ଭୁବନେଶ୍ୱର,୧୪।୧(ବ୍ୟୁରୋ): ଓଡ଼ିଶାରେ ପ୍ରତି ୧୦୦ ଦୁର୍ଘଟଣାରେ ୪୮ଜଣଙ୍କ ଜୀବନ ଯାଉଛି, ଯାହା ଜାତୀୟ ହାର ତୁଳନାରେ ଅଧିକ। ଏଥିଲାଗି ସୁପ୍ରିମକୋର୍ଟ କମିଟି ବାରମ୍ବାର ତାଗିଦ୍ କରୁଥିଲେ ମଧ୍ୟ ଆଖିଦୃଶିଆ ଫଳ ମିଳୁନାହିଁ। ୨୦୨୦ ତୁଳନାରେ ୨୦୨୧ ଜାନୁୟାରୀରୁ ସେପ୍ଟେମ୍ବର ମଧ୍ୟରେ ରାଜ୍ୟରେ ସଡ଼କ ଦୁର୍ଘଟଣାଜନିତ ମୃତ୍ୟୁ ୧୫.୯୮% ବଢ଼ିଛି। ଦୁର୍ଘଟଣାରେ ଗୁରୁତର ହୋଇଥିବା ବ୍ୟକ୍ତିଙ୍କ ପାଇଁ ପ୍ରଥମ ୪୮ ଘଣ୍ଟା ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ତ୍ୱରିତ ଚିକିତ୍ସା ସେବା ଯୋଗାଇ ଦିଆଗଲେ ଜୀବନ ବଞ୍ଚାଯାଇପାରିବ। ଦୁର୍ଘଟଣାଗ୍ରସ୍ତଙ୍କୁ ଟ୍ରମା ଚିକିତ୍ସା ଯୋଗାଇଦେବା ଲାଗି ରାଜ୍ୟ ସରକାରଙ୍କ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ୨୦୨୦-୨୧ରୁ ୨୦୨୪-୨୫ ଆର୍ଥିକ ବର୍ଷ ଯାଏ ୧୪୭.୨ କୋଟି ଟଙ୍କାର ବଜେଟ କରାଯାଇଛି। ଏଥିରେ ୧୧ ଘରୋଇ ହସ୍ପିଟାଲକୁ ଯୋଡ଼ାଯାଇଛି। ରାଉରକେଲାର ଜେ.ପି. ହସ୍ପିଟାଲରେ ଚିକିତ୍ସା ଲାଗି ଜିଲା ଖଣିଜ ପାଣ୍ଠିରୁ ଅର୍ଥ ଖର୍ଚ୍ଚ କରାଯିବ ବୋଲି ସ୍ବାସ୍ଥ୍ୟ ବିଭାଗ ପକ୍ଷରୁ ଏକ ଚିଠି ମାଧ୍ୟମରେ ସୂଚନା ଦିଆଯାଇଛି। ରାଜ୍ୟରେ ସଡ଼କ ଦୁର୍ଘଟଣାରେ ମସ୍ତିଷ୍କ ଆଘାତପ୍ରାପ୍ତ ରୋଗୀଙ୍କ ସଂଖ୍ୟା ବଢ଼ିବାରେ ଲାଗିଛି। ରାଜ୍ୟ ସରକାର ୨୦୧୯ ଅକ୍ଟୋବର ୧୦ରୁ ଏଭଳି ଦୁର୍ଘଟଣାଗ୍ରସ୍ତଙ୍କ ଚିକିତ୍ସା ଟ୍ରମା ଫଣ୍ଡ୍ ଜରିଆରେ କରୁଛନ୍ତି। ସଡ଼କ ସୁରକ୍ଷା ପାଣ୍ଠିରୁ ଏଥିଲାଗି ଅର୍ଥ ଖର୍ଚ୍ଚ କରାଯାଉଛି। ଫ୍ରି ଟ୍ରିଟ୍ମେଣ୍ଟ ଫର୍ ଟ୍ରମା ଫଣ୍ଡ୍ (ଏଫ୍ଟିଟିଏଫ୍) ଭଳି ଅଭିନବ ଯୋଜନା ପ୍ରସ୍ତୁତ କରାଯାଇଛି। ଏ ବାବଦରେ ପ୍ରତିବର୍ଷ ୨୯ କୋଟି ଟଙ୍କା ଲେଖାଏ ଖର୍ଚ୍ଚ ହେବାକୁ ଥିବାବେଳେ ମାନବ ସମ୍ବଳ ପାଇଁ ବାର୍ଷିକ ୧୩ ଲକ୍ଷ ବ୍ୟୟ କରାଯିବ।
