ତି, ପଶ୍ଚିମବଙ୍ଗରେ ଭାଜପା ସରକାର ଶପଥ ନେବା ପରେ ଦୀଘା ଜଗନ୍ନାଥ ମନ୍ଦିରରୁ ଧାମ ଶବ୍ଦ ହଟିବା ନେଇ ପ୍ରକ୍ରିୟା ଆରମ୍ଭ ହେବ। ଓଡ଼ିଶା ସରକାର ପଶ୍ଚିମବଙ୍ଗର ନୂତନ ସରକାରଙ୍କ ସହ ଆଲୋଚନା କରି ଧାମ ଶବ୍ଦ ହଟାଇବାକୁ ପଦକ୍ଷେପ ନେବେ ବୋଲି ହରିଚନ୍ଦନ ସୂଚନା ଦେଇଛନ୍ତି। ସେହିପରି ପଶ୍ଚିମବଙ୍ଗ ପଟାସପୁର ବିଧାନସଭା ନିର୍ବାଚନମଣ୍ଡଳୀର ନବନିର୍ବାଚିତ ଭାଜପା ବିଧାୟକ ତପନ ମାଇତି କହିଛନ୍ତି, ପୁରୀ ଜଗନ୍ନାଥ ମନ୍ଦିରକୁ ଛୋଟ କରିବା ପାଇଁ ଦୀଘାରେ ମମତା ଏଭଳି ପ୍ରୟାସ କରିଥିଲେ। ତେଣୁ ସେ ଦୀଘା ଜଗନ୍ନାଥ ମନ୍ଦିରକୁ ଯାଇ ନ ଥିଲେ। ଏବେ ସେ ମନ୍ଦିର ଦର୍ଶନ କରିଛନ୍ତି। ତୁରନ୍ତ ଧାମ ଶବ୍ଦ ହଟାଇବା ପାଇଁ ସେ ନୂଆ ସରକାରଙ୍କୁ ଅନୁରୋଧ କରିବେ ବୋଲି ମାଇତି ପ୍ରକାଶ କରିଛନ୍ତି।
Dharitri – Odisha’s No.1 Odia Daily
