ନୂଆଦିଲ୍ଲୀ,୨୦ା୧: ବୁଲା କୁକୁର ମାମଲାରେ ପ୍ରାଣୀ ଅଧିକାର କର୍ମୀ ତଥା ପୂର୍ବତନ କେନ୍ଦ୍ର ମନ୍ତ୍ରୀ ମେନକା ଗାନ୍ଧୀଙ୍କୁ ସୁପ୍ରିମକୋର୍ଟ କଡ଼ା ସମାଲୋଚନା କରିଛନ୍ତି। ଏକ ପଡକାଷ୍ଟରେ କୋର୍ଟଙ୍କ ମନ୍ତବ୍ୟକୁ ନେଇ ମେନକା ଦେଇଥିବା ପ୍ରତିକ୍ରିୟା ଏବଂ ତାଙ୍କର “ବଡି ଲାଙ୍ଗୁଏଜ୍”କୁ ନେଇ ଖଣ୍ଡପୀଠ ଅସନ୍ତୋଷ ବ୍ୟକ୍ତ କରିଛନ୍ତି।
ଜଷ୍ଟିସ ବିକ୍ରମ ନାଥ, ଜଷ୍ଟିସ ସନ୍ଦୀପ ମେହେଟ୍ଟା ଏବଂ ଜଷ୍ଟିସ ଏନ.ଭି. ଅଞ୍ଜାରିଆଙ୍କୁ ନେଇ ଗଠିତ ଖଣ୍ଡପୀଠ କହିଛନ୍ତି ଯେ, ମେନକା ଗାନ୍ଧୀଙ୍କ ମନ୍ତବ୍ୟ ଅଦାଲତ ଅବମାନନା ସଦୃଶ। କିନ୍ତୁ କୋର୍ଟ ନିଜର “ଉଦାରତା” ଦେଖାଇ ତାଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରୁନାହାନ୍ତି। ଖଣ୍ଡପୀଠ ମେନକାଙ୍କ ଓକିଲ ରାଜୁ ରାମଚନ୍ଦ୍ରନଙ୍କୁ ପ୍ରଶ୍ନ କରିଥିଲେ, “ଆପଣଙ୍କ କ୍ଲାଏଣ୍ଟ କିଭଳି ମନ୍ତବ୍ୟ ଦେଉଛନ୍ତି ଆପଣ ଜାଣିଛନ୍ତି କି? ସେ କୋର୍ଟଙ୍କ ଅବମାନନା କରିଛନ୍ତି। ଆପଣ ତାଙ୍କ ପଡକାଷ୍ଟ ଶୁଣିଛନ୍ତି କି? ସେ କ’ଣ କହୁଛନ୍ତି ଏବଂ କିଭଳି ଢଙ୍ଗରେ କହୁଛନ୍ତି ତାହା ଦେଖିଛନ୍ତି କି?”
ବୁଲା କୁକୁରଙ୍କୁ ଖାଦ୍ୟ ଦେଉଥିବା ବ୍ୟକ୍ତି ମାନେ କୁକୁର କାମୁଡ଼ା ପାଇଁ ଦାୟୀ ରହିବେ ବୋଲି କୋର୍ଟ ପୂର୍ବରୁ କହିଥିଲେ। ଏହାକୁ ନେଇ ପ୍ରଶ୍ନ ଉଠିବାରୁ କୋର୍ଟ ସ୍ପଷ୍ଟ କରିଛନ୍ତି ଯେ, ଏହି ମନ୍ତବ୍ୟ କୌଣସି ପରିହାସ ନଥିଲା, ବରଂ କୋର୍ଟ ଏହାକୁ ଅତ୍ୟନ୍ତ ଗମ୍ଭୀରତାର ସହ କହିଥିଲେ।
ମେନକା ଗାନ୍ଧୀ ଜଣେ ପ୍ରାଣୀ ଅଧିକାର କର୍ମୀ ଏବଂ ପୂର୍ବତନ କ୍ୟାବିନେଟ୍ ମନ୍ତ୍ରୀ ହୋଇଥିବାରୁ, ବୁଲା କୁକୁର ସମସ୍ୟାର ସମାଧାନ ପାଇଁ ସେ ବଜେଟ୍ରେ କ’ଣ ଅବଦାନ ରଖିଛନ୍ତି ବୋଲି କୋର୍ଟ ପ୍ରଶ୍ନ କରିଥିଲେ।
ଶୁଣାଣି ବେଳେ ଓକିଲ ରାମଚନ୍ଦ୍ରନ କହିଥିଲେ ଯେ ସେ ଆତଙ୍କବାଦୀ ଅଜମଲ କସାବଙ୍କ ପାଇଁ ମଧ୍ୟ ଲଢ଼ିଥିଲେ। ଏହାର ଉତ୍ତରରେ ଜଷ୍ଟିସ ନାଥ କହିଥିଲେ, “କସାବ ଅଦାଲତ ଅବମାନନା କରିନଥିଲା, କିନ୍ତୁ ଆପଣଙ୍କ କ୍ଲାଏଣ୍ଟ କରିଛନ୍ତି।”
ଆବେଦନକାରୀଙ୍କ ପକ୍ଷରୁ ଓକିଲ ପ୍ରଶାନ୍ତ ଭୂଷଣ କହିଥିଲେ ଯେ ବନ୍ଧ୍ୟାକରଣ ଦ୍ୱାରା କୁକୁରଙ୍କ ହିଂସ୍ର ପ୍ରବୃତ୍ତି କମିଥାଏ, କିନ୍ତୁ ଅଧିକାଂଶ ସହରରେ ଏହା ଠିକ୍ ଭାବେ କାର୍ଯ୍ୟକାରୀ ହେଉନାହିଁ। ସେ ଆହୁରି ମଧ୍ୟ କହିଥିଲେ ଯେ କୋର୍ଟଙ୍କ ମନ୍ତବ୍ୟ ଯୋଗୁଁ କୁକୁର ଖୁଆଉଥିବା ଲୋକଙ୍କୁ ସ୍ଥାନୀୟ ଲୋକେ ଆକ୍ରମଣ କରୁଛନ୍ତି।
ସୂଚନାଯୋଗ୍ୟ ଯେ, ଗତ ଶୁଣାଣିରେ ସୁପ୍ରିମକୋର୍ଟ କହିଥିଲେ ଯେ ବୁଲା କୁକୁର ଆକ୍ରମଣରେ ଶିଶୁ କିମ୍ବା ବୃଦ୍ଧଙ୍କ ମୃତ୍ୟୁ ବା ଆହତ ହେଲେ ରାଜ୍ୟ ସରକାରଙ୍କୁ ମୋଟା ଅଙ୍କର କ୍ଷତିପୂରଣ ଦେବାକୁ ପଡ଼ିବ। ଏଥିସହ ବୁଲା କୁକୁରଙ୍କୁ ଖାଦ୍ୟ ଦେଉଥିବା ଲୋକଙ୍କୁ ମଧ୍ୟ ଉତ୍ତରଦାୟୀ କରାଯିବ।
