ନୂଆଦିଲ୍ଲୀ,୨୫।୧ : ଇଜିପ୍ଟର ରାଷ୍ଟ୍ରପତି ଅବଦେଲ ଫତହ ଏଲ ସିସି ବୁଧବାର ରାଷ୍ଟ୍ରପତି ଭବନରେ ପହଞ୍ଚିଛନ୍ତି। ସେଠାରେ ତାଙ୍କୁ ଗାର୍ଡ ଅଫ ଅନର ପ୍ରଦାନ କରାଯାଇଛି। ତାଙ୍କୁ ରାଷ୍ଟ୍ରପତି ଭବନରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସ୍ବାଗତ କରିଥିଲେ। ଇଜିପ୍ଟର ରାଷ୍ଟ୍ରପତି ସାଧାରଣତନ୍ତ୍ର ଦିବସରେ ମୁଖ୍ୟ ଅତିଥି ଭାବରେ ଯୋଗଦେବେ। ରାଷ୍ଟ୍ରପତି ଏଲ ସିସି ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ମଧ୍ୟରେ ଗୁରୁତ୍ୱପୂର୍ଣ୍ଣ ଆଲୋଚନା ହେବ, ଯେଉଁଥିରେ ବ୍ୟବସାୟ, ପ୍ରତିରକ୍ଷା ସମେତ ଅନେକ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଉପରେ ଆଲୋଚନା ହେବା ବୋଲି କୁହାଯାଉଛି।
ହାଇଦ୍ରାବାଦ ହାଉସରେ ପ୍ରଧାନମନ୍ତ୍ରୀ ମୋଦି ଏବଂ ଏଲ ସିସିଙ୍କ ମଧ୍ୟରେ ଏକ ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହେବ। ଭାରତରୁ ଅନେକ ପ୍ରତିରକ୍ଷା ଉପକରଣ ଏବଂ ଯୁଦ୍ଧ ବିମାନ କିଣିବାକୁ ଇଜିପ୍ଟ ଆଗ୍ରହ ଦେଖାଇଛି। ଯୁଦ୍ଧ ବିମାନର ଇଞ୍ଜିନ ଏକାଠି କରିବା ପାଇଁ ଦୁଇ ଦେଶ ମଧ୍ୟରେ ସହଯୋଗ ଉପରେ ମଧ୍ୟ ଆଲୋଚନା ହୋଇପାରେ।
କରୋନା ମହାମାରୀ ପରେ ଭାରତ ଏବଂ ଇଜିପ୍ଟ ମଧ୍ୟରେ ବ୍ୟବସାୟ ଆରମ୍ଭ ହୋଇଛି। ୨୦୨୧-୨୨ଆର୍ଥିକ ବର୍ଷରେ ଭାରତ ଏବଂ ଇଜିପ୍ଟ ମଧ୍ୟରେ ବାଣିଜ୍ୟ ୭.୨୬ ବିଲିୟନ ଡ଼ଲାରରେ ପହଞ୍ଚିଛି ଏବଂ ପୂର୍ବ ବର୍ଷ ତୁଳନାରେ ଏହା ଅଧିକ ରହିଛି। ୨୦୨୬-୨୭ ଆର୍ଥିକ ବର୍ଷ ସୁଦ୍ଧା ଦୁଇ ଦେଶ ମଧ୍ୟରେ ଦ୍ୱିପାକ୍ଷିକ ବାଣିଜ୍ୟ ୧୨ ବିଲିୟନ ଡ଼ଲାରରେ ପହଞ୍ଚିବାକୁ ଲକ୍ଷ୍ୟ ରଖାଯାଇଛି। ଇଜିପ୍ଟ ମଧ୍ୟ ସୁଇଜ କେନାଲକୁ ବିସ୍ତାର କରୁଛି ଏବଂ ଭାରତ ମଧ୍ୟ ଏଥିରେ ପୁଞ୍ଜି ବିନିଯୋଗର ସୁଯୋଗ ଖୋଜୁଛି। ଇଜିପ୍ଟର ରାଷ୍ଟ୍ରପତି ମଧ୍ୟ ଭାରତୀୟ ବହିର୍ବ୍ୟାପାର ମନ୍ତ୍ରୀ ଏସ ଜୟଶଙ୍କରଙ୍କ ସହ ଆଲୋଚନା କରିବେ।
ଏଲ ସିସି ମୁଖ୍ୟ ଅତିଥି ଭାବରେ ୨୬ ଜାନୁୟାରୀ ୨୦୨୩ ରେ ଆୟୋଜିତ ହେବାକୁ ଥିବା ସାଧାରଣତନ୍ତ୍ର ଦିବସ ପରେଡରେ ଯୋଗଦେବେ। ଇଜିପ୍ଟ ସୈନ୍ୟବାହିନୀର ଏକ ଦଳ ମଧ୍ୟ ପରେଡରେ ଭାଗ ନେବେ।
