ଚଣ୍ଡିଗଡ଼, ୨୯।୮: ହରିୟାଣାର କର୍ନଲ ଜିଲାରେ ଶନିବାର ଭାଜପାର ଏକ ବୈଠକକୁ ବିରୋଧ କରି କୃଷକ ସଂଗଠନ ପକ୍ଷରୁ ବିକ୍ଷୋଭ ପ୍ରଦର୍ଶନ କରାଯାଇଥିଲା। ସେମାନଙ୍କୁ ଘଉଡ଼ାଇବାକୁ ଯାଇ ପୋଲିସ ଲାଠିଚାଳନା କରିବାରୁ ୧୦ ଜଣ ଚାଷୀ ଆହତ ହୋଇଛନ୍ତି। ହରିୟାଣା ପୋଲିସର ଏଭଳି ବର୍ବରତା ବିରୋଧରେ ଉତ୍ତ୍ୟକ୍ତ ଚାଷୀମାନେ ବିଭିନ୍ନ ସ୍ଥାନରେ ରାସ୍ତା ଅବରୋଧ କରିଛନ୍ତି। କର୍ନଲଠାରେ ମୁଖ୍ୟମନ୍ତ୍ରୀ ମନୋହରଲାଲ୍ ଖଟ୍ଟାରଙ୍କ ନେତୃତ୍ୱରେ ଭାଜପା ବୈଠକ ବସି ଆଗାମୀ ମ୍ୟୁନିସିପାଲ ନିର୍ବାଚନ ସମ୍ପର୍କରେ ଆଲୋଚନା ହେବାର ଥିଲା। ଏହି ରାଜ୍ୟସ୍ତରୀୟ ବୈଠକରେ ଭାଜପା ରାଜ୍ୟ ସଭାପତି ଓ.ପି. ଧନଖର ଉପସ୍ଥିତ ଥିଲେ। ଚାଷୀଙ୍କ ବିକ୍ଷୋଭ ଯୋଗୁ ୩ ନମ୍ବର ଜାତୀୟ ରାଜପଥ, ଦିଲ୍ଲୀ-ଅମୃତସର ରାଜପଥ ସମେତ ବିଭିନ୍ନ ରାସ୍ତା ଏବଂ ଅମ୍ବାଲା ରାସ୍ତାରେ ଥିବା ଶମ୍ଭୁ ଟୋଲ୍ ପ୍ଲାଜାରେ ଟ୍ରାଫିକ୍ ସମସ୍ୟା ସୃଷ୍ଟି ହୋଇଥିଲା। ଚାଷୀମାନେ ରାସ୍ତା ଉପରେ ଖଟିଆ ପକାଇ ଓ ବସିରହି ଅବରୋଧ କରିଥିବା ଦେଖାଯାଇଛି। ଫଳରେ ଅନୂ୍ୟନ ୩ କିଲୋମିଟର ପର୍ଯ୍ୟନ୍ତ ଗାଡ଼ିମୋଟର ରାସ୍ତାରେ ଉଭୟ ପାର୍ଶ୍ୱରେ ଅଟକି ରହିଛି। କାହାର କାର୍ଯ୍ୟକ୍ରମରେ କେହି ପ୍ରତିବନ୍ଧକ ସୃଷ୍ଟି କରିପାରିବେ ନାହିଁ। ସେମାନେ ଶାନ୍ତିପୂର୍ଣ୍ଣ ଏବଂ ଗଣତାନ୍ତ୍ରିକ ଉପାୟରେ ପ୍ରସଙ୍ଗ ଉଠାଇବାକୁ ଅନୁମତି ଦିଆଯାଇଛି। ତେବେ ପୋଲିସ ଉପରକୁ ଟେକା ଫିଙ୍ଗିବା ଓ ରାସ୍ତା ଅବରୋଧ କରିବାକୁ ଦିଆଯିବ ନାହିଁ ବୋଲି ମୁଖ୍ୟମନ୍ତ୍ରୀ ଖଟ୍ଟାର କହିଛନ୍ତି। ପୋଲିସ ତା’ର କାର୍ଯ୍ୟାନୁଷ୍ଠାନ ନେଇଛି ବୋଲି ସେ କହିଛନ୍ତି। ଅନ୍ୟପକ୍ଷରେ କର୍ନଲରେ ପୋଲିସର ବର୍ବରୋଚିତ କାର୍ଯ୍ୟାନୁଷ୍ଠାନକୁ କଂଗ୍ରେସ ପକ୍ଷରୁ ସମାଲୋଚନା କରାଯାଇଛି। କଂଗ୍ରେସ ନେତା ରାହୁଲ ଗାନ୍ଧୀ ଘଟଣାକୁ ନିନ୍ଦା କରିଛନ୍ତି। ଲାଠିମାଡ଼ରେ ଚାଷୀ ଲହୁଲୁହାଣ ହେବା ଲଜ୍ଜାଜନକ ବୋଲି ସେ ଟୁଇଟ୍ କରିଛନ୍ତି।
