ଲକ୍ଷ୍ନୌ: ମହାଭାରତରେ ଧ୍ରୁତରାଷ୍ଟ୍ର ଅନ୍ଧ ଥିବାବେଳେ ସ୍ତ୍ରୀ ଗାନ୍ଧାରୀ ତାଙ୍କ ସ୍ବାମୀଙ୍କ ପାଇଁ ନିଜ ଆଖିରେ ପଟି ବାନ୍ଧି ସାରାଜୀବନ ଅତିବାହିତ କରିଥିଲେ। ତେବେ ରାମ ମନ୍ଦିରର ପ୍ରାଣପ୍ରତିଷ୍ଠା ହେବାକୁ ଥିବାବେଳେ ଜଣେ ଯୁବତୀ ତାଙ୍କ ଆଖିରେ ପଟି ବାନ୍ଧି ଏକ କାରନାମା ଦେଖାଇଛନ୍ତି, ଯାହା ସମସ୍ତଙ୍କୁ ଚକିତ କରିଛି। ବିହାରର ଦରଭଙ୍ଗାର ୨୧ ବର୍ଷୀୟା ମୋନିକା ଗୁପ୍ତା ନିଜ ଆଖିରେ ପଟି ବାନ୍ଧି ରଙ୍ଗୋଲି ମାଧ୍ୟମରେ ଅଯୋଧ୍ୟାରେ ଭଗବାନ୍ ରାମଙ୍କ ମନ୍ଦିର ଆଙ୍କିଛନ୍ତି। ମୋନିକା ରସାୟନ ବିଜ୍ଞାନରେ ସ୍ନାତକ କରିଥିବାବେଳେ ଏବେ ସେ ସ୍ନାତକୋତ୍ତର ପଢୁଛନ୍ତି। ସେ ୪୫୦ କି.ମି. ଦୂର ଦରଭଙ୍ଗାରୁ ରାମଙ୍କ ପ୍ରାଣପ୍ରତିଷ୍ଠା ଉତ୍ସବରେ ଯୋଗଦେବାକୁ ଆସି ଅଯୋଧ୍ୟାରେ ପହଞ୍ଚତ୍ଛନ୍ତି। ମୋନିକା କହିଛନ୍ତି, ଏଠାରେ ତାଙ୍କୁ ୬ଷ୍ଠ ଇନ୍ଦ୍ରିୟକୁ ଜାଗ୍ରତ ରଖିବାକୁ ପଡ଼ିଥାଏ। ଏହା ପରେ ଯାଇ ଆଖିରେ ପଟି ବାନ୍ଧିଲେ ବି ତାଙ୍କୁ ସଫା ସଫା ଦେଖାଯାଏ। ସେ ଆଖି ବନ୍ଦ କରି କିଛି ବି କରିପାରିବେ ବୋଲି ଦାବି କରିଛନ୍ତି। ମୋନିକା ମହାଭାରତର ଅର୍ଜୁନ ଏବଂ ସଞ୍ଜୟଙ୍କଠାରୁ ପ୍ରେରିତ ହୋଇଛନ୍ତି। ସେ ୮ ବର୍ଷ ବୟସରୁ ଆଖିରେ ପଟି ବାନ୍ଧି ସବୁକିଛି ଦେଖିପାରିବା ସହ ସମସ୍ତ କାର୍ଯ୍ୟ ମଧ୍ୟ କରିପାରନ୍ତି। ଆସନ୍ତା ୨୨ ତାରିଖରେ ଉତ୍ସବ ହେବାକୁ ଥିବାବେଳେ ଏଥିରେ ବାବା ରାମଦେବ, ମୋହନ୍ ଭାଗବତ, ଖେଳାଳି ସଚିନ ତେନ୍ଦୁଲକର, ବିରାଟ କୋହଲିଙ୍କ ସମେତ ଅନେକ ଭିଆଇପି ଅତିଥି, କଳାକାର ସାମିଲ ହେବେ।
