ବାରିପଦା,୨୧ା୪(ନୀଳାଦ୍ରି ବିହାରୀ ଦଣ୍ଡପାଟ): ମୟୂରଭଞ୍ଜ ଜିଲା ବାରିପଦା ସଦର ଥାନା ଅଞ୍ଚଳ ଢେଙ୍କିନେଞ୍ଜିଆ ୟୁପିଟିଓ ସ୍କୁଲର ଜନଗଣନା କାର୍ଯ୍ୟରେ ନିୟୋଜିତ ଥିବା ଶିକ୍ଷୟିତ୍ରୀ ନିଖୋଜ ଘଟଣା । ବାଲେଶ୍ୱର ରେଳ ଷ୍ଟେଶନରୁ ଉଦ୍ଧାର କଲା ପୋଲିସ । ବାରିପଦା ସଦର ପୋଲିସ ଘଟଣାକୁ ଗୁରୁତ୍ବର ସହ ନେଇ ମୋବାଇଲ ଟ୍ରାକିଂ କରିବା ସହ ସିସିଟିଭି ଯାଂଚ କରି ଶିକ୍ଷୟତ୍ରୀ ଜ୍ୟୋତ୍ସାରାଣୀ ସାହୁକୁ ପାଇଛି ।
ସୂଚନାଯୋଗ୍ୟ, ଗତ ୧୮ତାରିଖ ଶିକ୍ଷୟିତ୍ରୀ ସ୍କୁଲ ଓ ଜନଗଣନା କାର୍ଯ୍ୟରେ ଯାଇ ଭଡା ଘରକୁ ଫେରିନଥିଲେ । ଯାହାକୁ ନେଇ ଭଡାଘରେ ରହୁଥିବା ମାଲିକ ସୁରେଶ ଚନ୍ଦ୍ର ସି ଏନେଇ ଥାନାରେ ଅଭିଯୋଗ କରିଥିଲେ । ଏହାକୁ ନେଇ ବାରିପଦା ସଦର ଥାନା ଆଇଆଇସି ସସ୍ମିତା ମହାନ୍ତ ଏକ ଟିମ ଗଠନ କରି ତଦନ୍ତ ଆରମ୍ଭ କରିଥିଲେ । ପୋଲିସ ଶିକ୍ଷୟିତ୍ରୀଙ୍କ ମୋବାଇଲ ଟ୍ରାକିଂ କରି ସିସିଟିଭି ଫୁଟେଜରେ ଶିକ୍ଷୟିତ୍ରୀ ଜଣକ ମଧ୍ୟାହ୍ନ ସମୟରେ ବାରିପଦା ରେଳ ଷ୍ଟେଶନକୁ ଏକାକୀ ଯିବା ଓ ଟ୍ରେନରେ ଚଢିବା ଦୃଶ୍ୟ ପୋଲିସ ହାତରେ ଲାଗିଥିଲା । ପରେ ବାଲେଶ୍ୱର ରେଳ ଷ୍ଟେଶନର ସିସିଟିଭି ଯାଂଚ ପରେ ସେ ଟ୍ରେନରୁ ଓହ୍ଳାଇ ଯାତ୍ରୀ ବିଶ୍ରାମାଗାରକୁ ଯାଇଥିବା ଜାଣିବାକୁ ପାଇଥିଲେ ।
ତେବେ ମଙ୍ଗଳବାର ଶିକ୍ଷୟତ୍ରୀ ଜଣକ ପାଣି ନେବାକୁ ବାହାରକୁ ବାହାରିବା ସମୟରେ ପୋଲିସ ତାଙ୍କୁ ଉଦ୍ଧାର କରି ବାରିପଦାକୁ ଆଣିଛି । ଏହାକୁ ନେଇ ଶିକ୍ଷୟତ୍ରୀଙ୍କ ପରିବାର ଲୋକଙ୍କୁ ଡାକି ହସ୍ତାନ୍ତର କରିବ ବୋଲି ଜଣାପଡିଛି । ତେବେ ଜନଗଣନା କାର୍ଯ୍ୟ ଚାପକୁ ନେଇ ସେ ଏଭଳି ପଦକ୍ଷେପ ଗ୍ରହଣ କରିଛନ୍ତି ବୋଲି ଶିକ୍ଷୟତ୍ରୀ ଜଣକ ପ୍ରକାଶ କରିଛନ୍ତି । ତେବେ ଘଟଣାକୁ ନେଇ ପୋଲିସ ଅଧିକ ତଦନ୍ତ ଜାରି ରଖିଛି ।
