ଭଞ୍ଜନଗର,୨୧।୪(ବାବୁଲା ପ୍ରଧାନ)-ଗଞ୍ଜାମ ଜିଲ୍ଲା ଭଞ୍ଜନଗର ଠାକୁରାଣୀ ଯାତ୍ରା ଆସନ୍ତା ୨୬ ତାରିଖରୁ ଆରମ୍ଭ ହେବ । ମଝିରେ ଆଉ ୪ ଦିନ ରହିଥିବା ବେଳେ ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଛି । ତେବେ ଯାତ୍ରାରେ ଯୋଗଦେବା ପାଇଁ ମୁଖ୍ଯମନ୍ତ୍ରୀ ମୋହନ ଚରଣ ମାଝୀ , ବାଚସ୍ପତିଙ୍କ ସମେତ ଅନେକ ମନ୍ତ୍ରୀ, ବିଧାୟକ, ଏମପିଙ୍କୁ ନିମନ୍ତ୍ରଣ କରାଯାଇଛି । ଏଥିସହ ବରିଷ୍ଠ ସର୍ବ ଭାରତୀୟ ପ୍ରଶାସନିକ ସେବା ଅଧିକାରୀ ତଥା ଘୁମୁସର ମାଟିର ସୁଯୋଗ୍ୟ ସନ୍ତାନ ଅରିନ୍ଦମ ଡାକୁଆଙ୍କ ସମେତ ଗଞ୍ଜାମ ଜିଲାପାଳ, ଏସପି ସମେତ ଅନେକ ଅଧିକାରୀଙ୍କୁ ନିମନ୍ତ୍ରଣ ଦିଆଯାଇଛି।
ଉକ୍ତ ନେତା ଓ ଅଫିସରଙ୍କୁ ଭଞ୍ଜନଗର ବିଧାୟକ ପ୍ରଦ୍ୟୁମ୍ନ କୁମାର ନାୟକ, ମ୍ୟୁନିସିପାଲଟି ଅଧକ୍ଷ ଗୋପବନ୍ଧୁ ମହାପାତ୍ର, ଯାତ୍ରା କମିଟି କାର୍ଯ୍ୟକାରି ସଭାପତି ବିଷ୍ଟୁ ପ୍ରସାଦ ପ୍ରଧାନ, ଅବସରପ୍ରାପ୍ତ ତହସିଲଦାର ପ୍ରମୋଦ ଦଳବେହେରା, ବୁବୁନି ମହାନ୍ତି ଏବଂ ଅନ୍ୟମାନେ ବ୍ୟକ୍ତିଗତ ଭାବେ ଭେଟି ନିମନ୍ତ୍ରଣ କରିଛନ୍ତି। ଏହି ସମୟରେ ସେମାନେ ଯାତ୍ରା ସମୟରେ ଦେବୀଙ୍କ ଦର୍ଶନ ପାଇଁ ଯିବେ ବୋଲି ପ୍ରତିଶ୍ରୁତି ଦେଇଛନ୍ତି । ଯାତ୍ରା ଦିବସ ଯେତେ ନିକଟତର ହେଉଛି ସେହି ଅନୁସାରେ ପ୍ରସ୍ତୁତି ମଧ୍ଯ ଦ୍ରୁତ ଗତିରେ ଚାଲିଛି। ଉପ ଜିଲାପାଳଙ୍କ କାର୍ଯ୍ୟାଳୟ ନିକଟରେ ଚଳିତ ବର୍ଷ ରାମ ଦୋଳି ପଡୁଛି । ଏଥିସହ ପୁରୁଣା ଜେଲ ପରିସରରେ ସାଂସ୍କୃତିକ କାର୍ଯ୍ୟକ୍ରମ ସହ ପାର୍କିଂ ବ୍ୟବସ୍ଥା ହେଉଛି। ଏହାଦ୍ବାରା ମୁଖ୍ୟ ସଡକରେ ଆଉ ଟ୍ରାଫିକ ସମସ୍ୟା ଦେବୀଙ୍କ ନଗର ଭ୍ରମଣ ସମୟରେ ହେବନାହିଁ ବୋଲି ଆଶା କରାଯାଉଛି ।
ଅନ୍ୟପଟେ ଯାତ୍ରାକୁ ଆକର୍ଷଣୀୟ କରିବା ପାଇଁ ମୁଖ୍ୟ ସଡ଼କରେ ଏକାଧିକ ବିରାଟ ବିରାଟ ତୋରଣ ନିର୍ମାଣ ଚାଲିଛି। ଯାତ୍ରାର ୨୦୦ ବର୍ଷର ଇତିହାସରେ ଚଳିତ ବର୍ଷ ଯାତ୍ରାକୁ ଅଧିକ ଆକର୍ଷଣୀୟ କରିବା ପାଇଁ ସବୁ ପ୍ରକାରର ପଦକ୍ଷେପ ନିଆଯାଇଛି। ସୂଚନା ଯୋଗ୍ୟ ଯେ ଭଞ୍ଜନଗର ଯାତ୍ରା ପ୍ରତି ୩ ବର୍ଷକୁ ଥରେ ହେଉଛି। ଭଞ୍ଜନଗର ଯାତ୍ରାରେ କୁଲାଡ ବ୍ୟାଘ୍ର ଦେବୀ ଏବଂ ଭଞ୍ଜନଗର ଦେବୀ ଠାକୁରାଣୀଙ୍କୁ ପୂଜା କରାଯାଉଛି । ତେଣୁ ୨୬ ତାରିଖରେ ଉକ୍ତ ଦୁଇ ଦେବୀଙ୍କୁ ସ୍ଥାୟୀ ମଣ୍ଡପରୁ ଏକ ବିରାଟ ଶୋଭାଯାତ୍ରାରେ ଭଞ୍ଜନଗର ଆଣି ଅସ୍ଥାୟୀ ମଣ୍ଡପରେ ରଖାଯିବ। ଉପଜିଲାପାଳ ଉମା ଶଙ୍କର ବେହେରା ଦେବୀଙ୍କୁ ଧରି ଖାଲି ପାଦରେ ଚାଲି ଚାଲି ଅସ୍ଥାୟୀ ମଣ୍ଡପକୁ ଆଣିବେ। ଯାହାକି ଏକ ପରମ୍ପରା ରହିଛି ।
୨୫ ଦିନ ଧରି ଯାତ୍ରା ଚାଲିବ। ଏହାପରେ ଯାତ୍ରା ୨୦ ତାରିଖରେ ଉଦଯାପିତ ହେବ। ଅପରପକ୍ଷେ ଯାତ୍ରା ନିକଟତର ହୋଇ ଆସୁଥିବା ବେଳେ ଉପ ଜିଲାପାଳ ଉମା ଶଙ୍କର ବେହେରା ଏନେଇ ବାରମ୍ବାର ସମୀକ୍ଷା କରୁଛନ୍ତି ।
