ନୂଆଦିଲ୍ଲୀ,୨୬।୧: ଦେଶ ଆଜି ୭୪ତମ ଗଣତନ୍ତ୍ର ଦିବସ ପାଳନ କରୁଛି। ଏହି ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପଗଡ଼ି ହୃଦୟ ଜିତିଥିବା ବେଳେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଶାଢ଼ି ଲୋକଙ୍କ ଦୃଷ୍ଟି ଆକର୍ଷଣ କରିଛି। ସେ ପ୍ରାୟତଃ ରେଶମରୁ ନିର୍ମିତ ଶାଢ଼ି ପିନ୍ଧିଥାନ୍ତି। ହେଲେ ଏଥର ଗଣତନ୍ତ୍ର ଦିବସରେ ସେ ଓଡ଼ିଶା ରେଶମ ଶାଢ଼ିକୁ ବାଛିଛନ୍ତି। ପୂର୍ବରୁ ରାଷ୍ଟ୍ରପତି ମୁର୍ମୁ ଶପଥ ଗ୍ରହଣ ସମାରୋହରେ ସାନ୍ତାଳୀ ଶାଢ଼ି ପିନ୍ଧିଥିଲେ।
ଗୋଲାପୀ ଏବଂ ଧଳା ରଙ୍ଗର ଶାଢ଼ି ସହ ରାଷ୍ଟ୍ରପତି ଏକ ବାଦାମୀ ରଙ୍ଗର ଶଲ୍ ପିନ୍ଧିଥିଲେ। କର୍ତ୍ତବ୍ୟ ପଥରେ ତାଙ୍କ ଆଗମନ ବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ତାଙ୍କର ସ୍ବାଗତ କରିଥିଲେ। ବାୟୁସେନା ଅଧିକାରୀ ଫ୍ଲାଇଟ ଲେଫ୍ଟନାଣ୍ଟ କୋମଲ ରାନୀ ଜାତୀୟ ପତାକା ଉତ୍ତୋଳନ କରିଥିଲେ। ଏଥିସହ ଜାତୀୟ ସଙ୍ଗୀତ ବାଜିବା ସହ ରାଷ୍ଟ୍ରପତିଙ୍କୁ ୨୧ ତୋପ ସଲାମୀ ଦିଆଯାଇଥିଲା।
ସେହିଭଳି ପ୍ରଧାନମନ୍ତ୍ରୀ ମୋଦି ଭାରତର ବିବିଧତାର ପ୍ରତୀକ ବହୁ ରଙ୍ଗର ରାଜସ୍ଥାନୀ ପଗଡ଼ି ପିନ୍ଧିଥିଲେ। ଏହାଛଡ଼ା ସେ ଧଳା କୁର୍ତ୍ତା ଏବଂ କଳା କୋଟ-ପ୍ୟାଣ୍ଟ ସହ ଏକ ଧଳା ଶଲ୍ ପିନ୍ଧିଥିଲେ।
