ସାଧାରଣତଃ ଏକାସାଙ୍ଗରେ ମହିଳା ୬ ସନ୍ତାନ ଜନ୍ମ ଦେଇଥିବା ଆଗରୁ ଅନେକ ଖବର ଶୁଣିବାକୁ ମିଳିଛି। ମାତ୍ର ଏବେ ଜଣେ ମହିଳା ଗୋଟିଏ ସନ୍ତାନ ଜନ୍ମ ଦେବାର ୫ ଦିନ ପରେ ଆଉ ଦୁଇ ସନ୍ତାନକୁ ଜନ୍ମ ଦେଇଛନ୍ତି। ୩ ପିଲା ଏବେ ସୁସ୍ଥ ଅଛନ୍ତି। ଏପରି ଘଟଣା ଦେଖିବାକୁ ମିଳିଛି ନ୍ୟୁୟର୍କରେ। ଡେଲିଭରି ମଧ୍ୟରେ ସର୍ବାଧିକ ସମୟ ଅନ୍ତରାଳ ରଖି ମହିଳା ଜଣଙ୍କ ଓ୍ବାଲର୍ଡ ରେକର୍ଡ ବି ସୃଷ୍ଟି କରିଛନ୍ତି।
ନ୍ୟୁୟର୍କର ୩୩ ବର୍ଷୀୟା କାୟଲି ଡେଶେନ ଡିସେମ୍ବର ୨୮ରେ ପ୍ରଥମ ସନ୍ତାନ ଜନ୍ମ ଦେଇଥିଲେ। ଏହାର ୫ ଦିନ ପରେ ଅର୍ଥାତ ଜାନୁୟାରୀ ୨ରେ ଜାଆଁଳା ସନ୍ତାନ ଜନ୍ମ ଦେଇଥିଲେ। ବିଶେଷ କଥା ହେଲା ୨୨ ସପ୍ତାହ ଡେଲିଭରି ମଧ୍ୟରେ ସନ୍ତାନ ବଞ୍ଚିବା ୯ ପ୍ରତିଶତ ସମ୍ଭାବନା ରହିଥାଏ। ମାତ୍ର କାୟଲିଙ୍କ ତିନି ସନ୍ତାନ ସୁସ୍ଥ ଅଛନ୍ତି। ବର୍ତ୍ତମାନ ସେମାନେ ୫ ମାସର ହୋଇଗଲେଣି।
କାୟଲି କହିଛନ୍ତି, ସେ ୪ ବର୍ଷ ହେଲା ମା’ ହେବାକୁ ଚେଷ୍ଟା କରୁଥିଲେ। ଏହା ପରେ ତାଙ୍କ ସ୍ବାମୀ ବ୍ରେଡନ ଜଣେ ଆୟୁର୍ବେଦିକ ଡାକ୍ତରଙ୍କ ପରାମର୍ଶ ନେଇଥିଲେ। ଏହିକ୍ରମେ କାୟଲି ଗର୍ଭଧାରଣ କରିଥିଲେ। ପ୍ରଥମେ ତାଙ୍କର ଏକ ପୁତ୍ର ସନ୍ତାନ ଜନ୍ମ ହୋଇଥିଲା। ପରେ ଦୁଇ କନ୍ୟା ସନ୍ତାନ ଜନ୍ମ ହୋଇଥିଲେ।
