ନୂଆଦିଲ୍ଲୀ,୧୮ା୩: ଭାରତର ପ୍ରଧାନ ବିଚାରପତି (ସିଜେଆଇ) ଡି.ଓ୍ବାଇ. ଚନ୍ଦ୍ରଚୂଡ଼ଙ୍କୁ ସୋସିଆଲ ମିଡିଆରେ ଟାର୍ଗେଟ କରି ଟ୍ରୋଲ କରୁଥିବା ଅଭିଯୁକ୍ତମାନଙ୍କ ବିରୋଧରେ ତୁରନ୍ତ କାର୍ଯ୍ୟାନୁଷ୍ଠାନ ଦାବିରେ ବିରୋଧୀ ଦଳର ୧୩ ଜଣ ନେତା ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ପତ୍ର ଲେଖିଛନ୍ତି। ରାଜ୍ୟ ସଭାର କଂଗ୍ରେସ ସଦସ୍ୟ ବିବେକ କେ. ତାଙ୍ଖାଙ୍କ ନେତୃତ୍ୱରେ ଲେଖାଯାଇଥିବା ଉକ୍ତ ପତ୍ରରେ ଦଳର ଦିଗ୍ବିଜୟ ସିଂ, ଶକ୍ତିସିଂ ଗୋହିଲ, ପ୍ରମୋଦ ତିଓ୍ବାରୀ, ଆମି ୟାଗ୍ନିକ, ରଞ୍ଜିତ ରଞ୍ଜନ, ଇମ୍ରାନ ପ୍ରତାପଗର୍ହିଙ୍କ ସମେତ ଏଏପିର ରାଘବ ଚଢ଼ା, ଶିବସେନା (ୟୁବିଟି) ସଦସ୍ୟ ପ୍ରିୟଙ୍କା ଚତୁର୍ବେଦୀ ଏବଂ ସମାଜବାଦୀ ପାର୍ଟିର ଜୟା ବଚ୍ଚନ ଓ ରାମଗୋପାଳ ଯାଦବ ସ୍ବାକ୍ଷର କରିଛନ୍ତି। ଏହି ପ୍ରସଙ୍ଗରେ ତାଙ୍ଖା ଆଟର୍ନି ଜେନେରାଲ ଆର୍. ଭେଙ୍କଟରମଣୀଙ୍କ ପାଖକୁ ମଧ୍ୟ ଅନ୍ୟ ଏକ ପତ୍ର ଲେଖିଛନ୍ତି। ମହାରାଷ୍ଟ୍ରରେ ରାଜ୍ୟପାଳଙ୍କ ଭୂମିକା ଏବଂ ସରକାର ଗଠନ ମାମଲା ସିଜେଆଇଙ୍କ ଅଧ୍ୟକ୍ଷତାରେ ଗଠିତ ସାମ୍ବିଧାନିକ ପୀଠରେ ବିଚାରାଧୀନ ଥିବାବେଳେ ଶାସକ ଦଳର ସ୍ବାର୍ଥକୁ ସମ୍ଭବତଃ ସହାନୁଭୂତି ଦେଖାଇ ଟ୍ରୋଲ୍ ଆର୍ମି ଜଷ୍ଟିସ୍ ଚନ୍ଦ୍ରଚୂଡ଼ଙ୍କ ବିରୋଧରେ ଅପମାନଜନକ ମନ୍ତବ୍ୟ ସୋସିଆଲ ମିଡିଆରେ ପୋଷ୍ଟ କରିଥିଲେ। ଏଭଳି ଅରୁଚିକର ଏବଂ ନିନ୍ଦନୀୟ ମନ୍ତବ୍ୟ ସୋସିଆଲ ମିଡିଆରେ ଲକ୍ଷ ଲକ୍ଷ ଲୋକଙ୍କ ଦୃଷ୍ଟି ଆକର୍ଷଣ କରିଥିଲା ବୋଲି ବିରୋଧୀ ନେତାମାନେ ଅଭିଯୋଗ କରିଛନ୍ତି।
