ନବରଙ୍ଗପୁର,୧୬।୪(ସଦାଶିବ ପ୍ରହରାଜ): ଛାତ୍ରାବାସରୁ ଜଣେ ଅଷ୍ଟମ ଶ୍ରେଣୀ ଛାତ୍ରଙ୍କ ଝୁଲନ୍ତା ଶବ ଉଦ୍ଧାର କରାଯାଇଛି। ମୃତ୍ୟୁର କାରଣ ଏପର୍ଯ୍ୟନ୍ତ ଅସ୍ପଷ୍ଟ ଥିବାବେଳେ ଏହାକୁ ନେଇ ଅଞ୍ଚଳରେ ଚାଞ୍ଚଲ୍ୟ ଖେଳିଯାଇଛି। ଏଭଳି ଏକ ଅଭାବନୀୟ ଘଟଣା ଘଟିଛି ନବରଙ୍ଗପୁର ଜିଲା ଉମରକୋଟ ବ୍ଲକ ଅନ୍ତର୍ଗତ ଭାମିନି ଆଶ୍ରମ ବିଦ୍ୟାଳୟରେ । ମୃତ ଛାତ୍ର ଜଣକ ହେଉଛନ୍ତି ବଡ଼ କୁମାରୀ ଗ୍ରାମର ପରମେଶ୍ୱର ଭତ୍ରାଙ୍କ ୧୨ ବର୍ଷର ପୁଅ ପ୍ରଶାନ୍ତ ଭତ୍ରା।
ସୂଚନା ଅନୁଯାୟୀ, ପ୍ରଶାନ୍ତ ମାତ୍ର ଦୁଇ ଦିନ ତଳେ ହିଁ ଘରୁ ଛାତ୍ରାବାସକୁ ଆସିଥିଲେ । କିନ୍ତୁ ଆଜି ହଠାତ୍ ତାଙ୍କର ଝୁଲନ୍ତା ଶବ ଉଦ୍ଧାର ହେବା ସମସ୍ତଙ୍କୁ ଚକିତ କରିଛି । ଘଟଣାସ୍ଥଳରେ ପୋଲିସ ପହଞ୍ଚି ଶବ ଜବତ କରିବା ସହ ତଦନ୍ତ ଆରମ୍ଭ କରିଛି। ତେବେ କେଉଁ କାରଣ ପାଇଁ ପ୍ରଶାନ୍ତ ଏଭଳି ଚରମ ନିଷ୍ପତ୍ତି ନେଲେ, ତାହା ଏବେ ବି ରହସ୍ୟ ଘେରରେ।
ଅନ୍ୟପଟେ ଛାତ୍ରାବାସରେ ଛାତ୍ରଙ୍କ ସୁରକ୍ଷାକୁ ନେଇ ଏବେ ପ୍ରଶ୍ନବାଚୀ ସୃଷ୍ଟି ହୋଇଛି । ଛାତ୍ର ଜଣକ ଆତ୍ମହତ୍ୟା କଲା ବେଳେ ଛାତ୍ରାବାସ ଦାୟିତ୍ୱରେ ଥିବା ପ୍ରଧାନ ଶିକ୍ଷକ କିମ୍ବା ୱାର୍ଡେନ (Warden) କିଭଳି କିଛି ଜାଣିପାରିଲେ ନାହିଁ, ତାହାକୁ ନେଇ ସ୍ଥାନୀୟ ଲୋକେ ସନ୍ଦେହ ପ୍ରକାଶ କରିଛନ୍ତି ।
Dharitri – Odisha’s No.1 Odia Daily
