ସମ୍ବଲପୁର, ୧୮।୧(ଭବାନୀ ଶଙ୍କର ଭୋଇ): ଗଙ୍ଗାଧର ମୁକ୍ତ ମଞ୍ଚରେ ରବିବାର ଆରମ୍ଭ ହୋଇଛି ତୃତୀୟ ସମ୍ବଲପୁରୀ ଧନଯାତ୍ରା। ସମ୍ବଲପୁରୀ ଧନୁଯାତ୍ରା କମିଟି ସଭାପତି ସଞ୍ଜୟ ବାବୁଙ୍କ ସଭାପତିତ୍ୱରେ ଅନୁଷ୍ଠିତ ଉଦ୍ଘାଟନୀ ଉତ୍ସବରେ ବିଧାନସଭାରେ ବିରୋଧୀ ଦଳ ଉପନେତା ତଥା ରେଢାଖୋଲ ବିଧାୟକ ପ୍ରସନ୍ନ ଆଚାର୍ଯ୍ୟ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ। ସମ୍ବଲପୁରୀ ଧନୁଯାତ୍ରା କେବଳ ଏକ ସାଂସ୍କୃତିକ କାର୍ଯ୍ୟକ୍ରମ ନୁହେଁ, ବରଂ ସମ୍ବଲପୁରୀ ସାଂସ୍କୃତିକ ଆନ୍ଦୋଳନ ବୋଲି କହିଥିଲେ।
ସମ୍ମାନୀତ ଅତିଥି ଭାବେ କର୍ନେଲ ପ୍ରଭାତ ପଣ୍ଡା ଯୋଗଦେଇ ସମ୍ବଲପୁରୀ ଭାଷାରେ ଧନୁଯାତ୍ରା ପ୍ରଦର୍ଶିତ ହେବା ଆମ ଭାଷା ସଂସ୍କୃତି ପାଇଁ ଗୌରବର ବିଷୟ ବୋଲି କହିଥିଲେ। ସାଧାରଣ ସମ୍ପାଦକ ଗୁଣରଞ୍ଜନ ସାଳିମା ଧନାବାଦ ଅର୍ପଣ କରିଥିଲେ। ଏହାପରେ ଶଶାଙ୍କ ଶେଖର ଦୁବେଙ୍କ କଣ୍ଠରେ ସମଲେଇ ବନ୍ଦନାରୁ କାର୍ଯ୍ୟକ୍ରମ ଆରମ୍ଭ ହୋଇଥିଲା ।
ଏହାପରେ ରାଜକୁମାର ବୋଷ, ଉମାଶଙ୍କର ଦାସ ଏବଂ ପ୍ରକୃତି ପଣ୍ଡା ଭଜନ ପରିବେଷଣ କରିଥିଲେ। ଏହାସହ ସାଂସ୍କୃତିକ ସମ୍ପାଦକ ଗୁରୁ କୃଷ୍ଣଚନ୍ଦ୍ର ବାଗ, ସହ ସାଂସ୍କୃତିକ ସମ୍ପାଦକ ଯୋଗେଶ କୁମାର ନନ୍ଦ ଏବଂ ଲଳିତ ବେବର୍ତ୍ତାଙ୍କ ସଂଯୋଜନାରେ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ କରାଯାଇଥିଲା।
ଭାରତୀ କଳା ପରିଷଦ, ସାନିକା ଡ୍ୟାନ୍ସ ଏକାଡେମୀ, ଏଆରପି ଡ୍ୟାନ୍ସ୍ସ ଗ୍ରୁପ, ଏମଜେ କଲଚରାଲ ଷ୍ଟୁଡିଓ ଡ୍ୟାନ୍ସ ଏକାଡେମୀ କଳାକାରମାନେ ସମ୍ବଲପୁରୀ ନୃତ୍ୟ ପରିବେଷଣ କରିଥିଲେ। ସକାଳେ ଇଷ୍ଟଦେବୀ ସମଲେଇଙ୍କର ମନ୍ଦିରରେ ପୂଜାଚ୍ଚନା କରାଯିବା ପରେ ସୁସଜ୍ଜିତ ଧନୁ ସହ ସାଂସ୍କୃତିକ ଶୋଭାଯାତ୍ରା ନଗର ପରିକ୍ରମା କରିଥିଲା । ଏହାପରେ ସମ୍ବଲପୁରୀ ଧନୁଯାତ୍ରା ଆୟୋଜନସ୍ଥଳରେ ଧନୁ ସ୍ଥାପନ କରାଯାଇଥିଲା । ସାଂସ୍କୃତିକ ଶୋଭାଯାତ୍ରାକୁ ସହ ସମ୍ପାଦକ ଦୁଷ୍ମନ୍ତ କୁମାର ପଣ୍ଡା ଏବଂ କୋଷାଧ୍ୟକ୍ଷ ନିଶିକାନ୍ତ ବିଶ୍ୱାଳ ସଂଯୋଜନା କରିଥିଲେ।
ସନ୍ଧ୍ୟାରେ ତୃତୀୟ ବର୍ଷର ସମ୍ବଲପୁରୀ ଧନୁଯାତ୍ରା ପରିବେଶିତ ହୋଇଥିଲା । ପ୍ରଥମ ସନ୍ଧ୍ୟାରେ ପୌରାଣିକ କଥାବସ୍ତୁ ଉପରେ ଆଧାରିତ ଲୀଳା ନାଟକରେ କଂସ ଜନ୍ମ ରହସ୍ୟ, ମହାରାଜ ଉଗ୍ରସେନଙ୍କ ଗାଦିଚ୍ୟୁତି, କଂସଙ୍କ ରାଜ୍ୟାଭିଷେକ, ଦେବକୀ ବିବାହ, ଦେବକୀ ବସୁଦେବଙ୍କୁ ବନ୍ଦୀ ଆଦି ଦୃଶ୍ୟ ପରିବେଷଣ କରାଯାଇଥିଲା। ପାଞ୍ଚ ଦିନ ଧରି ଚାଲିବାକୁ ଥିବା ଧନୁଯାତ୍ରା ପାଇଁ ମ୍ୟୁନିସିପାଲିଟି ଛକ ସ୍ଥିତ ଗଙ୍ଗାଧର ମୁକ୍ତମଞ୍ଚକୁ କଂସ ବରବାର ଓ ଚାଉଁରପୁରକୁ ଗୋପପୁର ସଜ୍ଜିତ କରାଯାଇଛି। ଚଳିତ ବର୍ଷ ଫଣିନ୍ଦ୍ର ପଣ୍ଡା କଂସ ଭୂମିକାରେ ଅଭିନୟ କରୁଛନ୍ତି । ସମ୍ବଲପୁରୀ ଧନୁଯାତ୍ରାରେ ବବଲୁ ବାଗ ନାଟ୍ୟ ରଚନା ଏବଂ ନିର୍ଦ୍ଦେଶନା ଦେଉଛନ୍ତି।
