ପାପଡ଼ାହାଣ୍ଡି, ୪ା୭(ଡି.ଏନ୍.ଏ.): ପ୍ରଶାସନ ପକ୍ଷରୁ ସଫା କରାଯାଉନି ନାଳ। ଫଳରେ ସାମାନ୍ୟ ବର୍ଷାରେ ମଧ୍ୟ ଡ୍ରେନ୍ ପାଣି ରାସ୍ତାରେ ଭାସିବା ସହ ଦୋକାନରେ ପଶିଯାଉଛି। ଶେଷରେ ବାଧ୍ୟହୋଇ ଦୋକାନୀମାନେ ନାଳ ସଫା କରିଛନ୍ତି। ଏପରି ଘଟଣା ନବରଙ୍ଗପୁର ଜିଲା ପାପଡାହାଣ୍ଡିରେ ଦେଖିବାକୁ ମିଳିଛି। ଶନିବାର ସକାଳୁ ପାପଡ଼ାହାଣ୍ଡିରେ ବର୍ଷା ହୋଇଥିଲା। ବର୍ଷା ଯୋଗୁ ଉମରକୋଟ ରାସ୍ତାର ବହୁ ଦୋକାନରେ ପାଣି ପଶିଯାଇଛି। ପାଣିରେ ଭିଜି ଦୋକାନର ବହୁ ଆସବାବ ପତ୍ର ନଷ୍ଟ ହୋଇଛି। ସ୍ଥାନୀୟ ଦୋକାନୀ ଅସୁବିଧାର ସମ୍ମୁଖୀନ ହୋଇଥିଲେ। ଏହାପରେ ସେମାନେ ନିଜେ ନାଳ ସଫା କରିଥିଲେ। ପ୍ରତ୍ୟେକ ବର୍ଷ ବର୍ଷା ହେଲେ ଏପରି ହଇରାଣ ହେଉଛୁ। ନାଳଗୁଡିକୁ ପ୍ରଶାସନ ସଫା କରୁନାହିଁ। ନାଳରେ କାଗଜ, ଜରି, ପଲିଥିନ ଆଦି ପଡି ପୋତି ହୋଇଯାଇଥିଲା। ଫଳରେ ଟିକିଏ ବର୍ଷା ହେଲେ ମଧ୍ୟ ନାଳପାଣି ଦୋକାନରେ ପଶିଯାଏ । ତେଣୁ ବାଧ୍ୟହୋଇ ନିଜେ ନାଳ ସଫା କରିଛୁ ବୋଲି ଦୋକାନୀମାନେ କହିଛନ୍ତି।
