ଯାଜପୁର ଅଫିସ,୧୮।୮: ବୈତରଣୀ ନଦୀର ଶାଖା କାଣୀ ନଦୀର ବ୍ରହ୍ମଚାରୀପାଟଣା ଗ୍ରାମଠାରେ ସୋମବାର ୧୦୦ ଫୁଟ୍ର ଘାଇ ସୃଷ୍ଟି ହେବା ଫଳରେ ଅଦ୍ୟାବଧି ଦଶରଥପୁର ବ୍ଲକ ଅଧୀନ ୧୧ ପଞ୍ଚାୟତର ୩୩ ଗ୍ରାମର ୧୩,୬୬୫ ଲୋକ ପ୍ରଭାବିତ ହୋଇଛନ୍ତି। ତେବେ ବୁଧବାର ବନ୍ୟାଜଳ ସାମାନ୍ୟ ହ୍ରାସ ପାଇଥିଲାବେଳେ ଜଳସେଚନ ବିଭାଗ ତରଫରୁ ଘାଇ ମରାମତି ପାଇଁ ବାଲିବସ୍ତା ଓ ବହ୍ଲା ଆଦି ଜମା କରାଯାଇଥିବା ଦେଖିବାକୁ ମିଳିଛି। ସେହିପରି ବନ୍ୟାଜଳ ସାମାନ୍ୟ ହ୍ରାସ ପାଇଥିଲେ ମଧ୍ୟ ଜନସାଧାରଣଙ୍କ ଦୁର୍ଦ୍ଦଶା କମିନାହିଁ। ବିଭିନ୍ନ ଗ୍ରାମର ମୂଖ୍ୟ ରାସ୍ତାଗୁଡିକ ବୁଡି ରହିଥିବା ଯୋଗୁ ଏବେ ମଧ୍ୟ ବହୁ ଗ୍ରାମକୁ ଯୋଗାଯୋଗ ସମ୍ଭବପର ହୋଇପାରୁ ନାହିଁ। ଗୃହପାଳିତ ପଶୁମାନଙ୍କୁ ନଦୀ ବନ୍ଧ ଓ ମୂଖ୍ୟ ରାସ୍ତାର ଶୁଖିଲା ସ୍ଥାନ ମାନଙ୍କରେ ବନ୍ଧା ଯାଇଥିବାର ଦେଖାଯାଇଛି। କାଣୀ ନଦୀର ବନ୍ୟା ଜଳ ସିଧାସଳଖ କସପା ପଞ୍ଚାୟତର ବ୍ରହ୍ମଚାରୀ ପାଟଣା ସମେତ ସମସ୍ତ ପଞ୍ଚାୟତକୁ ପ୍ରଭାବିତ କରିଛି। କାଣୀ ନଦୀର ବନ୍ୟାଜଳ କସପା, ମଲ୍ଲିକାପୁର, ଶୁଶୁଆ, ଦୁଦୁରାଅଣ୍ଟା, ଦତ୍ତପୁର, କମାରଡିହି, କୟାଁ ଓ ନିଜାମପୁର ଆଦି ପଞ୍ଚାୟତର ବ୍ୟାପକ ଅଞ୍ଚଳ ଜଳମଗ୍ନ ହୋଇଛି। ଅପରପକ୍ଷରେ ବୈତରଣୀ ନଦୀର ବନ୍ୟାଜଳ କଟିକଟା ଓ ଜୟନ୍ତରା ପଞ୍ଚାୟତର କେତେକ ଗ୍ରାମରେ ପଶି ବ୍ୟାପକ କ୍ଷୟକ୍ଷତି ଘଟାଇଛି। ରାଜସ୍ବ ମନ୍ତ୍ରୀ ପ୍ରମିଳା ମଲ୍ଲିକ, ଯାଜପୁର ବିଧାୟକ ପ୍ରଣବ ପ୍ରକାଶ ଦାସ, ଯାଜପୁର ଜିଲାପାଳ ଚକ୍ରବର୍ତ୍ତୀ ସିଂ ରାଠୋର, ଜଳସେଚନ ବିଭାଗର ଅଧୀକ୍ଷଣ ଯନ୍ତ୍ରୀ ଧନେଶ୍ୱର ସାମଲ, ଦଶରଥପୁର ବିଡିଓ ଶ୍ୱେତା ସ୍ନିଗ୍ଧା ପ୍ରମୁଖ ଘାଇ ହୋଇଥିବା ସ୍ଥାନ ସମେତ ବନ୍ୟା ପ୍ରଭାବିତ ଅଞ୍ଚଳ ପରିଦର୍ଶନ କରିଛନ୍ତି। ପ୍ରଶାସନ ତରଫରୁ ମିଳିଥିବା ସୂଚନା ଅନୁଯାୟୀ ବୁଧବାର ସୁଦ୍ଧା ୪୧୪.୧୭ ହେକ୍ଟର ଚାଷ ଜମି କ୍ଷତି ହୋଇଛି। ଅପରପକ୍ଷରେ ପ୍ରଶାସନ ତରଫରୁ ଦତ୍ତପୁର ବ୍ୟତିତ ଅନ୍ୟ ୧୦ ଗୋଟି ପଞ୍ଚାୟତକୁ ୭୦ କୁଇଣ୍ଟାଲ ଚୂଡା, ୧୨.୫ କୁଇଣ୍ଟାଲ ଗୁଡ ଓ ୨୧୧ କୁଇଣ୍ଟାଲ ଗୋଖାଦ୍ୟ ପ୍ରଦାନ କରାଯାଇଥିବା ସୂଚନା ମିଳିଛି।
