ବରଗଡ଼,୨୧।୪(ପ୍ରେମାନନ୍ଦ ଖମାରୀ): ବରଗଡ଼ ସହର ଉପକଣ୍ଠ ଜମୁର୍ଡା ଟାଙ୍ଗରପଡା ନିବାସୀ ବିଜିଲି ବଗର୍ତ୍ତିଙ୍କ ଘରକୁ ବିଦ୍ୟୁତ୍ ସଂଯୋଗ ନାହିଁ। ଘର ମଧ୍ୟ ବିପଦ ଶଙ୍କୁଳ ଅବସ୍ଥାରେ ରହିଛି। ବରଗଡ଼ର ପୂର୍ବତନ ବିଧାୟକ ସାଧୁ ଚରଣ ନେପାକ ମଙ୍ଗଳବାର ଉକ୍ତ ଗ୍ରାମକୁ ପରିଦର୍ଶନରେ ଯାଇ ତାହା ଦେଖିବା ପରେ ଉଦବେଗ ପ୍ରକାଶ କରିଛନ୍ତି।
ନେପାକ୍ କହିଛନ୍ତି, ବରଗଡ଼ ବିକଶିତ ହେଉଛି ବୋଲି ଡିଣ୍ଡିମ ପିଟାଯାଉଛି । ତେବେ ବରଗଡ଼ର ବିକାଶ କେଉଁ ପଟକୁ ମୁହାଁଇଛି, ତାହା ବିଜିଲି ବଗର୍ତ୍ତିଙ୍କ ଘରକୁ ଦେଖିଲେ ସ୍ପଷ୍ଟ ବାରି ହୋଇ ପଡୁଛି । ଡବଲ୍ ଇଞ୍ଜିନ ସରକାର ବିଦ୍ୟୁତକରଣ, ଆବାସ, ପାନୀୟ ଜଳ ଯୋଗାଣ ସହ ଅନେକ ଯୋଜନାରେ ହଜାର ହଜାର କୋଟି ଟଙ୍କା କେବଳ ପ୍ରଚାର ପ୍ରସାରରେ ଖର୍ଚ୍ଚ କରି ବାହାସ୍ଫୋଟ ମାରୁଛନ୍ତି। କିନ୍ତୁ ବିଜିଲିଙ୍କ ଭଳି ଅନେକ ଲୋକ ସେହି ଯୋଜନା ଗୁଡିକରୁ ବଞ୍ଚିତ ରହୁଛନ୍ତି । ତେବେ ବିଜିଲିଙ୍କ ସମସ୍ୟାକୁ ନେଇ ସେ ବରଗଡ଼ ଜିଲାପାଳଙ୍କ ଦୃଷ୍ଟି ଆକର୍ଷଣ ସହିତ ତୁରନ୍ତ ଉଚିତ ପଦକ୍ଷେପ ନେବାକୁ ଦାବି ଜଣାଇଛନ୍ତି ବୋଲି ବିଧାୟକ ସୂଚନା ଦେଇଛନ୍ତି।
