ରାୟଗଡ଼ା ଅଫିସ,୩୧ା୧୨: ପିଲା ଅଭାବ ଦର୍ଶାଇ ରାଜ୍ୟ ସରକାର ଅନେକ ସ୍କୁଲ ବନ୍ଦ କଲେ। ପରେ କରୋନା ଯୋଗୁ ଦୀର୍ଘ ୨ ବର୍ଷ ହେଲା ପ୍ରାଥମିକ ସ୍କୁଲଗୁଡ଼ିକ ମଧ୍ୟ ବନ୍ଦ ରହିଛି। ଦୀର୍ଘ ୨ ବର୍ଷ ଧରି ସ୍କୁଲ ବନ୍ଦର ସୁଯୋଗ ନେଇଛି ଆନ୍ଧ୍ର। ଆନ୍ଧ୍ର ସୀମାନ୍ତ ଅଞ୍ଚଳରେ ଥିବା ଓଡ଼ିଶା ସ୍କୁଲର ଛାତ୍ରୀଛାତ୍ର ଏବେ ଆନ୍ଧ୍ର ସ୍କୁଲରେ ପାଠ ପଢ଼ୁଥିବା ଦେଖିବାକୁ ମିଳିଛି। ଓଡ଼ିଶା ସ୍କୁଲରେ ପିଲା ନ ଥିବାରୁ ତାଲା ପଡ଼ୁଥିବାବେଳେ ଆନ୍ଧ୍ର ପକ୍ଷରୁ ଓଡ଼ିଶା ପିଲାଙ୍କୁ ବିନା ଟିସିରେ ନେଇ ସ୍କୁଲରେ ପାଠ ପଢ଼ାଇବା ସହ ବିଭିନ୍ନ ସୁବିଧା ଯୋଗାଯାଉଛି। ରାୟଗଡ଼ା ଜିଲାରୁ ଆସିଛି ଏଭଳି ଖବର।
ଓଡ଼ିଶାରେ ପ୍ରାଥମିକ ସ୍କୁଲ ବନ୍ଦ ଥିବାବେଳେ ଜୁନ୍ରୁ ଆନ୍ଧ୍ରର ସମସ୍ତ ସ୍କୁଲ ଖୋଲି ପାଠପଢ଼ା ଚାଲିଛି। ସୀମାନ୍ତ ରାୟଗଡ଼ା ସଦର ବ୍ଲକ କେରେଡ଼ା ଉଚ୍ଚ ପ୍ରାଥମିକ ବିଦ୍ୟାଳୟର ଅନେକ ଛାତ୍ରୀଛାତ୍ର ଆନ୍ଧ୍ର ସ୍କୁଲକୁ ଯାଉଥିବା ଜଣାପଡ଼ିଛି। ଏ ନେଇ କେରେଡ଼ା ଉଚ୍ଚ ପ୍ରାଥମିକ ବିଦ୍ୟାଳୟର ପ୍ରଧାନ ଶିକ୍ଷୟିତ୍ରୀ ପି. ଲକ୍ଷ୍ମୀ କହିଛନ୍ତି, ବିନା ଟିସିରେ ଆନ୍ଧ୍ର ବିଦ୍ୟାଳୟରେ ଏଠାକାର ପିଲା ଯାଇ ପାଠ ପଢ଼ୁଛନ୍ତି। ଗୁରୁବାର ଜଣେ ଅଭିଭାବକ ଆସି ଟିସି ପାଇଁ ଆବେଦନ କରିଥିଲେ। ଏବିଇଓଙ୍କ ଅନୁମତି ମାଗିଛି। ଅନୁମତି ମିଳିଲେ ଟିସି ଦିଆଯିବ ବୋଲି ସେ କହିଛନ୍ତି।
ସୂଚନାଯୋଗ୍ୟ, ଛାତ୍ରୀଛାତ୍ର ନ ଥିବା ଦର୍ଶାଇ ରାଜ୍ୟ ସରକାର ରାୟଗଡ଼ା ଜିଲାର ୩୯୧ ସ୍କୁଲକୁ ବନ୍ଦ କରିଛନ୍ତି। ୨୦୧୯-୨୦ ରେ ୩୧୪ ସ୍କୁଲ ଏବଂ ୨୦୨୦-୨୧ ରେ ଆଉ ୭୭ ସ୍କୁଲ ବନ୍ଦ କରାଯାଇଥିଲା। ସେହିପରି କରୋନା ଯୋଗୁ ୧୧୬୨ ପ୍ରାଥମିକ ବିଦ୍ୟାଳୟ, ୨୩୮ ସେକେଣ୍ଡାରି ସ୍କୁଲ ଏବଂ ୫୭୭ ୟୁପି ସ୍କୁଲରେ ୧ମ ରୁ ୫ମ ଶ୍ରେଣୀ ପର୍ଯ୍ୟନ୍ତ ପାଠପଢ଼ା ବନ୍ଦ ରହିଛି। ଆନ୍ଧ୍ର ପକ୍ଷରୁ ଓଡ଼ିଶାର ଛାତ୍ରୀଛାତ୍ରଙ୍କୁ ଆମ୍ମା ବୋଡ଼ି ଯୋଜନାରେ ସାମିଲ କରି ମାଗଣାରେ ପାଠ ପଢ଼ାଇବା ସହ ଖାଦ୍ୟ, ସ୍କୁଲ ପୋଷାକ ଏବଂ ବର୍ଷକୁ ୩୦ ହଜାର ଟଙ୍କା ବୃତ୍ତି ପ୍ରଦାନ କରୁଥିବା ଜଣାପଡ଼ିଛି। ଦୀର୍ଘଦିନ ଧରି ରାଜ୍ୟରେ ସ୍କୁଲ ବନ୍ଦ ଯୋଗୁ ଏଭଳି ପରିସ୍ଥିତି ଉପୁଜିଛି ବୋଲି ବୁଦ୍ଧିଜୀବୀଙ୍କ ମଧ୍ୟରେ ମତପ୍ରକାଶ ପାଇଛି। ଅନ୍ୟପକ୍ଷରେ ଜାନୁୟାରୀରୁ ସ୍କୁଲ ଖୋଲିଲେ ଏହି ପିଲାମାନେ ଓଡ଼ିଶା ସ୍କୁଲକୁ ଫେରିବେ କି ନାହିଁ ତାହାକୁ ନେଇ ମଧ୍ୟ ଆଶଙ୍କା ପ୍ରକାଶ ପାଇଛି। ଏ ବିଷୟରେ ରାୟଗଡ଼ା ଡିଇଓ ପୂର୍ଣ୍ଣଚନ୍ଦ୍ର ବରିହାଙ୍କୁ ପଚାରିବାରୁ ଘଟଣାକୁ ଗୁରୁତର ସହ ନେଇ ତଦନ୍ତ କରାଯିବ ବୋଲି କହିଛନ୍ତି।
