ଭେଡ଼େନ,୨୫।୫ (ହୃଷିକେଶ ଖମାରୀ): ଦିନକୁ ଦିନ ତାପମାତ୍ରା ବଢ଼ି ଚାଲିଥିବା ବେଳେ ଲୋକେ ଗାଧୋଇବା ଓ ପାନୀୟ ଜଳ ପାଇଁ ଡହଳ ବିକଳ ହେଉଛନ୍ତି । ବରଗଡ଼ ଜିଲା ଭେଡ଼େନ ବ୍ଳକ ଦେଶଭଟଲି ପଞ୍ଚାୟତ କାର୍ଯ୍ୟାଳୟର ଅନତିଦୂରରେ ରହିଥିବା ପାଣିଘରା ପୋଖରୀକୁ ଆଦର୍ଶ ପୋଖରୀ କରିବା ସହିତ ଯୁଦ୍ଧକାଳୀନ ଭିତ୍ତିରେ ମାଟିକାମ ଏବଂ ପଙ୍କୋଦ୍ଧାର କାମ ଆରମ୍ଭ କରିବା ଦାବି ହୋଇଛି।
ଏହି ଦାବି ନେଇ ସୋମବାର ଦେଶଭଟଲି ଗ୍ରାମର ମହିଳା ଗୋଷ୍ଠୀ ଏକତ୍ରିତ ହୋଇ ପଞ୍ଚାୟତ କାର୍ଯ୍ୟାଳୟକୁ ଆସିଥିଲେ । କାର୍ଯ୍ୟାଳୟ ଭିତରେ ଦେଶଭଟଲି ସରପଞ୍ଚ ତୋଷବନ୍ତ ସାହୁ, ଗୁରୁଚରଣ ଦନ୍ତା, ଦନାର୍ଦ୍ଦନ ବେହେରା , ପଞ୍ଚାୟତ କାର୍ଯ୍ୟାଳୟ ଥିବାବେଲେ ବାହାର ପଟରୁ ମହିଲାମାନେ ତାଲା ପକାଇ ଦେଇଥିଲେ ।
ଫଳରେ ପଞ୍ଚାୟତ କାର୍ଯ୍ୟାଳୟ ସମ୍ମୁଖରେ ଚାପା ଉତ୍ତେଜନା ଦେଖାଯାଇଥିଲା। ଘଟଣା ସ୍ଥଳକୁ ଭେଡ଼େନ ଥାନା ଆଇଆଇସିଙ୍କ ନିର୍ଦ୍ଦେଶରେ ରୁଷୁଡ଼ା ଫାଣ୍ଡିର ପୋଲିସ କର୍ମଚାରୀ ବୀରେନ ପ୍ରଧାନ, ପୋଲିସ ଷ୍ଟାପ ପହଞ୍ଚି ଆନ୍ଦୋଳନକାରୀଙ୍କ ସହିତ ଆଲୋଚନା ଜାରି ରଖିଥିଲେ । ଆଲୋଚନା ପରେ ପୋଲିସ ପଞ୍ଚାୟତ କାର୍ଯ୍ୟାଳୟ ଭିତରୁ ସରପଞ୍ଚ ଏବଂ ଅନ୍ୟମାନଙ୍କୁ ବାହାରକୁ ଆଣି ଆଲୋଚନା ଜାରି ରଖିଛନ୍ତି ।
