ଲୋଇସିଂହା, ୯।୯ (ଡି.ଏନ୍.ଏ): ବଲାଙ୍ଗୀର ଜିଲା ଲୋଇସିଂହା ବ୍ଲକ ଅଂଚଲରେ ଗଲା ଗୁରୁବାରନୁ ବରଷା ଲାଗି ରହିଛେ। ଇ ବରଷାରେ ବ୍ଲକ ଅଧୀନ ନେଗିପାଲି ଗଁାର ଝନେ ନିସାହା ବିଧବା ବୁଢ଼ିକଁର ଘର ଭାଂଗି ଯାଇଛେ। ଘରେ ଖାଇପିଇ ମା’ ଆର ଦୁଇ ଝି’ ଶୁଇଥିଲାବେଲେ ଅଲପ୍କେ ସେମାନେ ଗୁଟେ ବଡ଼ ବିପଦ୍ରୁ ବରତି ଯାଇଛନ୍।
ସୂଚନା ହିସାବେ ଲୋଇସିଂହା ବ୍ଲକ ବୁଢ଼ିପଦର ପଁଚେତ୍ ଅଧୀନ ନେଗିପାଲି ଗଁାର ନିସାହା ବିଧବା ଦୈମତି ମେଶ୍ୱା(୬୫)। ପରିବାର କହେଲେ ୨ ଝି’କେ ନେଇ ତାକର ସଁସାର। ଜମିବାଡ଼ି ବିଶେଷ କିଛି ନାଇଁ। ବଛର କେତେ ତଲେ ଦୈମତି ଆପ୍ନେ ଦେବାରକେ ହରେଇଛନ୍। ଏନ୍ତାଥି ତାକର ଦଦ୍ରା ମାଏଟ୍ କୁରିଆଟା ୩ ପରାନୀ ମୁଡ଼ ଗୁଁଜ୍ବାର ଲାଗି ସାହାଭରସା ଥିଲା। ଫିଦିନ ଲେଖେଁ ୩ ମା’ଝି ଖାଇପିଇ ଘରର ପାଟେନ ଉପରକେ ଶୁଇବାକେ ଯାଇଥିଲେ। ହେଲେ ଝରି ବରଷା ଲାଗି ରାତି ପାଖାପାଖି ୩ ବଜେ ହଠାତ୍ ଘରର ପଛ୍ଫାଲର କଁାଥିଟା ମାଡ଼ି ବସ୍ଲା। କେହେନ୍ସି ମିତି ମା’ଝି ଇ ଘଟନା ଜାନିପାରି ପାଟେନ ଉପ୍ରୁ ତଲେକେ ପଲେଇ ଆସିଥିଲେ। ଉପ୍ରୁ ଉତିରଲାବେଲେ ଦୈମତିକଁର ଗୁଡ଼େ ଗୁଟେ ଇଟା ପଡ଼ିଯିବାର ଲାଗି ସେ ଅଲପ୍ ଖଁଡ଼ିଆ ହେଇଛନ୍। ସାହାଭରସା ପାଲଟିଥିବାର ଘରଟା ଭାଂଗି ଯିବାର ଲାଗି ଅସାହା ପରିବାରଟା ଦୁଖେ ଭାଂଗି ପଡ଼ିଛନ୍। ଇଆଡ଼େ ବଏସ୍ ଅଧ୍କା ହେବାର ଲାଗି ଦୈମତି କୁଲିମଜୁରି ବି କରି ନାଇଁପାରବାର। ପଁଚେତ୍ରୁ ମିଲୁଥିବାର ପିଡିଏସ୍ ଚାଉଲ ଆର ବିଧବା ଭତାରେ ୩ ମା’ଝି ଦୁଖେସୁଖେ ଚଲୁଛନ୍। ଏନ୍ତା ଅଭାବ ଅନାଟନ ଭିତ୍ରେ ସେମାନେ ଘରଟେ ତିଆରିବାର ସପନ୍ ବି ନାଇଁ ଦେଖିପାରବାର। ଏହେଦେ ଇ ବରଷା ଦିନେ ଦୁଇ ଯୁଆନ୍ ଝି’କେ ଧରି କେନ୍କେ ଯିବେ, କାହାକେ ଗୁହାରି କରବେ, କିଏ ଆଶ୍ରେ ଦେବା, ଏନ୍ତା ନାନା କଥା ଚିନ୍ତା କରି ଦୈମତି ଲହ ଗଡ଼ଉଛନ୍। ଦୈମତି ଥାନୀୟ ସରପଁଚ୍କୁଁ ସାହାଯ୍ ଲାଗି ଗୁହାରି କରିଥିଲେ। ହେଲେ ସରପଁଚ୍ ଦୈମତିକୁଁ ପହେଲା ତହସିଲଦାରକୁଁ ଭେଟବାର ଲାଗି ପରାମଶ ଦେଇଥିବାର ସେ କହିଛନ୍। ଇ ନିସାହା ପରିବାର ଉପରେ ଜିଲା, ବ୍ଲକ ପରଶାସନ ଆର ଥାନୀୟ ବିଧାୟକ ଦୁରୁଷ୍ଟି ଦେଇ ଯେତେ ଜଲ୍ଦି ହେବା ଆବାସ ଯୋଜନାରେ ପକାଘର ଖଁଡ଼େ ଯୁଗେଇ ଦେବାକେ ଗଁାବାସୀ, ଜନସାଧାରନ ଦାବି କରିଛନ୍।
