ବରଗଡ଼,୨୫।୫(ପ୍ରେମାନନ୍ଦ ଖମାରୀ):ସୋମବାର ଅପରାହ୍ନ ପ୍ରାୟ ୩ଟାରେ କାଳବୈଶାଖୀ ପ୍ରଭାବରେ ହୋଇଥିବା ଝଡବତାସରେ ବରଗଡ଼ ସହର ଥାନା ଛକରେ ଲକ୍ଷଲକ୍ଷ ଟଙ୍କା ବ୍ୟୟରେ ନିର୍ମିତ ଧନୁଯାତ୍ରା ତୋରଣ ଭାଙ୍ଗି ଯାଇ ରାସ୍ତା ଉପରେ ପଡ଼ିଛି। ତୋରଣ ଭାଙ୍ଗି ପଡିବାରୁ ସେଠାରେ ରହିଥିବା ୨ ରିକ୍ସା ଚାଳକ ଗୁରୁତର ଆହତ ହୋଇଛନ୍ତି । ତେବେ ଏହି ଘଟଣା ପରେ ସହରରେ ଚାପା ଅସନ୍ତୋଷ ଲାଗି ରହିଛି। ବରଗଡ଼ ପୌରାଧ୍ୟକ୍ଷା କଳ୍ପନା ମାଝୀ ବରଗଡ଼ ଟାଉନ ଥାନାରେ ଏତଲା ଦେଇଛନ୍ତି। ତୋରଣ ନିର୍ମାଣ ହୋଇଥିବା ସ୍ଥାନଟି ପୌର ପରିଷଦ ଅଞ୍ଚଳରେ ରହିଛି । ମାତ୍ର ତୋରଣ ନିର୍ମାଣ ନେଇ ପୌର ପରିଷଦର ଅନୁମତି ନିଆଯାଇ ନ ଥିଲା। ତୋରଣ ନିର୍ମାଣରେ ନିମ୍ନମାନର କାମ ହୋଇଥିବା ଯୋଗୁ ତାହା ସାମାନ୍ୟ ଝଡବତାସରେ ଭାଙ୍ଗି ଯାଇଛି ଏବଂ ୨ ରିକ୍ସା ଚାଳକ ଆହତ ହୋଇଛନ୍ତି। ଏଥିରେ ପୌରାଧ୍ୟକ୍ଷା ମାଝୀ ପୂର୍ତ୍ତ ବିଭାଗ ଅଧୀକ୍ଷଣ ଯନ୍ତ୍ରୀ ଅରୁଣ ପାଣ୍ଡେଙ୍କୁ ଦାୟୀ କରି ତାଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ନେବାକୁ ଦାବି କରିଛନ୍ତି।
Dharitri – Odisha’s No.1 Odia Daily
